TotalEnergies izobereye mu by’ingufu igiye gushora imari mu Rwanda
Imibereho

TotalEnergies izobereye mu by’ingufu igiye gushora imari mu Rwanda

NTAWITONDA JEAN CLAUDE

January 30, 2022

TotalEnergies ni ikigo mpuzamahanga gikomoka mu Bufaransa, kimaze kwagura ibikorwa byacyo bijyanye n’uruhererekane rw’ingufu mu bihugu birenga 130 ku Isi kuva aho cyashingiwe mu mwaka wa 1924.

Kuri ubu icyo kigo cyamaze gusinyana amasezerano y’ubufatanye na Leta y’u Rwanda, abaye umusingi wo kwagura imikoranire mu nzego zitandukanye zijyanye n’uruhererekane rw’ingufu, uhereye ku bijyanye na Peteroli, Gazi, amashanyarazi, kubyaza umusaruro ingufu zisubira n’izindi zitangiza zirimo n’izikomoka ku bimera.

Ayo makuru atangajwe nyuma y’aho kuri iki Cyumweru taliki ya 30 Mutarama 2022, ubwo Perezida wa Repubulika y’u Rwanda Paul Kagame yakiriraga Umuyobozi Mukuru wa TotalEnergies Patrick Pouyanné muri Village Urugiro bakagirana ibiganiro.

Nyuma y’ibyo biganiro ni bwo hasinywe amasezerano y’ubufatanye hagati y’ubuyobozi bw’Urwego rw’Iterambere mu Rwanda (RDB) ndetse n’ubuyobozi bwa TotalEnergies, abaye umusingi wo kwagura ubufatanye mu nzego zitandukanye icyo kigo gikoramo ishoramari.

Biteganyijwe ko TotalEnergies izagira uruhare rukomeye mu iterambere ry’urwego rw’ingufu mu Rwanda, by’umwihariko yimakaza ingufu zitangiza, ziganisha igihugu mu Cyerekezo 2050 aho u Rwanda ruzaba mu bihugu byeteye imbere kandi byubatse ubukungu butangiza ibidukikije.

Indi nyungu ikomeye ni uko icyo kigo kizaha akazi Abanyarwanda benshi nk’uko kibigenza mu Bufaransa n’ahandi hose gikorera mu bihugu bitandukanye birimo n’ibyo muri Afurika mu Karere u Rwanda ruherereyemo.

Iki kigo cyatangiye cyitwa Total gishora imari mu bucuruzi bwa Peteroli na Gazi gusa, ariko taliki ya 28 Gicurasi 2021 cyahinduye izina cyitwa TotalEnergies mu rwego rwo kwagura imikorere no mu zindi nzego z’ingufu zitangiza ibidukikije ari na zo zijyanye n’Intego z’Iterambere Rirambye (SDGs) zigamije guhangana n’imihindagurikire y’ikirere.

TotalEnergies ni cyo kigo mpuzamahanga gishora imari mu by’ingufu gisigaye mu ishoramari ryo mu bihugu byo mu Karere k’Afurika y’Iburasirazuba n’Amajyepfo, by’umwihariko muri Kenya aho cgitanga serivisi zitandukanye mu rwego rwa Peteroli na Gazi. Bivugwa ko ari n’umwe mu banyamigabane mu ishyirwa mu bikorwa ry’umushinga wa “Turkana” ujyanye no gucukura Peteroli mu Majyaruguru ya Kenya.

Iki kigo ni na cyo kigaragara cyane ku isoko rya Uganda aho kigira uruhare mu itegurwa n’ishyirwa mu bikorwa ry’imishinga ya Peteroli igera muri icyo gihugu inyuze mu miyoboro ituruka muri Tanzania.

Iki kigo kandi gifite ishoramari rikomeye muri Mozambique mu bijyanye no kubyaza umusaruro umutungo kamere wa gazi mu mushinga cyashoyemo akayabo ka miliyari 20 z’amadolari y’Amerika.

Ibi bishyira TotalEnergies mu mwanya ukomeye cyane wo gukorera mu Karere ndetse no mu bihugu bitandukanye by’Afurika mu kwihutisha imishinga ibiganisha ku ntego yo kugera ku gukoresha ingufu zizewe kandi zitangiza ibidukikije, harimo izituruka ku muyaga, ku Izuba, mu mashyuza, amazi ndetse na gazi.

Ibyo kandi bizajyana n’uko amahirwe yo kubona byoroshye ibikomoka kuri Peteroli mu gihe bigenda bisimbuzwa ingufu zitangiza nubwo ibikomoka kuri Peteroli bizakomeza no gukenerwa mu nganda zikoresha ibinyabutabire bibonekamo.

Guhangana n’imihindagurikire y’ikirere no kwimukira ku ngufu zitangiza ruzagendwa ku muvuduko utandukanye, ariko iki Kigo kibonwa nka moteri ku rugendo rwatangiye by’umwihariko mu Rwanda rwiyemeje kugabanya nibura 38% by’ibyuka bihumanya ikirere bitarenze mu mwaka wa 2030.

Impuguke mu by’ubukungu muri Afurika zirashimira TotalEnergies kuba ari cyo kigo mpuzamahanga gishora imari mu by’ingufu cyasigaye ku mugabane mu gihe isoko ryaho ryari ritangiye guhungabana.

Hari icyizere ko iki kigo kizabona umusaruro ukomeye cyane mu rugendo rw’ishyirwa mu bikorwa ry’Isoko Rusange ry’Afurika (AfCFTA) kuko kizaba kibona inyungu zose zijyana na ryo.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA