Rusizi barasabwa kwirinda ikwirakwira ry’indwara ya muryamo
Amakuru

Rusizi barasabwa kwirinda ikwirakwira ry’indwara ya muryamo

NYIRANEZA JUDITH

April 4, 2024

Ikigo cy’Igihugu gishinzwe iterambere ry’Ubuhinzi n’Ubworozi RAB kirasaba Akarere ka Rusizi kwirinda ko hakwirakwira indwara ya muryamo y’ingurube.

RAB yageneye ako Karere ubutumwa bugamije kwirinda ikwirakwira ry’indwara ya muryamo y’ingurube.

Itangazo ryashyizweho umukono n’Umuyobozi Mukuru wa RAB, Dr Ndabamenye Telesphore rivuga ko hashingiwe ku bizamini bya laboratwari byemeje indwara ya Muryamo y’ingurube (African Swine Fever) mu Karere ka Rusizi; hakanashingirwa ku itegeko rigenga uburyo bwo kwirinda no kurwanya indwara zanduza amatungo mu Rwanda; aborozi b’ingurube basabwa kwitwararika.

Itangazo rigira riti: “Indwara ya muryamo y’ingurube nta muti n’urukingo igira. Iterwa na virusi, ikaba ifata ingurube zorowe n’izo mu gasozi, aborozi basabwa kwirinda kuzerereza amatungo (ingurube) ku gasozi.

Ibimenyetso byayo ni umuriro mwinshi uri hejuru ya degere mirongo ine (40° C), kunanirwa kurya, kunanirwa kugenda, gutitira, gutukura ku bice by’umutwe, ku nda, ku maboko n’amaguru uhereye ku bice by’imyanya myibarukiro.

Aborozi, abaveterineri, n’izindi nzego bireba barasabwa gukaza isuku n’ubwirinzi mu bworozi bw’ingurube bashyiraho aho gukarabira ibirenge n’intoki mbere na nyuma yo kwinjira mu kiraro.

Itangazo rikomeza risaba guhagarika kuzerereza ingurube ku gasozi, ingurube zikaguma mu biraro. Ingendo n’icuruzwa ry’ingurube mu masoko rirahagaritswe mu Karere ka Rusizi kugeza igihe RAB izatangariza ko iyi ndwara itakihagaragara.

Aborozi barasabwa kwihutira kumenyesha umuvuzi w’amatungo ubegereye ku rwego rw’Umurenge mu gihe babonye bimwe mu bimenyetso byavuzwe haruguru ku ngurube yorowe.

Ikindi ni uko bibujijwe kubaga ingurube irwaye cyangwa yapfuye izize uburwayi ubwo ari bwo bwose.

Aborozi barasabwa gushyira ingurube zabo muri gahunda ya Leta y’ubwishingizi bw’amatungo, kugira ngo birinde ibihombo.

Itangazo risoza ryibitsa ko abazakora ibinyuranyije n’ibikubiye muri iri tangazo bazahanwa hakurikijwe amategeko.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA