Rwamagana: Karenge: Amazi meza ageze ku baturage 85%
Imibereho

Rwamagana: Karenge: Amazi meza ageze ku baturage 85%

NTAWITONDA JEAN CLAUDE

March 18, 2022

Mu gikorwa cyo kugenzura  ibikorwa  by’iterambere  ry’imibereho myiza y’abaturage  n’ishyirwa mu bikorwa ry’imishinga y’iterambere Intumwa za rubanda mu Nteko Ishinga Amategeko Umutwe w’Abadepite basuye Umurenge wa Karenge  mu Karere ka Rwamagana, basanga kwegereza abaturage amazi meza bigeze kuri 85%.

Depite Kanyange Foïbe, Depite Nyabyenda Damien na Depite Nyirabega Eutalie barimo gusura Umurenge wa Karenge Muri uru ruzinduko baherekejwe n’Umuyobozi w’Akarere Wungirije ushinzwe Iterambere ry’Ubukungu Nyirabihogo Jeanne d’Arc baganira n’abayobozi uhereye ku Kagari, abahagarariye ibyiciro byihariye n’abayobozi b’ibigo by’amashuri.

Itsinda ry’Abadepite barangajwe imbere na Depite Kanyange Foïbe basuye uruganda rutunganya amazi rwa Karenge (Karenge water treatment plant). Uru ruganda rutunganya amazi angana na metero kibe15,000  (m3 15,000) ku munsi.

Mu Murenge wa Karenge kugeza amazi meza ku baturage bigeze ku ijanisha rya 85%.

Abadepite banasuye amavomo rusange yo mu Midugudu itandukanye mu rwego rwo kureba aho ubuyobozi bugeze mu kugeza amazi meza Ku baturage.

Mu kwihutisha iterambere ry’Umurenge wa Karenge hasanwe umuhanda Rugende-Karenge-Nzige ureshya na Kilometero 15.5 n’umuhanda wa Karenge-Mugesera ureshya na Kilometero 3.5; hubakwa ikusanyirizo ry’amata rihuriza hamwe umukamo, ndetse hubakwa n’ubwanikiro 5 bw’ibigori bufasha mu kwita ku musaruro.

Umurenge wa Karenge ufite ubutaka bwiza bubereye ibihingwa byinshi harimo n’ibihingwa ngengabukungu nka kawa, urusenda na makadamiya; ikiyaga cya Mugesera n’uruzi rw’Akagera bifasha mu kuhira imyaka n’imbuto; amabuye y’agaciro aboneka mu tugari 4, n’urubyiruko rufite imbaraga.

Umurenge ugizwe n’Utugari 7, Imidugudu 36, ukagira ubuso bungana na 63.35Km2. Abaturage batuye muri uyu murenge ni 27,537; bakaba bibumbiye mu ngo 5,432; bitanga ubucucike bw’abaturage 435 kuri kilometero kare.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA