Sam Muvunyi yasohoye indirimbo ihanura Abanyarwanda kwirinda igihemu 
Amakuru

Sam Muvunyi yasohoye indirimbo ihanura Abanyarwanda kwirinda igihemu 

NTAWITONDA JEAN CLAUDE

June 7, 2022

“Ubucurabwenge” ni indirimbo nshya ya Sam Muvunyi, umuhanzi w’indirimbo nyarwanda wamenyekanye cyane mu guhanga no kuririmba indirimbo zo kuramya no guhimbaza Imana, aho yereka Abanyarwanda iherezo ribi ry’igihemu, guhakirizwa n’izindi ngeso zifatwa nka kirazira mu muco nyarwanda.

Iyo ndirimbo itangira agira ati: “Ngiri ijambo ry’ubwenge nguhaye mwana wanjye, rishobora kutagutuza mu miturirwa y’abatunze rikagutuza mu mitima ya rubanda. Ngubu ubucurabwenge mwana wanjye we! Uzibuke ko nabikubwiye, igihemu kiraraza nticyiriza mwana wanjye urumve…”

Mu kiganiro yagiranye n’Imvaho Nshya, Sam Muvunyi yavuze ko iyo ndirimmbo iri mu ndirimo z’umuco akomeje kwibandaho nyuma y’izindi yagiye asohora mu majwi no mu mashusho zo kuramya no guhimbaza Imana, zizwi nka Gospel.

Ati: “Ubutumwa nashatse gutanga muri rusange, ni nk’umurage wo guha umwana wawe umubwira uburyo akwiye kwitwara mu bantu, ko guhemuka bishobora kumufasha none ariko bitazahoraho ari na ho mvuga ngo igihemu kiraraza ariko nticyiriza.”

Akomeza atanga ubutumwa bw’uko Abanyarwanda bakwiye kubana neza, abahakwa bagahakwa ariko birinda guhakiririzwa kuko ari ubugwari. “[…] Umuntu si uyu ureba, umuntu ni ubumuntu, ubupfura buba mu nda…”

Ubuhanzi no gukunda umuziki bya Sam Muvunyi byatangiye kuva mu bwana bwe, aho bwanakomeje mu mabyirukaye kugeza n’uyu munsi yabaye umugabo.

Yize amashuri abanza n’ayisumbuye mu Ishuri rya Rwinkuba n’irya Nyamirama, akomereza Kaminuza mu ryahoze ari Ishuri Rikuru Nderabarezi rya Kigali (KIE).

Mu 2010 ni bwo yasohoye indirimbo yise ‘Turapfiki’, nyuma aza gusohora umuzingo w’indirimbo 10 zo kuramya no guhimbaza Imana.

Zimwe mu ndirimbo zo guhimbaza Imana za Sam Muvunyi zakunzwe cyane harimo Yesu ni Byose, Vugana Nanjye, Nzamamaza Wowe, Sinabaho Ntagufite n’izindi.  

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA