U Bushinwa: Boeing-737 yari itwaye abantu 132 yakoze impanuka
Amakuru

U Bushinwa: Boeing-737 yari itwaye abantu 132 yakoze impanuka

NTAWITONDA JEAN CLAUDE

March 21, 2022

Indege ya sosiyete China Eastern Airlines yakoze impanuka kuri uyu wa Mbere taliki 21 Werurwe, mu majyepfo y’uburengerazuba bw’u Bushinwa.

Kugeza ubu nta mubare w’abantu uratangazwa ku bijyanye n’iyo mpanuka, ariko abantu 132 bari muri iyo Boeing-737.

Boeing-737 yakoreye impanuka hafi y’Umujyi wa Wuzhou mu gace ka Guangxi. Umuyoboro wa televiziyo ya CCTV wongeyeho ko iyi mpanuka yateje inkongi y’umuriro ku musozi kandi ko itsinda ry’abatabazi ryerekeje ahabereye impanuka.

Umuyobozi mu ishami rishinzwe kubungabunga umutungo w’amazi mu ntara ya Teng, Madame Lu yatangarije RFI ko hatangiye ibikorwa by’ubutabazi. 

Ati: “Buri sosiyete n’ikigo byahamagaye abasirikare b’abakorerabushake bazobereye, bahawe amahugurwa yo kurengera abaturage, bagomba kujya aho impanuka yabereye. Ishami ryacu, twahuje abantu bagera kuri makumyabiri. Tumaze kubona integuza, ku bukangurambaga.”

Amashusho atembera ku miyoboro ya Sina Weibo yoherejwe n’abaturage baturanye, nk’uko byatangajwe n’umunyamakuru wa RFI i Beijing, Stéphane Lagarde, ngo ni uko babonye umwotsi wera mwinshi ugaragara hejuru y’umusozi uriho ishyamba mu ntara ya Teng hafi y’Umujyi wa Wuzhou.

Boeing 737 yari ihagurutse Kunming mu ntara ya Yunnan yerekeje  Cantonku bilometero 1,300.

Ubwoko bw’indege, 737-800, ni yo yabanjirije 737 MAX, moderi yabujijwe kuguruka imyaka irenga itatu mu Bushinwa nyuma y’impanuka ebyiri zahitanye abantu muri Indonésie mu 2018 no muri Éthiopie muri 2019.

Nk’uko bitangazwa n’ibinyamakuru byaho mu Bushinwa, Indege yanditseho B1791 imaze imyaka 6, yahagurutse ahagana mu saa saba n’iminota 10. Nyuma y’iminota 50 indege ntiyongeye kugaragara mu byuma biyobora indege (radar) nkuko byatangajwe na Televiziyo Nkuru y’u Bushinwa.

Nk’uko byatangajwe n’ubuyobozi bushinzwe indege za gisivili mu Bushinwa, CAAC, bari abantu 132, abagenzi 123 n’abakozi 9, ubwo indege MU5735 yagwaga hejuru y’imisozi. Umukozi ushinzwe ubutabazi watangajwe n’ibitangazamakuru byo mu Bushinwa yavuze ko indege yasenyutse rwose.

Perezida w’u Bushinwa, Xi Jinping, yatangaje ko “yatunguwe” anasaba “kumenya icyateye iyi mpanuka vuba”. China Eastern Airlines ntabwo iratanga ibisobanuro.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA