Rwamagana: 13 bishwe muri Jenoside yakorewe Abatutsi bashyinguwe mu cyubahiro
Amakuru

Rwamagana: 13 bishwe muri Jenoside yakorewe Abatutsi bashyinguwe mu cyubahiro

NSHIMIYIMANA FAUSTIN

April 11, 2024

Kuri uyu wa 11 Mata 2024, imibiri 13 y’abishwe muri Jenoside yakorewe Abatutsi mu 1994 yashyinguwe mu cyubahiro mu Rwibutso rwa Muyumbu mu Karere ka Rwamagana.

Abarokotse Jenoside yakorewe Abatutsi mu 1994 bafite ababo bashyinguwe mu cyubahiro  uyu munsi  bashimira Leta y’Ubumwe bw’Abanyarwanda yatumye habaho uyu mwanya  kuko bibafasha kubohoka no gusezera ku babo basubizwa agaciro bambuwe muri Jenoside.

Imibiri 11 mu yashyinguwe yaturutse mu miryango itatu ituye mu Murenge wa Muyumbu ari yo umuryango wa Gahunde Faustin n’umugore we Mukantamati Marie ndetse na Kayimugabire, umuryango wa Nzakamwita Claver n’umugore we Mukakimenyi Agnes n’abana babo Murebwayire Marie Francoise na Muteteri Marie Teresse.

Hari kandi n’umuryango wa Kabera Appolinaire na Nyirakandagaye Marie n’abana babo ari bo Umugwaneza Pauline, Kananura Fulgance n’umwuzukuru wabo Uwamahoro Diane; hiyongereyeho umubiri umwe wa Rusanganwa Diogene utuye ku Muyumbu n’undi umwe waturutse mu Murenge wa Nyakaliro batabashije kumenya amazina.

Uhagarariye imiryango yashyinguye ababo mu rwibutso rwa Muyumbu, Murindwa Syprien, yavuze ko imibiri yashyinguwe yishwe urwagashinyaguro ndetse bicwa nabi babataba bagihumeka.

Yagize ati: “Aba Batutsi bishwe nabi kuko barabatemaguye gusa ikibabaje ni uko babatabye babarenzaho itaka bagihumeka.”

Murindwa ashimira ingabo za RPA zabohoye u Rwanda rwari mu icuraburindi ziyobowe na Perezida Paul Kagame.

Yashimiye kandi Leta y’Ubumwe bw’Abanyarwanda ibafashije gushyingura mu cyubahiro no kuba yarunze Abanyarwanda bose ikababanisha neza.

Yagize ati: “Ingabo za RPA zarokoye benshi, ubu abenshi ni abagabo abandi ni abagore bazima bafitiye igihugu akamaro. Aba twashyinguye bari bandagaye ku misozi kandi ntitwatekerezaga ko gushyingurwa bizabaho ariko kubera ubuyobozi bwiza twabigezeho. Leta y’ubumwe idufasha gushyingura abacu turayishimira kuko iyo ushyinguye umuntu wawe uba uruhutse, umutima uba uruhutse kuko uba uzi ko umushyinguye. Iyo utamubonye uba utekereza ko hari ahandi hantu ari, wumva ko mu gihe runaka azagaruka.”

Umuyobozi wa Ibuka mu Karere ka Rwamagana Musabyeyezu Dativa, asaba Abarokotse Jenoside gukomera no gukomezanya muri iki gihe cyo kwibuka amateka ya Jenoside yakorewe Abatutsi, akagira inama abataratanga amakuru y’ahari imibiri ko bakwiye kuvugisha ukuri kutarabaturikana.

Yagize ati: “Ukuri kugiye ahagaragara bizafasha imitima gukira no komora ibikomere by’abarokotse Jenoside kuko ni bwo twabasha gufatanya byuzuye mu kubaka igihugu cyacu, tukabikora duhuje umutima ndetse tugashyira hamwe imbaraga. Iyo umutima udakize, gukoresha imbaraga z’amaboko biragora. Reka turebe uko tubanza gukira imitima hanyuma turebe imbaraga icyo zikora mu bikorwa binyuranye mu kubaka igihugu cyacu.”

Yakomeje agira ati: “Abadashaka guhinduka turabaharira ubuyobozi ariko bamenye ko uko kuri babitse mu mitima ari nko kubundikira igisasu, amaherezo gishobora kuzaturika. Birindira ko kizaturika kuko nigiturika kizangiza byinshi na bo kibangize, ahubwo nabagira inama yo kubibwira ababishinzwe bakagituritsa kitagize ibyo cyangiza.”

Umunyamabanga wa Leta muri Minisiteri y’Uburezi Irere Claudette, yavuze ko Abarokotse Jenoside bagize uruhare mu kugarura ubumwe mu Banyarwanda ariko kandi bibabaje kuba hari abantu bacecetse imyaka 30 ntibatange amakuru y’ahari imibiri y’Abatutsi bishwe muri Jenoside.

Yagize ati: “Abarokotse bagize uruhare rukomeye mu kugarura ubumwe mu Banyarwanda bwari bwararanzwe n’amacakubiri y’igihe kirekire. Ni yo mahitamo u Rwanda rwahisemo mu rugendo rwo kongera kwiyubaka kandi ni icyerekezo dukesha Guverinoma y’ubumwe irangajwe imbere n’Umukuru w’igihugu Paul Kagame, kandi Turashimira Inkotanyi zahagaritse Jenoside hakongera kubaho urumuri rw’ubuzima.”

Yavuze ko iyo amakuru atanzwe imibiri igashyingurwa mu cyubahiro, biha agahenge ndetse n’umutuzo Abarokotse.

Asaba Abanyarwanda gukumira icyo ari cyo cyose cyahembera ingengabitekerezo ya Jenoside.

Yakomeje agira ati: “Mu gihe twibuka Jenoside yakorewe Abatutsi, twibuke ko hari abakiyihembera yaba abari mu karere u Rwanda ruherereyemo no mu mahanga ya kure. Dukomeza kuba maso kandi ni inshingano za buri wese gutunga urutoki icyasubiza Abanyarwanda inyuma by’umwihariko tukamagana uwo ari we wese wagarura ingengabitekerezo ya Jenoside.

Urwibutso rwa Jenoside rwa Muyumbu rwari ruruhukiyemo imibiri 14,373 y’abishwe muri Jenoside yakorewe Abatutsi mu 1994, yaturutse mu Mirenge ya Muyumbu, Nyakariro, Karenge, Nzige, Gahengeri yo muri Rwamagana, uwa Rusororo wo mu Karere Ka Gasabo n’uwa Masaka wo muri Kicukiro.

Umunyamabanga wa Leta muri Minisiteri y’Uburezi Irere Claudette
Umuyobozi w’Akarere ka Rwamagana Mbonyumuvunyi Rajab

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA