TWIS, ikoranabuhanga ritoza abana b’u Rwanda umuco wo gusoma
Amakuru

TWIS, ikoranabuhanga ritoza abana b’u Rwanda umuco wo gusoma

NTAWITONDA JEAN CLAUDE

August 12, 2022

Abana b’iki kinyejana cya 21 cyiswe icy’ikoranabuhanga mu isakazamakuru, batandukanye n’ab’ibindi binyejana byabanje kuko bavukira muri iryo koranabuhanga rikababera ubuzima bwabo bwa buri munsi, aho ubumenyi ababyeyi babo bagiraga bakuze bubasanga bakiri ku ibere.

Nyuma yo kwiga kuvuga no kugenda, ubundi buhanga umwana akenera mbere y’ubundi bwose ni ugusoma kuko bimufasha kunguka vuba ubundi bumenyi bw’ingeri zinyuranye. Umwana uvutse ababyeyi be bakoresha telefoni, mudasobwa, televiziyo, tablet n’ibindi, agera ku myaka 5 na we azi kubikoresha.

Ni muri urwo rwego, Ikigo TWIS Ltd cyashinzwe n’urubyiruko rw’u Rwanda mu mwaka wa 2020, cyihariye ku ikoranabuhanga rifasha abana kumenya gusoma byihuse binyuze mu nkuru z’Ikinyarwanda zijyanye n’imyaka ndetse n’ikigero cyo gusoma bagezemo. 

Ni ikoranabuhanga ryatangijwe na Ingabo Cliff Richard, abifashijwemo n’urundi rubyiruko rurimo uruzobereye mu by’ikoranabuhanga rigezweho. Kuva ryatangira mu myaka igera kuri ibiri ishize, rimaze kwifashishwa n’abana basaga 5000 bari mu Rwanda no muri Diaspora.

Mu kiganiro Imvaho Nshya yagiranye na Ingabo Cliff Richard, yagaragaje ko iryo koranabuhanga ryatangiye ari urubuga (web) ababyeyi bafasha abana gusura bakahasanga ibitabo bitandukanye by’inkuru ziri mu rurimi rw’Ikinyarwanda, aho umwana asoma hanyuma agahabwa n’isuzumabumenyi.

Avuga ko iyo wa mwana amaze gusoma no gukora isuzumabumenyi, amakuru y’ikigero agezeho ahabwa umubyeyi n’umwarimu umukurikirana kugira ngo bamenye aho afite ikibazo mu gusoma maze bakarushaho kunoza uburyo bamufashamo.

Yagize ati: “Abana twibandaho ni abari hagati y’imyaka 5 na 12 bashobora kwisomera, gusa nanone dufite n’ibindi bitabo by’abadashobora kwisomera aho umubyeyi ashobora gusomera umwana we. Ntangira TWIS ni cyo nashakaga gukora, nabonaga abana batazi gusoma kandi biga mu wa kabiri w’amashuri abanza nkumva ni ibintu bidakwiye kubaho.”

Ikoranabuhanga rigenewe abana bataramenya gusoma n’abafite hagati y’imyaka 5 na 12 bazi kwisomera

Yakomeje agira ati: “Dufate urugero ko umwana w’imyaka itandatu akwiye gusoma amagambo atandatu ku munota, tumuha igitabo gifite amagambo 500 hanyuma ikoranabuhanga ryacu rikamenya ngo umwana asomye icyo gitabo mu minota ingahe bityo tukamenya amagambo asoma ku munota. Ibyo bituma tumenya ngo uyu mwana afite ikibazo ahangaha, ntabwo arimo kwihuta mu gusoma.”

Mu cyumweru gishize, Ingabo na bagenzi be batangije Application nshya ijya muri telefoni cyangwa tablets z’Android, ifasha abana gusomera bya bitabo ku ikoranabuhanga n’igihe badafite internet.

Iryo koranabuhanga ritanga icyizere kuko ubushakashatsi bugaragaza ko abana bakururwa cyane n’ibyo babona kuri telefoni, mudasobwa na tablets cyangwa televiziyo, kurusha ibyo basanga mu bitabo, nubwo hari n’impungenge z’uko ababyeyi batabakurikiraniye hafi bashobora kurangazwa n’amashusho, imikino n’ibindi basanga kuri iryo koranabuhanga.

Umwana utamenye gusoma kare, imyigire ye iramugora

Bamwe mu batangiye gukoresha iri koranabuhanga rya TWIS bavuga ko ryabaruhuye kuko rituma umwana agera ku bitabo byinshi n’inkuru zimworohereza gusoma igihe amaze kumenya kwisomera, ndetse hakaba n’inkuru zisomerwa abana bataramenya kwisomera ariko bakunda gusomerwa.

Bavuga ko uretse kubakundisha gusoma kandi bikababangukira, bituma barushaho kumenyera gukoresha ikoranabuhanga kuri ubu riyoboye icyerekezo cy’imibereho n’ubukungu bw’Isi.

Ubwo hatangizwaga ‘application’ ya telefoni izajya yorohereza abantu gukoresha iryo koranabuhanga rya TWIS n’igihe badafite ‘internet’, Umunyamabanga wa Leta muri Minisiteri y’Uburezi Ushinzwe Ikoranabuhanga, Imyuga n’Ubumenyi Ngiro Claudette Irere, yakunze ako gashya kaziye igihe mu guteza imbere umuco wo gusoma binyuze mu nkuru ziri mu rurimi rw’Ikinyarwanda.

Yagize ati: “Ndabikunze, nkunze iki gitekerezo ko inkuru ziri mu rurimi rwacu kandi zikozwe mu buryo bwacu zitakiri mu bitabo gusa, ahubwo ziboneka no ku ikoranabuhanga.”

TWIS yatangiye ari igitekerezo cy’umuntu umwe, kuri ubu ifite abakozi 17 harimo abandika inkuru, abazishushanya, abafotora, harimo abakora ibirebana n’ubucuruzi no gushaka amasoko, n’abandika ‘code’ z’ikoranabunanga.

Ku ikoranabuhanga ry’Application ryamuritswe mu cyumweru gishize, ababyeyi bazajya basabwa kwiyandikisha, ndetse bafate ifatabuguzi rya buri kwezi rihera ku mafaranga y’u Rwanda 2 000. Byitezwe ko uyu mwaka uzarangira, hamaze kuboneka abafatabuguzi basaga 3 000 biyongera ku basanzwe bakoreshaga urubuga ku buntu. 

Ingabo Cliff Richard asobanurira Claudette Irere imikorere y’ikoranabuhanga rya TWIS

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA