Televiziyo y’imiziki ya Trace izizihiriza isabukuru y’imyaka 20 mu Rwanda
Amakuru

Televiziyo y’imiziki ya Trace izizihiriza isabukuru y’imyaka 20 mu Rwanda

NTAWITONDA JEAN CLAUDE

June 1, 2023

Hagati y’italiki ya 20 n’iya 21 Ukwakira 2023, u Rwanda ruzakira ibirori bidasanzwe bya Televiziyo ya Trace yamamaye mu gususurutsa abatuye Isi binyuze mu miziki yerekana imico y’abanyamujyi.

Ni ibirori bizaba mu gihe iyo Televiziyo izaba yizihiza isabukuru y’imyaka 20 imaze ibayeho, bikazajyana n’ibirori byo gutanga ibihembo bizwi nka “Trace Awards & Festival” mu kwishimira ubuhanga bw’abahanzi ndetse no kwigirira icyizere mu kwamamaza umuziki nyafurika mu ruhando mpuzamahanga. 

Ibyo birori birimo gutegurwa ku bufatanye bwa Trace, Visit Rwanda na QA Avenue Solutions Rwanda icunga BK Arena, aho bizibanda ku banyamuziki, abahanzi na ba rwiyemezamirimo bubatse  izina rikomeye ku Isi mu ruganda rwa muzika baba abo muri Afurika ndetse n’abo muri Diaspora Nyafurika.

Ibyo birori bizaba bigizwe n’amasaha 3 y’imiziki idahagarara izerekanwa imbonankubone kuri televiziyo ku wa 21 Ukwakira. Ayo masaha azabanziriza ibirori by’umuco by’iminsi ibiri bigamije gususurutsa abafana no gushyigikira abahanzi n’abafana babo. 

Ibyo birori bizataramamo abahanzi b’ibyamamare nyafurika cyangwa bafite inkomoko kuri uyu mugabane, bamaze kwigarurira imitima ya benshi ku Isi. 

Ibyo birori bizitabirwa n’abarenga 7,500 barimo abahanzi, abafana b’imena, abavuga rikijyana, abahanzi b’imideli, n’abandi banyacyubahiro baturutse mu bice bitandukanye by’Afurika no ku Isi yose.

Biteganyijwe ko ibihembo bizahabwa abaririmba injyana z’ubwoko butandukanye uhereye kuri Afrobeat ukageza kuri Dancehall, Afro-pop, Mbalax, Amapiano, Zouk, Kizomba, Genge, Coupé Décalé, Bongo Flava, Soukous, Gospel, Rap, Kompa, R&B na  Rumba. 

Kuri uwo munsi hazashimwa muri rusange umurava w’abahanzi bose baturuka mu mico n’imibereho yo mu byiciro bitandukanye.

Umuyobozi Mukuru wa Trace Olivier Laouchez, yavuze ko kuva iyi televiziyo yavuka mu 2003 yateje imbere ndetse inagaragaza uruhererekane rw’imico yo mu mijyi y’Afurika n’ahandi ku Isi. 

Ati: “Nta bundi buryo bwaruta ubu twari kubona bwo kwizihiza isabukuru yacu y’imyaka 20 twishimira intambwe ikomeye y’iki kigo gitangaza imiziki mishya n’imico itandukanye.”

Yakomeje agaragaza ko ibihembo bya Trace Awards ari yo nzira bahisemo yo kwishimira ibihangano, icyerekezo n’uruhare rw’abahanzi n’abandi bayobozi bakora mu rwego rw’umuco. 

Umuyobozi Mukuru w’Ikigo cy’Igihugu gishinzwe guteza imbere Ubukerarugendo bushingiye ku Nama (RCB) Janet Karemera, yavuze ko u Rwanda rwishimiye kwakira ibyo birori byimakaza umuco w’Afurika byitezwe mu mezi make ari imbere. 

Yanavuze kandi ko bizagira uruhare rukomeye mu kugaragaza u Rwanda nk’icyerekezo cy’ubukerarugendo bushingiye ku muco rukaba n’inararibonye mu kwakira inama n’ibindi bikorwa mpuzamahanga. 

Yagize ati: “Hejuru y’ibyo, kwakira ibyo birori bizatanga urubuga rwagutse ku rwego rwacu rw’ubuhanzi mu kugaragaza udushya, impano n’umurage ukungahaye w’umuco nyarwanda.”

Ibyo bikorwa bizabera i Kigali bizabamo n’ibindi birori bishamikiyeho, urugendoshuri ndetse no kwerekana ibiri kubera mu Rwanda mu bice bitandukanye by’Afurika, i Burayi, Leta Zunze Ubumwe z’Amerika (USA), u Bwongereza, Brazil, Inyanja y’u Buhinde na Carayibe. 

Biteganyijwe ko ibyo birori bizerekanwa mu bihugu birenga 180 byo ku Isi, aho itangwa ry’ibihembo rizanagaragazwa kuri televiziyo zinyuranye zisanzwe no ku miyoboro y’abafatanyabikorwa bakoresha imirongo y’ibyogajuru.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA