U Rwanda na Slovakia byatangiye ubufatanye mu bucuruzi n’ishoramari
Amakuru

U Rwanda na Slovakia byatangiye ubufatanye mu bucuruzi n’ishoramari

NTAWITONDA JEAN CLAUDE

May 16, 2022

Guhera kuri uyu wa Mbere taliki ya 16 kugeza ku wa 17 Gicurasi 2022, mu Mujyi wa Kigali hateraniye inama ihuza abashoramari baturutse muri Slovakia na bagenzi babo bo mu Rwanda barimo kwigira hamwe ubufatanye bagomba kugirana mu guteza imbere ubuhahirane bw’ibihugu byombi mu bucuruzi n’ishoramari.

Abacuruzi 30 bahagarariye ibigo bikabakaba 20 ni bo bagize itsinda ryaturutse muri Slovakia, rikaba riteganya kumara iminsi ine mu Rwanda ari na ko rirushaho kugenzura no gusobanukirwa byinshi ku mahirwe y’ubucuruzi n’ishoramari biboneka mu Rwanda.

Ubuyobozi bw’Urwego rw’Igihugu rw’Iterambere (RDB) buvuga ko iryo tsinda ry’intumwa za Slovakia ryaje kwihera ijisho no gusobanuza byinshi ku mahirwe y’ishoramari n’ubucuruzi biboneka mu Rwanda.

Diane Sayinzoga ushinzwe Ishami ryo muri RDB rishinzwe Icyanya Cyahariwe Inganda (SEZ) no korohereza abashoramari, yagize ati: “Baje ari itsinda ry’abantu barenga 30, ahanini amahirwe twabagaragarije basanga hano mu gihugu icya mbere ari mu rwego rw’ubuzima, hari n’abandi bifuza gushora imari mu rwego rw’uburezi ndetse n’ibijyanye n’ingufu.”

Yakomeje agira ati: “Ariko na twe ku rundi ruhande ibyo na twe dufite bifuza cyane cyane harimo ibikomoka ku buhinzi nk’ikawa n’icyayi byose ni byo natwe dushobora kuba twacuruza muri Slovakia.”

Yavuze ko  abacuruzi bo mu Rwanda ndetse n’abaturutse muri Slovakia batangiye ibiganiro by’iminsi ibiri kuri uyu wa Mbere biri kubera i Kigali, bikaba byitezwemo umusaruro ushimishije ugamije kwagura amahirwe y’imikoranire n’ubufatanye hagati y’ibigo byo mu bihugu byombi.

Biteganyijwe kandi ko ku munsi w’ejo hazasinywa amasezerano y’ubufatanye bw’ibihugu byombi by’umwihariko mu guteza imbere ubucuruzi n’ishoramari mu rwego rw’ubucuruzi mu birebana n’umusaruro w’ubuhinzi, gutunganya ingufu z’amashanyarazi no mu burezi.

Vuningoma Brian ushinzwe imenyekanishabikorwa ry’ubucuruzi muri Rwanda Farmers Coff Company, Ikigo gikora ikawa yamamaye ku izina rya Gorilla’s Coffee, ni umwe mu bahagarariye ibigo by’ubucuruzi bikorera mu Rwanda byifuza kwagurira isoko ryabyo muri Slovakia.

Mu kiganiro yagiranye n’Imvaho Nshya, Vuningoma yagize ati: “Icyo duteganya ni uko bashobora gukoresha ikawa yacu y’u Rwanda ikunzwe cyane mu mahanga. Twiteze ko dukuramo amahirwe yo guhura n’abantu batandukanye ku buryo no muri Slovakia ikawa yacu yagerayo ikanyobwa.”

Yizera ko Slovakia ishobora kuziyongera ku bihugu 26 bimaze igihe bigezwamo ikawa ya Gorilla Coffee nyuma yo gusinya amasezerano y’ubufatanye ari na wo musaruro nyamukuru w’iyi nama y’iminsi ibiri

Egon Zorad waje ahagarariye intumwa za Slovakia mu Rwanda, akaba akuriye ishami rishinzwe Ishoramari Mpuzamahanga mu Kigo gishinzwe Iterambere ry’Ishoramari n’Ubucuruzi muri Slovakia, yashimangiye ko Inama igamije guhuza abacuruzi b’ibihugu byombi yateguwe mu rwego rwo gushyigikira abohereza ibicuruzwa byabo mu mahanga ku mpande zombi.

Ku ruhande rw’Igihugu cyabo, Egon Zorad yagize ati: “Leta iri kugerageza kubereka amahirwe mashya n’ubutaka bushya bashobora koherezaho ibicuruzwa byabo. U Rwanda ni umufatanyabikorwa mwiza w’ahazaza ni yo mpamvu twaje gukora inama y’ubucuruzi kubera ko ibigo byo muri Slovakia bikeneye kumenya byinshi ku mahirwe atandukanye y’ubucuruzi n’ishoramari biri hano mu Rwanda.”

Aba bashoramari banavuga ko abacuruzi bo mu Rwanda bazageza ibicuruzwa byabo ku isoko ryo muri Slovakia bazaba bafunguriwe amahirwe yagutse yo kuba iki gihugu kibarizwa mu Muryango w’Ubumwe bw’u Burayi (EU).

Slovakia ni igihugu gisanzwe gifitanye umubano mwiza n’u Rwanda, Ambasade yacyo mu Rwanda ikaba ifite icyicaro i Nairobi muri Kenya. By’umwihariko iki gihugu cy’i Burayi kiri mu byagaragarije ubufatanye Leta y’u Rwanda rutanga inkunga ya doze 280,000 zageze mu gihugu mu kwezi kwa Kanama 2021.

Abashoramari bo muri Slovakia bahuye n’abo mu Rwanda baganira ku mahirwe y’imikoranire ahari hagati yabo

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA