U Rwanda na Suwede birishimira imyaka 20 y’ubufatanye mu bushakashatsi
Amakuru

U Rwanda na Suwede birishimira imyaka 20 y’ubufatanye mu bushakashatsi

NTAWITONDA JEAN CLAUDE

July 8, 2022

Umubano w’u Rwanda n’igihugu cya Suwede (Sweden) wubakiye umusingi ku nkunga y’ubutabazi icyo gihugu cyageneye u Rwanda nyuma ya Jenoside yakorewe Abatutsi, ariko ukomeza kwaguka by’umwihariko mu bijyanye n’uburezi, ubushakashatsi, ubucuruzi n’iterambere, siporo n’ubugeni (arts).

Kuva mu mwaka wa 2002 ni bwo Suwede yatangiye ubufatanye n’u Rwanda mu bijyanye no guteza imbere ubushakashatsi. Mu myaka 20 ishize hatangijwe ubufatanye, Ambasade ya Suwede mu Rwanda yishimira umusanzu umaze kuboneka ufite uruhare rukomeye mu iterambere ry’Igihugu.

Johanna Teague, Ambasaderi wa Suwede mu Rwanda, yavuze ko muri iyo myaka ibihugu byombi byabonye umusaruro ushimishije hagati y’ibihugu byombi, aho abakozi bo mu Rwanda boherejwe mu mahugurwa y’ubushakashatsi muri kaminuza 13 zo mu Bwongereza.

Umusaruro wabyo wabaye ko abakozi 85 ba Kaminuza y’u Rwanda babonye impamyabumenyi z’ikirenga (PhD), abari abanyeshuri basaga 300 bakabona impamyabumenyi y’icyiciro cya gatatu cya Kaminuza (Masters) ndetse 30 muri bo bageze kuri PhD bagakomereza ubushakashatsi bwabo mu Busuwisi.

Yagize ati: “Ntewe ishema n’ubufatanye bwacu n’u Rwanda ku buryo budasanzwe, ndetse n’umusanzu bwatanze ku muryango nyarwanda. Ubu turi ku ruhande ruzima aho dushobora kubakiraho tukagera ku yindi ntambwe y’umubano harimo no guhanga imishinga itanga inyungu zirambye ku mpande zombi mu bushakashatsi.”

Ubufatanye bw’u Rwanda na Suwede bumaze gushinga imizi by’umwihariko mu bijyanye na gahunda z’iterambere. Mu ntangiriro z’umwaka wa 2020, Guverinoma ya Suwede yanzuye gutangiza gahunda nshya y’ubutwererane n’u Rwanda mu iterambere yongera ingano y’umusanzu itanga ku kigero cya 40%.

Uretse ubushakashatsi, ubutwererane bwa Suwede n’u Rwanda mu iterambere bwibanda ku guhangana n’imihindagurikire y’ikirere no kubungabunga ibidukikije, kubaka iterambere ry’ubukungu ritagira uwo risigaza inyuma ndetse ihame ry’uburinganie rikaba rihabwa agaciro muri izo nzego zose.

Mu mpera z’ukwezi gushize, Minisiteri y’Imari n’Igenamigambi (MINECOFIN) n’Ambasade ya Suwede mu Rwanda byasinyanye amasezerano yo kongera ubufatanye bw’ibihugu byombi mu bushakashatsi no kubaka ubushobozi ishyirwa mu bikorwa na Kaminuza y’u Rwanda kugeza mu 2026.

Amb. Teague asanga ari ingenzi gukomeza gukorera nk’ibihugu byiyemeje kubaka iterambere rirambye ku bufatanye n’abandi bafatanyabikorwa barimo Umuryango w’Ubumwe bw’u Burayi (EU) n’Umuryango w’Abibumbye (UN).

Ubwo yashyikirizaga Perezida wa Repubulika Paul Kagame impapuro zimwemerera guhagararira u Rwanda mu mpera za 2020, Amb. Teague yiyemeje gushyira imbaraga mu kurushaho kwimakaza ubutwererane bw’ibihugu byombi mu bucuruzi n’ishoramari.

By’umwihariko, yavuze ko inzego z’ingenzi zizakomeza kwibandwaho ari ugushakira hamwe ibisubizo byo kubungabunga ibidukikije, ikoranabuhanga, uburezi no guhanga udushya.  

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA