Rusizi: Ijerekani y’amazi iragura 500 Frw, abaturage barahangayitse
Amakuru

Rusizi: Ijerekani y’amazi iragura 500 Frw, abaturage barahangayitse

BAHUWIYONGERA SYLVESTRE

March 24, 2024

Abaturage bo mu Mirenge ya Kamembe na Gihundwe mu Karere ka Rusizi bavuga ko ibura ry’amazi ryabahagarikiye ubuzima, dore ko kuri ubu ufadite nibura amafaranga y’u Rwanda 500 bimugora kubona amazi meza abanyonzi bakura mu bindi bice biyafite.

Iyo Mirenge yombi iherereye mu Mujyi wa Rusizi, abayituye bakaba bemeza ko bagiye kumara icyumweru cyose nta n’igitonyanga cy’amazi kigaragara muri robine zabo no ku mavomo rusange, bityo bakaba bifuza ko inzego zibishinzwe zabagoboka batarahura n’ibindi bibazo birimo kwanduzanya indwara zituruka ku mwanda.

Ni ikibazo gituma abaturage bo muri uyu mujyi bashoka ibishanga n’amazi mabi yo mu mibande, ndetse nah o hakaba hahora huzuye abavomyi biganjemo urubyiruko.

Abo mu Murenge wa Gihundwe bavuga ko batangiye kubura amazi guhera mu ntangiriro z’uku kwezi, inzego zibishinzwe zikababwira ko byatewe n’itiyo yacikiye munsi y’inyubako y’umuturage wayubakiyeho, kuyisana bikabanza kugorana.

Icyo kibazo cyarakemutse, hashize iminsi ibiri amazi arongera aragenda yongera gucikira hafi y’Ibitaro bya gihundwe nab wo isanwe amazia mara amasaha make gusa.

Kuva ubwo bakomeje kugorwa no kubona amazi aho ufafite nibura amafaranga 500 bimugora kubona litiro 20 z’amazi meza.

Iyo babajije abakozi b’Ikigo gishinzwe Isuku n’Isukura (WASAC), bababwira ko itiyo yongeye guturikira hafi y’isoko y’amazi bita Litiro, kuyisana bikaba bisaba imbaraga zikomeye, bityo abaturage badakwiye kuyategereza mu gihe cya  vuba.

Imvaho Nshya yavuganye n’abaturage yasanze mu bishanga, mu mibande no ku dusoko dutoya bari ku mirongo minini banabyigana, bayitangariza ko ubuzima bukomeje kubagora.

Uwimana Aline w’imayaka 20 wavomaga ku isoko ko  y’ahitwa ku Kadashya, uvuga ko yakoresheje iminota 45 kugira ngo agere kuri iyo soko nah o yari ahamaze amasaha atatu bitewe n’inkomati yari ihari.

Ayo mazi avomwa n’abasore b’ingufu baba bazanye amagare batwaraho amazi menshi.

Ati: “Udafite umusore  muziranye muri abo bazanye amajerikani menshi ngo akuvomere ntuyacyura kuko avomwa n’abasore b’imirya. Igipfunsi kiba kivuga urebye nabi wanahakomerekera. Icyumweru kigiye gushira twirirwa dutya nta guteka kumanywa, nta koga, nta kumesa imyenda, mbese ntituzi niba turi mu mujyi cyangwa n’abatwigishaga isuku  bakivuga.”

Mu mubande wa Rushakamba ahasanzwe urugomo rw’abasore bivugwa ko baba bahaze urumogi, bamwe mu bakobwa bajya kuhavoma barataka guhohoterwa n’izo nsoresore zishaka kubakubita.

Umukobwa umwe ati: “Reba hakurya ukuntu baterera umusozi bamanuka undi. Aha na ho bariya basore bari hirya ni abanywarumogi baba baruhanywera biyenza ku bahanyuze. No ku mugezi ubwaho kuhavoma ni imbaraga. Biratuma twica akazi kuko twirirwa muri iyo muzunga amazi akaba ingorabahizi.”

Mu gishanga cya Nkurunziza ho abahavomaga bavugaga ko hanyerera, bamwe bavuga ko ari abanyeshuri batewe inkeke n’uko bashobora kugusiba ishuri mu gihe baba batabonye amazi mu mpera z’icyumweru.

Ukwizagira Elizabeth ati: “Ubusanzwe mu rugo dukoresha amajerikani 10 ku munsi kuko turi benshi n’ibiyakoreshwa ari byinshi. Ijerikani y’amafaranga 500 hatagize uza kuvoma tukayagura twatanga amafaranga 5000 ku munsi. Ayo ntitwayabona. Aha tuvoma na ho,kubera gucurama no kunyerera cyane, abenshi barahagera bakikubita hasi bakazamuka bataka imvune.”

Bibaye mu gihe abaturage b’Akagari ka Shagasha mu Murenge wa Gihundwe, na bo babarirwa mu gice cy’umujyi, bamaze hafi amezi 2 nta n’igitonyanga babona kubera itiyo yaciwe n’umusozi watengutse.

Bo ubwo  Imvaho Nshya yabasuraga bakaba bari bafite impungenge z’amazi mabi y’igishanga cya Cyunyu banywa, aho bizezwaga ko bizakemuka vuba.

Umuyobozi wa WASAC mu Karere ka Rusizi Ngamije  Alexandre, avuga ko mu minsi ishize amatiyo yagiye acika bamwe bakayabura hari ibindi bice byayabonye, ariko ubu ho iyacitse ngo ni iyagaburiraga umujyi wose.

Ashimangira ko byasabaga ko ibikoresho bituruka i Kigali, n’abakozi bo gusubiza ibintu mu buryo bakaba atari bake. Ati: “Iyi tiyo yaturitse ni iyo ku muyoboro wo kuri Litiro, turi kugerageza kuyikora babe bihanganye, tubirimo.”

Umuyobozi w’Akarere ka Rusizi Dr. Kibiriga Anicet yanyomoje abakeka ko ubwo hakorwaga uyu muyoboro haba harakoreshejwe amatiyo atujuje ubuziranenge cyangwa asondetse, akavuga ko ahubwo boterwa n’uko ingano y’amazi ayoborwa mu mujyi yiyongereye bityo hakaba hagenda hasimbuzwa imiyoboro yak era hagashyiramo imishya ifite imbaraga.

Ibyo ngo bituma gusimbuza imiyoboro ifite imbaraga nke bitinda, anaturage bakagorwa no guhita babona amazi nk’uko bari babyiteze.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA