Rusizi: Muri Santere ya Kabujyogoro bugarijwe n’umwanda baterwa n’umuhanda
Imibereho

Rusizi: Muri Santere ya Kabujyogoro bugarijwe n’umwanda baterwa n’umuhanda

Imvaho Nshya

September 25, 2023

Abakorera muri Santere y’ubucuruzi ya Kabujyogoro, Umurenge wa Giheke, Akarere ka Rusizi, bavuga ko babangamiwe n’umuhanda mubi utuma ari ibikorwa bihari, ibihacururizwa biba bidafite isuku.

Bavuga ko baha ababagana ibicuruzwa byuzuye ivumbi mu gihe cy’izuba, n’icyondo mu mvura, hakaba n’ibyo badashobora gucuruza, nk’icyayi, ibya resitora n’ibiribwa ari bibisi, imvura n’izuba bituma inyubako zabo zihorana umwanda, bagasaba gutunganyirizwa uwo muhanda ngo babone uko birinda uwo mwanda.

Umwe mu rubyiruko ruhakorera Ahishakiye Félix, avuga ko uyu muhanda ubateza umwanda mu buryo bukomeye mu myambarire, ibicuruzwa, inyubako no kuhageza ibicuruzwa.

Ati: “Iyo imvura yabaye nyinshi, uretse n’umwanda utwugariza ntihaba hanakigenzwe. Ibyaranguwe byose babisiga ruguru kuri kaburimbo, bikaba byahamara iminsi 2 ngo habanze humuke bibone kuza. Tekereza umuntu waranguye ibyo yagombye kuba agurishije mu minsi 2, bikaba bitaraza kubera umuhanda. Ubwo se nyine ni nde ukiri muto wakomeza gukorera mu buryo nk’ubwo?”

Undi utarashatse ko amazina ye atangazwa, ati: “Iyi santere imaze imyaka irenga 50. Mu myaka ya za 1990 twe turi bato, umuhanda wari ukoze neza rwose, hari urujya n’uruza rwa tagisi zitari munsi ya 10 ku munsi. Hashyushye, abantu batera imbere, moto zigenda mu mvura no ku zuba, n’abantu bakunze kuhakorera no kuhazamura n’abadacuruza bakahabona imirimo,ari santere ikomeye”.

Yongeyeho ati: “Kuva mu 1998 nta kinyabiziga na kimwe cyahaza mu mvura. Uyu muhanda waradukenesheje bitavugwa, utugira ruvumwa ku mwanda, bituma n’ugize icyo ageraho yigira i Kamembe, hano tugasigara mu butindi n’umwanda kandi dukora tunashaka gusa neza”.

Umucuruzi uhagarariye abahakorera Iririkumutima Gratien,   na we yemeza ko  ibibazo byinshi ari iby’umwanda, ubwigunge no kutazamuka kwabo mu iterambere babiterwa cyane cyane n’uwo muhanda mubi, nubwo n’amashanyarazi adahagije abangamye.

Ati: “Birababaje kubona santere y’ubucuruzi yahoze ihinda, ubu utayisangamo resitora cyangwa abahacururiza icyayi n’amandazi meza, itakuramira ushonje, kuko byose byahinduka umwanda gusa, tukaba twakwikururira indwara kuruta  gushaka iterambere, dore ko n’ubundi indwara z’ubuhumekero zitatworohera kubera iri vumbi twirirwa tumiragura ngo turakora”.

Abahakorera bifuza ko ubuyobozi bwawubakorera, bagasirimuka nk’ahandi bagera, bakavugurura inyubako, zigasigwa amarangi nk’uko bimeze i Kamembe.

Umuyobozi w’Akarere ka Rusizi Dr. Kibiriga Anicet, yavuze ko ari ikibazo bazi, uwo muhanda koko uhangayikishije abaturage kandi hera cyane ku buryo kuwukora byakemura ikibazo cy’umwanda, byanafasha mu iterambere. Uri mu byihutirwa, uzakorwa mu ngengo y’imari 2023/2024.

Yagize ati: “Uriya muhanda uri mu yihutirwa Akarere kagomba gukora mu ngengo y’imari y’uyu mwaka, turumva uzakorwa nta kibazo”.

Uretse mu guhe cy’imvura, no mu gihe cy’izuba na bwo baba bugagijwe n’ivumbi rikabije

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA