Rwamagana: Imiryango y’abafite ubumuga yorojwe amatungo magufi
Imibereho

Rwamagana: Imiryango y’abafite ubumuga yorojwe amatungo magufi

NTAWITONDA JEAN CLAUDE

February 25, 2022

Umuntu ufite ubumuga na we arashoboye, ni yo mpamvu muri gahunda zo guteza imbere imibereho y’abaturage imiryango 14 itishoboye y’abafite ubumuga n’imiryango itishoboye ifite abana bafite ubumuga bo mu Murenge wa Karenge mu Karere ka Rwamagana, yahawe amatungo magufi.

Ibikorwa by’icyumweru cyahariwe gahunda ziteza imbere imibereho myiza y’abaturage n’ubukangurambaga bugamije kurengera abana bafite ubumuga; imiryango 14 itishoboye y’abantu bafite ubumuga n’ifite abana bafite ubumuga mu Murege wa Karenge yorojwe ihene.

Ibyo bikorwa birimo gukorwa mu bukangurambaga ‘Nanjye ndashoboye’ bugamije gukangurira ababyeyi kuvuza abana bavukanye ubumuga, gukangurira ababyeyi kujyana abana bafite ubumuga mu ngo mbonezamikurire z’abana (ECDs), gukangurira abaturage gutanga amakuru ku bana bafite ubumuga bahezwa mu nzu.

Umunyamabanga Nshingwabikorwa w’Umurenge wa Karenge mu Karere ka Rwamagana, Ntwari Emmanuel yavuze ko umuntu ufite ubumuga ari umuntu ushoboye.

Yagize ati: “Umuntu ufite ubumuga ni umuntu ushoboye, ni yo mpamvu ubuyobozi bwiyemeje gushyigikira abafite ubumuga mu rugendo rwo kwiteza imbere, guteza imbere imiryango yabo ndetse n’Igihugu muri rusange.”

Ubwo bukangurambaga ‘Nanjye ndashoboye’ kandi bugamije nanone gukangurira ababyeyi n’abarezi kwita ku mpano z’abana bafite ubumuga kuko na bo hari ibyo bashoboye, no gushishikariza abikorera n’abafatanyabikorwa gushyira mu iteganyabikorwa ryabo ibikorwa byo kurengera abana bafite ubumuga.

Ibikorwa birimo gukorwa bishingiye kugusobanurira abaturage gahunda za Leta zigamije gukura abatishoboye mu bukene, kureba umusaruro zitanga, kumenya intambwe abagenerwabikorwa b’izi gahunda bagenda batera umunsi ku munsi.

Umwe mu bahawe ayo matungo yashimiye Ubuyobozi bubitaho kandi avuga ko bazayafata neza ngo bagere ku mibereho myiza.

Ayo matungo atangwa ku bufatanye bw’Akarere ka Rwamagana na AAEE Rwanda kandi iki gikorwa kizakomereza no mu yindi Mirenge yose yo mu Karere ka Rwamagana.

Umunyamabanga Nshingwabikorwa w’Umurenge wa Karenge Ntwari yashimiye AAEE ku gikorwa cyo kuremera imiryango itishoboye y’abafite ubumuga n’imiryango ifite abana bafite ubumuga, asaba abahawe amatungo kuyitaho akababera intangiriro yo kwiteza imbere.

Abafite ubumuga n’imiryango itishoboye ifite abana bafite ubumuga borojwe ihene (Foto Akarere ka Rwamagana)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA