Rusesabagina yagumye ku gifungo cy’imyaka 25, Sankara igera kuri 15
Amakuru

Rusesabagina yagumye ku gifungo cy’imyaka 25, Sankara igera kuri 15

Imvaho Nshya

April 4, 2022

Kuri uyu wa Mbere taliki ya 4 Mata 2022, Urukiko rw’Ubujurire rwashimangiye igifungo cy’imyaka 25 kuri Paul Rusesabagina,yari yarakatiwe n’urukiko Rukuru, Urugereko rushinzwe kuburanisha ibyaha by’Iterabwoba n’ibyambuka imipaka.

Ni mu gihe mu bujurire Nsabimana Callixte (Sankara) yagabanyirijwe igihano, kiva ku myaka 20 yari yakatiwe n’Urukiko Rukuru, kigera ku myaka 15 bitewe n’uko yorohereje Ubutabera kubona amakuru yerekeranye n’imikorere y’Umutwe wa MRCD-FLN.

Uru rukiko rugumishijeho ibihano ku bandi bose bagize uwo mutwe barimo Paul Rusesabagina na Nizeyimana Marc, bashinjwa kuba ku isonga mu gushinga no gutera inkunga ibikorwa bya FLN.

Kuri Nsengimana Herman, Urukiko rw’Ubujurire rwavuze ko yaburanye ahakana ko yari mu mutwe w’iterabwoba ahubwo yemera ko yabaye mu gisirikare kitemewe, rwanzuye ko yagabanyirijwe cyane ibihano, bityo akaba agomba gufungwa imyaka 7 aho kuba 5 yari yarahawe.

Mu bandi bari muri uru rubanza, Nizeyimana Marc igifungo cy’imyaka 20 yari yarakatiwe cyagumyeho, Iyamuremye Emmanuel imyaka 5 yari yarakatiwe nawe yagumyeho, Kwitonda André hagumyeho imyaka 5, Nshimiyimana Emmanuel imyaka 3 yari yarakatiwe yagumyeho, Hakizimana Theogene imyaka 5 yari yarakatiwe yagumyeho, Ndagijimana J.Chretien yakatiwe imyaka 3.

Nsanzubukire Felicien imyaka 5 yari yarakatiwe yagumyeho, Munyaneza Anastase imyaka 5 yari yarakatiwe nawe yagumyeho, uwitwa Nikuzwe Simeon wari warakatiwe imyaka 10 yagumyeho, Ntabanganyimana Joseph imyaka 3 yagumyeho, Mukandutiye Angelina hagendewe ko ari ubwa 1 akurikiranwe nyamara, Urukiko rwa Gacaca rwaramukatiye burundu, yakatiwe imyaka 20, Niyirora Marcel imyaka 5 yakatiwe nawe yagumyeho.

Uru rubanza rwasomwe kuva saa tatu za mu gitondo kugeza ku mugoroba wo kuri uyu wa Mbere. Rwabaye runini bitewe n’uko abaregwa bari benshi (21), ibyaha biburanywa ari 13 ndetse n’abaregera indishyi bari bageze kuri 98.

Hakurikiyeho gusoma imyanzuro y’abaregera indishyi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA