U Rwanda na Ghana bigiye gufatanya mu mutekano n’ubutasi bwa Gisirikare
Amakuru

U Rwanda na Ghana bigiye gufatanya mu mutekano n’ubutasi bwa Gisirikare

NTAWITONDA JEAN CLAUDE

July 6, 2022

Ubuyobozi bw’inzego zishinzwe umutekano mu Gihugu cya Ghana bwemeje gukomeza gufatanya n’inzego z’umutekano z’u Rwanda mu kurushaho kunoza ubufatanye n’ubutwererane mu bya gisirikare no kubungabunga umutekano binyuze mu bufatanye bw’inzego z’ubutasi.

Byagarutsweho mu kiganiro cyahuje itsinda ry’abayobozi bakuru b’urwego rw’umutekano mu gihugu cya Ghana n’ubuyobozi bw’Ingabo z’u Rwanda ku wa Kabiri taliki ya 5 Nyakanga 2022.

Uwo munsi ni bwo iryo tsinda ry’intumwa za Ghana riyobowe n’Umuhuzabikorwa w’inzego z’umutekano muri Minisiteri y’Umutekano w’Igihugu wa Repubulika ya Ghana Amb. Maj. Gen. Francis Adu Amanfo, ryasuye Icyicaro Gikuru cy’Ingabo z’u Rwanda (RDF) ku Kimihurura mu Mujyi wa Kigali.

Muri iryo tsinda harimo kandi Umugaba w’Ingabo za Ghana Vice Admiral Seth Amoama, waje aherekejwe n’Umuyobozi Mukuru ukuriye ubutasi bwa Gisirikare wakiriwe n’Umugaba Mukuru w’Ingabo z’u Rwanda Gen Jean Bosco Kazura.

Iryo tsinda ryageze ku cyicaro gikuru cya RDF, riherekejwe n’Umunyamabanga Mukuru w’Urwego rw’Igihugu Rushinzwe Iperereza n’Umutekano (NISS) Maj Gen Joseph Nzabamwita.

Abahagarariye inzego z’igisirikare cy’u Rwanda n’iz’icya Ghana ni bwo bagiranye ibiganiro byibanze ku kwimakaza ubutwererane bw’ibihugu byombi mu bya Gisirikare n’umutekano.

Bamaze gusura icyicaro Gikuru cya RDF, Maj Gen (Rtd) Amanfo yavuze ko yanyuzwe n’ibyo biganiro, by’umwihariko ibigamije kwimakaza ubufatanye bw’umutekano n’ubutasi hagati y’ibihugu byombi.

Vice Admiral Seth Amoama n’itsinda ryari rimuherekeje basuye Urwibutso rwa Jenosie rwa Kigali bunamira inzirakarengane zishwe muri Jenoside yakorewe Abatutsi bakurikizaho gusura Ingoro Ndangamurage y’Urugamba rwo guhagarika Jenoside.  

U Rwanda na Ghana bisanzwe bifitanye umubano ukomeye mu butwererane na Dipolomasi. U Rwanda rwafunguye Ambasade yayo ya mbere muri icyo gihugu guhera mu mwaka wa 2019, ariko mbere y’uko ifungurwa hari hashize umwaka ibihugu byombi bisinyanye amasezerano yo kwagura serivisi z’ubwikorezi buhuza ibihugu byombi.

Kuri ubu Sosiyete nyarwanda RwandAir ikora ingendo zerekeza i Accra buri gatatu mu cyumweru. Ibihugu byombi bikomeje gukora inyigo ku mahirwe atandukanye y’ubufatanye mu iterambere ry’ubukerrarugendo n’uburezi, ishoramari n’izindi nzego.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA