Rusizi: Nkanka: Abarokotse bashengurwa nuko ababo bishwe babanje kwambikwa ubusa
Imibereho

Rusizi: Nkanka: Abarokotse bashengurwa nuko ababo bishwe babanje kwambikwa ubusa

BAHUWIYONGERA SYLVESTRE

April 19, 2024

Abafite ababo bashyinguye mu rwibutso rwa Jenoside yakorewe Abatutsi rwa Nkanka, Umurenge wa Nkanka mu Karere ka Rusizi, basura inzibutso z’ahandi mu gihugu, bavuga ko bashengurwa cyane no kuba ari rwo rwonyine bamaze kubona utasangamo umwenda n’umwe kuko abarushyinguyemo bose bishwe babanje kwambikwa ubusa.

Abaharokokeye baganiriye n’Imvaho Nshya, bavuga ko ubunyamaswa bwahakorewe bigizwemo uruhare n’uwari Burugumesitiri w’iyari Komini Kamembe Mubirigi Napoléon burenze intekerezo za muntu.

Ruterana Thadée w’imyaka 73, waharokokeye, wanahagarariye Ibuka muri uwo Murenge igihe kirekire, yabwiye Imvaho Nshya ko mu mibiri 535 ihashyinguye, nta n’umwe wasanganywe umwambaro, urukweto cyangwa ikindi cyose cyambarwa.

Ati: “Interahamwe zabiciye mu gikari cyo kwa padiri, mu kibikira,ku kigo nderabuzima cya Nkanka, ku biro by’iyari Komini Kamembe n’ahandi bagiye bicirwa umugenda. Babishe nabi kuko babanzaga kubatondesha umurongo, buri wese bakamwambura ubusa, batitaye ko umubyeyi mukuru ahagararanye n’umwana ubyiruka.’’

Yarakomeje ati: “Bakabacuza twose, bagahamagara abandi ngo nibaze barebe uko ibitsina by’abatutsikazi bimeze, barangiza bakabica, ariko mu by’ukuri uwicwa asa n’uwapfuye kare. Icyo babasigiye ni amashapure gusa, ni yo ari mu rwibutso.’’

Yavuze ko ubu bugome bwasigiye abarokokeye hano intimba ndende ku mutima, kubona nibura aho basura izindi nzibutso babereka imyenda abishwe bari bambaye, usuye akaba adashobora kuyibona, ngo barabicaga bavuga ngo nibabakuremo iyo myenda, inkweto n’ikindi cyose cyambarwa uretse ishapure, bitajyaho amaraso kandi bari bubitware.

Mu buhamya yatanze, Ndagijimana Jean Paul, wavuye iwe mu Munyove, yavuze ko nyuma y’uko interahamwe bari baturanye zimusenyeyeho inzu ye yari ayirimo yihishe muri pulafo, zikayisenya, n’amabati zikayasakambura zimushaka, ku bw’amahirwe akazicika, yahungiye ku Nkanka.

Avuga ko babanje kwihisha mu bikari byo kwa padiri,bakajya bajya mu misa nk’abandi bagasubira mu bikari, ngo interahamwe zikabwira uwari padiri mukuru Ngirinshuti Thadée ko zidashaka gusengana n’Abatutsi, ari bwo haje gushyirwaho misa y’Abahutu ukwayo n’iy’Abatutsi ukwayo.

Ibyo ariko ngo ntibyamaze kabiri kuko ku wa 14 Mata, padiri mukuru yababwiye ko bamaze kuba benshi cyane mu gikari cye, ko ibyiza ari uko bajya mu mashuri yari munsi yaho. Bagiyeyo, ibitero bibasangayo, bahangana na byo bakoresheje amabuye.

Ati: “Umunsi watubereye imperuka ni ku wa 18 Mata, ubwo Interahamwe zazanye imbunda n’amagerenade, duhangana dukoresheje amabuye, Burugumesitiri Mubiligi Napoléon araza avuga ko bakoze ikosa ryo gukerererwa kuko uwica inyenzi azizinduka.’’

 Ngo yajyanye n’umujandarume bari kumwe, uwo mujandarume agarukana isanduku yuzuye gerenade, n’ubundi barazibatera zishira ntawe zishe uretse bake zakomerekeje, kuko baziteraga zigacukura imbere yabo gusa.

Interahamwe ngo zahise zirara mu gikari kwa padiri, ku kigo nderabuzima cya Nkanka no mu babikira, zica rubi abari bahahungiye bose, zitanitaye ku babaga baje ku kigo nderabuzima kwivuza ibikomere babaga bakuye ahandi.

Avuga ko bakomeje guhangana kwinjira mu mashuri ngo zibice bikazinanira, ku bw’amahirwe nimugoroba hakagwa imvura nyinshi cyane,zikajya kugama, bwije zirataha, na bo bafata umugambi wo kuva muri ayo mashuri bagahungira ku cyari Komini Kamembe na Sitade Kamarampaka.

Avuga ko n’ubundi byabaye nko guhungira ubwayi mu kigunda kuko bukeye ku wa 19 Mata, abari bahungiye kuri komini barishwe, n’abajyaga kuri sitade bagenda bicwa umugenda hagerayo mbarwa, n’abagezeyo,bamwe bicirwayo,abandi bajyanwa I Nyarushishi ari ho barokokeye.

Ndagijimana ati’’ Harabaye ntihakabe. Twifuje urupfu ruratwanga,ariko ubu turashima ko Jenoside yahagaritswe n’ingabo zari iza FPR Inkotanyi, tukabona Leta nziza itica cyangwa ngo yangaze umuturage, iradusubiranya,uyu munsi nubwo ibibazo  bitabura,ariko uwo tuganyira ahari, n’ibyo tumubwiye abyumva.’’

Amashapure yonyine ni yo agaragara muri uru rwibutso nk’igaragaza ibyo abishwe bari bambaye

Uwavuze mu izina rya Ibuka Nyiramivumbi Josephine, yavuze ko abarokotse badakwiye guheranwa n’agahinda, kwibuka bigendana no guharanira kubaho,bakabaho ahabo n’ah’ababo bishwe,busa ikivi batusije, byose bakabikora bubaka ubumwe n’ubudaheranwa.

 Yashimiye ingabo zari iza FPR Inkotanyi zahagaritse Jenoside agira ati: “Turashimira ingabo zahagaritse Jenoside ubu buri wese akaba ari mu rugamba rwo kubaka ubumwe n’ubudaheranwa, ntawe ufite ubwoba bwo kwicwa, gusenyerwa no kwamburwa ibyo yagezeho.”

Yashimiye abarokokeye aho ku Nkanka uburyo bakomeje kwihangana na Leta yitaye ku barokotse, bakiga, abarwaye bakavuzwa, abatagiraga aho baba bakahabona,avuga ko n’ibitaragerwaho yizeye ko bizagerwaho kuko kwiyubaka ari urugendo.

Yasabye ko amazina y’abashyinguye mu rwibutso rwa Nkanka yahandikwa,bakajya bibukwa mu mazina yabo.

Yanasabye abatagaragaza ahajugunywe imibiri y’abishwe kandi bahazi kureka gukomeza kwinangira, bakahagaragaza, bakaruhura abatarashyingura ababo kugeza ubu.

Umuyobozi w’Akarere ka Rusizi, Dr Kibiriga Anicet yavuze ko amateka y’ibyabereye ku Nkanka, yatumye urwibutso rwaho ruri mu zizasigara ngo aya mateka atazibagirana, asaba abaturage gukomeza gufata mu mugongo abarokotse Jenoside.

Yavuze ko akarere kakoze byinshi bifata mu mugongo abarokotse, agira ati: “Akarere kakoze byinshi byo gufata mu mugongo abarokotse batishiboye,kabubakira inzu mu Mirenge itandukanye, hakaba hamaze kubakwa inzu 600 zirimo 25 zubatswe ku Nkanka, zubakishije ibikoresho biramba.’’

Yabijeje ko Akarere katazahwema gukomeza kubafasha kwiyubaka, abasaba gukomeza gusigasira ubumwe bwabo nk’imbaraga zabo.

yongera gusaba abafite amakuru y’ahari imibiri itarashyingurwa mu cyubahiro kuyatanga igashyingurwa.

Mu kwibuka umwaka ushize Umurenge wa Nkanka wabonetsemo abantu 5 bagaragayeho ingengabitekerezo ya Jenoside,banabihamywa n’inkiko.

Umunyamabanga nshingwabikorwa wawo Ntivuguruzwa Gervais akavuga ko uyu mwaka, kugeza ubu ntawe iragaragaraho, abishimira abaturage.

TANGA IGITECYEREZO

  • lg
    April 20, 2024 at 3:59 pm Musubize

    Nababwira iki mbona muhoberana ngo mwarababariye mbabazwa nabo bavandimwe bishwe uko iyo bababona musomana nabo babishe urupfu nkurwo nimwiyunge da ubundi ntawe ufite ububasha uretse uwishwe nuwamwishe roho yumuntu ntibazwa umuvandimwe cya umubyeyi we uwo bourgmestre nanyuma ya génocide yabaye we biragoye ibyaba bantu kubyumva bamwe ubu batavuga ko uyu watanze ubuhamya abeshya uyu nawe yarapfuye nicyo yarakwiye we yaranashaje abandi ba impinja abasore inkumi ababyeyi abato nabakuru iktajyya kivugwa uyu mumugi kumanwa yagendaga muli Hiace ya Komini Kamembe ndetse akanayivamo yambaye imyenda ya Gisirikare afite karachinicov nshya na pistolet kumukandara kumanywa ikindi nuko abacuruzi baho bagiye kwiga imbunda bakanazihabwa abatanga ubuhamya abantu batabizi ntibakibwire ko bakabya iyo bavuga ibyabaye

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA