Umuhanzi The Ben yagaragaje ko izina Rugwiro yiswe na Bruce Melodie ntacyo rimutwaye mu gihe abakunzi b’umuziki bari batangiye kubifata nko kongera kubyutsa impaka no gutangiza guterana ubuse bitajya bibura hagati y’aba bahanzi bombi bafatwa nk’aba mbere mu Gihugu.

Ibi byaturutse ku mashusho Bruce Melodie yashyize ku rukuta rwe rwa Instagram ku mugoroba w’ejo ku wa 29 Kamena 2026, agaragaza ubwo The Ben yagwaga ku rubyiniro mu Karere ka Bugesera ubwo yaririmbaga mu gitaramo cya Summer Country Tour bahuriyemo na Kitoko ku wa 27 Kamena 2026, ndetse n’igihe Alex Muyoboke yagwaga ubwo habaga ikiganiro n’itangazamakuru gitegura igitaramo cya The Nu Year Groove cyabaye ku ya 1 Mutarama uyu mwaka, yahuriyemo na Bruce Melodie maze abita “Rugwiro” na “Mugwaneza”.

The Ben atazuyaje yashyize hanze amashusho kuri instagram ye yandikaho ati “Rubavu…Rugwiro araje. Abazaniye urugwiro ngo twese tugwirirane…” ibyatumye abakunzi babo banyurwa n’uburyo The Ben yabyitwayemo bakomeza kugenda bamugaragaza nk’umuhanzi ugira umutima mwiza.

Aba bahanzi bombi bamaze igihe bihariye amakuru y’imyidagaduro by’umwihariko umuziki nyarwanda, bari guhurira kandi ku rubyiniro mu bitaramo bizenguruka Igihugu bya ‘Summer Country Tour’ bya Bruce Melodie, The Ben na Kitoko na Bwiza, bamugaragiye.

Ibi bitaramo byaje nyuma yuko Bruce Melodie na we yagaragiye The Ben mu gitaramo cya ‘The Nu Year Groove’ kiba ku ya 1 Mutarama buri mwaka.

Ba uwa mbere mu kumenya amakuru agezweho!!!