Sonia Rolland arakorwaho iperereza kubera inzu yahawe na Omar Bongo
Amakuru

Sonia Rolland arakorwaho iperereza kubera inzu yahawe na Omar Bongo

Imvaho Nshya

June 3, 2022

Uwitonze Sonia Rolland wabaye Nyampinga w’u Bufaransa mu mwaka wa 2000 yatangiye gukurikiranwa n’ubutabera kubera impano y’inzu (Appartment) yahawe na Omar Bongo wahoze ari Perezida wa Gabon muri 2003.

CNN ivuga ko inzego z’u Bufaransa ari zo zatangiye kumukoraho iperereza nk’uri mu ruziga rw’abakekwaho gutwara imitungo ya Omar Bongo na we bivugwa ko ashobora kuba yarayibonye mu buryo bw’uburiganya no kwigwizaho imitungo.

Rolland ufite umubyeyi umwe w’Umunyarwandakazi na se w’Umufaransa, ni we Munyafurika wa mbere watsinze amarushanwa ya Nyampinga w’u Bufaransa (Miss France) igihe yari afite imyaka 22 y’amavuko. Mu mwaka wa 2003, ni bwo yahawe inyubako iherereye i Paris nk’impano agenewe na Perezida Bongo, iyo nyubako ikaba ifite agaciro k’Amapawundi 800,000 asaga miliyoni 874 z’amafaranga y’u Rwanda.

Ikinyamakuru CNN gitangaza ko Umushinjacyaha Mukuru w’u Bufaransa ushinzwe gukurikirana imanza z’ubukungu yemeje ko Rolland amaze iminsi akorwaho iperereza ku byaha guhisha ibyanyerejwe biturutse mu mitungo ifitiye inyungu rubanda, ruswa no gukoresha umutungo w’abandi nabi biri mu mujyo w’amahugu.

Ikinyamakuru Le Parisien ku wa Mbere taliki 30 Gicurasi 2022, cyatangaje ko uwunganira uyu mugore w’abana babiri mu by’amategeko yitabye ubutabera i Paris mu Bufaransa ngo asobanure iby’iyi nyubako.

Kugeza ubu nta mpapuro zimuta muri yombi zirashyirwa hanze nk’uko byagaragajwe n’ibiro by’Umushinjacyaha Mukuru.  

Itangazo ryohererejwe CNN rigaragaza ko, umwunganizi we Charles Morel, yemeza ko iyo nyubako ya Sonia Rolland yatanzwe mu buryo budasobanutse ivuye mu maboko y’umuryango wa Bongo, biza kugaragara nyuma y’imyaka igera kuri 22 ko harimo ikibazo.

Morel yagize ati: “Rolland yemera ko yabaye umwana ariko agahakana ko yaba yarakoze icyaha. Icyo gihe ntiyari azi inkomoko y’iyo nkunga cyangwa ibyari bikuubiye mu mpano yagenewe.

Yakomeje avuga ko Rolland yizeye nta gushidikanya ko nyuma y’iperereza azagirwa umwere.

Mu 2003, Sonia Rolland yamenyeshejwe ko yahawe inzu ariko bikozwe n’abandi bantu batari Bongo, ndetse nyuma uyu wari ukiri umukobwa muto yasabye ko hari impinduka zayikorwaho.

Nyuma yo guhabwa iyi mpano ariko Sonia Rolland ntiyigeze abaza inshuti ze nshya zari ziyimuhaye ngo amenye aho amafaranga yayiguzwe yavuye. Nyuma yo gukora iperereza, byagaragaye ko iyi nzu yaguzwe mu izina rya sosiyete yo mu Bufaransa yari yarahishwe ikora ibyo kurimbisha ahantu n’imitako.

Muri Werurwe 2021, ni bwo byatangajwe ko Iperereza ryakozwe n’Ibiro Bikuru Bishinzwe Kurwanya Ibyaha Bikomeye by’Imari (OCRGDF) mu Bufaransa, ryatahuye ko Sonia Rolland hari inyubako nini yo guturamo (appartement) yahawe nk’impano mu 2003 na Omar Bongo wahoze ari Perezida wa Gabon.

Umuryango wa Bongo wayoboye Gabon mu myaka irenga itanu. Omar Bongo wari Perezida yishwe n’indwara y’umutima igihe yari arimo kuvurwa kanseri y’amara mu 2009.

Yayoboye Gabon imyaka 42 nyuma yo kuba Perezida w’icyo gihugu mu 1967, nyuma y’imyaka irindwi kibonye ubwigenge bw’u Bufaransa. Yahise asimburwa ku butegetsi n’umuhungu we Ali Bongo.

Bivugwa ko Omar Bongo yayoboje igitugu mu myaka yose yamaze ku butegetsi, ku buryo nyuma ye hatangiye kuvuka ibirego bitandukanye birimo no kuba yari yaramunzwe na ruswa.

Imitungo ye mu Bufaransa iri mu yagaragajwe nk’umusaruro wa ruswa n’ibindi byaha yijanditsemo akiri ku buyobozi byanatumye amakonti ye amwe n’amwe yo muri Banki zo mu Bufaransa afatirwa.

Mu 2016, inzu zari iz’umuhungu we Ali Bongo na zo zarafatiriwe, imwe ikaba iri i Nice mu gihe indi iri i Paris mu Murwa Mukuru nk’uko bitangazwa na Le Parsien.

Abana bane ba Omar Bongo bakurikiranyweho ibyaha bya ruswa n’Abashinjacyaha bo mu Bufaransa, ariko bo ibyo byaha barabihakana.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA