Sudani: Hafi 75% z’imfu z’abasivile zatewe n’indege zitagira abapilote – ONU
Mu Mahanga

Sudani: Hafi 75% z’imfu z’abasivile zatewe n’indege zitagira abapilote – ONU

NYIRANEZA JUDITH

November 17, 2026

Ishami ry’Umuryango w’Abibumbye (ONU/ Loni), ryatangaje ko imfu z’abasivile muri Sudani ahanini zatewe n’indege zitagira abapilote (drones) ku kigero hafi cya 75% muri uyu mwaka.

Bikubiye muri raporo yasohowe kurI uyu wa 17 Ugushyingo 2026 n’Ibiro by’Ishami ry’Umuryango w’Abibumbye ryita ku Burenganzira bwa Muntu, aho gatagaragaje ko mu basivili 2 230 bishwe hagati y’intangiriro za Mutarama n’impera z’Ukwakira 2026, abarenga 1 630 bishwe mu bitero by’indege zitagira abapilote, ibintu byarenze ikoreshwa ry’andi mayeri n’intwaro nk’uko byatangajwe na Loni.

Nk’uko byatangajwe na Radiyo Mpuzamahanga y’Abafaransa, ngo ni ikibazo giteye impungenge gikomeje, kuko intambara muri Sudani ikomeje ku muvuduko udasanzwe, kubera intambara ikomeye ihanganishije ingabo zisanzwe za Gen. Abdel Fattah al-Burhan n’uwahoze ari inshuti ye Gen. Mohamed Hamdan Dogolo “Hemedti,” n’ingabo ze, RSF kuva muri Mata 2023, aho hafi ¾ by’impfu z’abasivili mu 2026 zifitanye isano n’ibitero by’indege zitagira abapilote.

Ibiro by’Ishami ry’Umuryango w’Abibumbye ryita ku Burenganzira bwa Muntu (HCHR), ariko, byashimangiye ko umubare w’abasivili baguye mu ntambara mu mezi ashize ushobora kuba uri hejuru.

Abakozi b’inzego z’ubutabazi bavuga ko intambara hagati y’ingabo za Sudani n’abasilikare bigometse ku butegetsi yahitanye abantu barenga 200 000 muri rusange, kandi Loni igatangaza ko iyo ntambara yanateje ikibazo gikomeye ku Isi.

Uko intambara yagiye ikomera, impande zombi zakoresheje indege zitagira abapilote zishobora kurasa ku ntego, ntizihushe mu bilometero amagana kandi ntibibangamire abarwanyi bazo.

Muri raporo ivuga yerekeranye n’uburenganzira bwa muntu muri Sudani, Ibiro by’Ishami ry’Umuryango w’Abibumbye ryita ku Burenganzira bwa Muntu (byagaragaje ko amezi atandatu ya mbere y’umwaka yaranzwe n’ubwiyongere bukaze bw’ibitero by’indege zitagira abapilote ku basivili n’imitungo yabo nka kimwe mu bintu by’ingenzi biranga iyo ntambara.

Raporo ya HCHR yagaragaje ko intambara igeze mu mwaka wayo wa kane, impande zombi zakomeje kubona inkunga y’intwaro byatumye impande zishobora gukomeza kurwana, kuko intambara yakomeje.

Abasivili bo mu gace ka Kordofan (mu majyepfo ya Sudani) barenga2/3 by’abasivili baguye mu ntambara, bagakurikirwa n’abo muri Darfur (mu burengerazuba bwa Sudani).

Komiseri Mukuru w’Umuryango w’Abibumbye ushinzwe Uburenganzira bwa Muntu, Volker Türk, yasoje agira ati: “Ibyavuye muri raporo yacu bitanga ibindi bimenyetso […] by’imibabaro y’abasivili idashira, yatewe n’intambara yo muri Sudani, ndetse n’uko impande zirwana zikomeje kwirengagiza amategeko y’intambara.”

Intambara muri Sudani yatangiye mu 2023 itewe no gushyamirana kw’abasirikare bakuru babiri, hagati y’ingabo z’igihugu cya Sudani (SAF) ziyobowe na Gen. Abdel Fattah al-Burhan n’umutwe w’abarwanyi b’abasirikare badasanzwe (RSF) uyobowe na Gen.Mohamed Hamdan Dagalo, uzwi cyane nka Hemedti. Impande zombi ntizemeranyije guhuza imitwe y’ingabo, habayeho gushaka kwiharira ubutegetsi n’ubutunzi no kutubahiriza amasezerano y’amahoro n’ay’inzibacyuho.

Ba uwa mbere mu kumenya amakuru agezweho!!!

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA