Rwamagana: Imodoka itwaye Lisansi yagonganye n’ivatiri ifunga umuhanda 
Amakuru

Rwamagana: Imodoka itwaye Lisansi yagonganye n’ivatiri ifunga umuhanda 

NSHIMIYIMANA FAUSTIN

March 24, 2024

Ku gicamunsi cyo kuri iki Cyumweru tariki ya 24 Werurwe 2024, mu Karere ka Rwamagana mu Murenge wa Musha ahazwi nko ku Matafari, habereye impanuka y’ivatiri yavaga i Kigali ikagongana n’ikamyo itwaye lisansi ari na yo yahirinye igahita ifunga umuhanda. 

Polisi y’u Rwanda yemeza ko ntawaburiye ubuzima muri iyo mpanuka uretse ko umushoferi w’ivatiri yakomeretse byoroheje akaba yanajyanywe kwa muganga aho ari kwitabwaho. 

Umuvugizi wa Polisi mu Ntara yIburasirazuba SP Hamdun Twizeyimana, yavuze ko impanuka yatewe n’iyo vatiri yataye inzira igasatira igice cyumuhanda cyarimo ikamyo ikayigoga.

Umushoferi w’ikamyo wageragezaga guhunga yisanze yakase imodoka yose igwa mu muhanda hagati  irawufunga wose ku buryo utari ukiri nyabagendwa. 

Yagize ati: “Imodoka yo mu bwoko bwa Cororado yataye umuhanda isanga ikamyo mu muhanda wayo irayigoga, byatumye ikamyo ibirinduka igwa mu muhanda ndetse irawufunga. Ntawahaburiye ubuzima uretse uwari utwaye imodoka yo mu bwoko bwa Cororado wakomeretse byoroheje ariko na we yajyanywe ku bitaro kureba niba nta kibazo kindi yagize.”

Ubuyobozi bwa Polisi yu Rwanda bubinyujije ku mbuga nkoranyambaga bwatangaje ko umuhanda ikamyo yakoreyemo impanuka wabaye ufunzwe mu gihe iyo kamyo itarakurwamo. 

Itangazo riragira riti: “Turabamenyesha ko kubera impanuka yabereye mu muhanda munini Kigali-Rwamagana ahitwa mu Kabuga ka Musha mu Kagari ka Nyakabanda, mu Murenge wa Musha, mu Karere ka Rwamagana, uyu muhanda ubaye ufunze by’agateganyo.

Turasaba abakoresha imodoka nto gukoresha umuhanda Nyagasambu Ku Isoko- Paruwasi ya Musha- Kadasumbwa.

Abakoresha imodoka nini baraba bihanganye mu gihe imodoka yaguye mu muhanda igikurwamo.”

Polisi yijeje kandi ko umuhanda nuba nyabagendwa biza gutangarizwa abaturage kugira ngo bakomeze kuwukoresha imkomyi zawushizemo.

Yanashimangiye kandi ko hari abapolisi bashyizwe mu muhanda kugira ngo bayobore abatwaye ibinyabiziga mu zindi nzira zibafasha gukomeza ingendo. 

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA