Rutsiro: Impanuka y’ubwato yahitanye 2 abandi 3 baburirwa irengero
Imibereho

Rutsiro: Impanuka y’ubwato yahitanye 2 abandi 3 baburirwa irengero

Imvaho Nshya

May 2, 2022

Mu Kiyaga cya Kivu, ku gicamunsi cyo kuri uyu wa Mbere taliki 02 Gicurasi 2022, habaye impanuka y’ubwato bwari butwaye abantu 33 babiri muri bo bitaba Imana, abandi batatu ntibahita baboneka.

Umuyobozi w’Umurenge wa Boneza mu Karere ka Rutsiro ahabereye impanuka, bwemeje iby’ayo makuru, bushimangira ko iyo mpanuka yabaye saa munani n’iminota 40 z’amanywa.

Umunyamabanga Nshingwabikorwa w’Umurenge wa Boneza Mudahemuka Christophe, yabwiye RBA ati: “Twagize ibyago abo babiri bamaze gushiramo umwuka ariko abandi 28 baracyahumeka, twizeye ko bari gukorerwa ubutabazi bwihuse mu Kigo Nderabuzima cya Kinunu kiri mu Murenge wa Boneza”.

Mudahemuka yashimiye Ishami rya Polisi y’u Rwanda rishinzwe umutekano wo mu mazi (Marine) ryihutiye kurohora abari barohamye muri iyo mpanuka bigatuma abantu 28 barokorwa bagihumeka.

Mudahemuka asobanura ko iyo mpanuka yatewe n’uko ubwato bwari butwaye abantu butarabigenewe kuko bwari ubwo kuroba, ndetse n’abari baburimo nta myambaro ibarinda kurohama (jillet) bari bafite, ndetse nta n’ubwishingizi bwari bwarafatiwe ubwo bwato.

Avuga kandi ko mu Kiyaga cya Kivu hari harimo umuyaga mwinshi uteza ubwato guta umurongo, abasare n’abaturage muri rusange bakaba barihanangirijwe baburirwa kwirinda kujya mu mazi mu gihe ikirere kitameze neza.

Mudahemuka avuga ko abaturage barohamye bavaga mu Kagari ka Remera mu Mudugudu wa Bigabiro berekeza mu Kirwa cya Bugarura aho bari bagiye guhemba uwitwa Ufitimana Nelson uherutse kwibaruka.

Ubwato bwakoze impanuka ni ubw’uwitwa Ntirivamunda Eliyeri bwakoreshwaga imirimo y’uburobyi. Mudahemuka avuga ko impanuka y’ubwato yaherukaga kubera mu Kiyaga cya Kivu ku ruhande rw’Umurenge wa Boneza ari iyabaye mu mezi nk’atanu ashize.

Ubwo bwato kandi bwari bwikoreye imyumbati n’ibitoki bubijyanye ku Gisenyi, buhura n’imvura nyinshi yari irimo kugwa kandi hari nijoro.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA