U Rwanda na UAE byemeje ubufatanye mu guteza imbere AI
Ikoranabuhanga

U Rwanda na UAE byemeje ubufatanye mu guteza imbere AI

NTAWITONDA JEAN CLAUDE

January 19, 2024

Leta y’u Rwanda na Leta Zunze Ubumwe z’Abarabu (UAE) byashyize umukono ku masezerano yimakaza iterambere ry’ikoranabuhanga ry’ubwenge muntu buhangano (Artificial Intelligence/AI), hagamijwe kuziba icyuho hagati y’iryo koranabuhanga n’ubukungu bw’Isi.

Amasezerano yashyizweho umukono ku wa Kane tariki ya 18 Mutarama 2024, mu Nama ngarukamwaka y’Ihuriro Mpuzamahanga ry’Ubukungu (WEF) iteraniye i Davos mu Busuwisi ku nshuro ya 54.

Yashyizweho umukono muri gahunda yatangijwe n’amashami y’Ikigo gishinzwe Impinduramatwara ya Kane mu Bukungu mu Rwanda (C4IR Rwanda) ndetse no muri UAE (C4IR UAE).

C4IR ni ikigo gikorera mu bihugu bitandukanye, kikaba kigira uruhare rukomeye cyane mu kwimakaza iterambere ry’ikoranabuhanga rigezweho nk’irikoresha ubwenge muntu butari karemano, ubumenyi bwa mudasobwa mu guteganya ibizaba, gukoresha no guhererekanya ifaranga ry’ikoranabuhanga (blockchain) n’imitungo ibitswe kuri ryo, ndetse no gusakaza ibikoresho by’ikoranabuhanga bikenera internet (IoT).

Biteganyijwe ko iyo gahunda yatangijwe hagati y’u Rwanda na UAE izakomeza kwiyungaho andi mashami ya C4IR mu bice bitandukanye by’Isi, ikaba izagira uruhare mu guhererekanya ubumenyi n’ubunararibonye hagati y’abakoresha AI ku Isi.

Umuryango w’abakoresha iryo koranabuhanga ry’ubwenge butari karemano ntibazasangira ubunararibonye gusa ahubwo bazanafatanya mu gushaka ibisubizo by’imbogamizi politiki yimakaza iryo koranabuhanga ihura na zo.

Ubwo bufatanye bwitezweho kwihutisha no kuyobora icyerekezo cy’ahazaza ha AI mu bukungu n’imibereho y’abatuye Isi hagamijwe kubaka ibiramba.

Minisitiri w’Ikoranabuhanga na Inovasiyo Ingabire M. Paula, yagaragaje ko u Rwanda rwishimiye kuba mu batangije iyo gahunda y’ubufatanye bwimakaza iterambere ry’ikoranabuhanga ry’ubwenge muntu butari karemano.

Yagize ati: “Tunejejwe cyane no kuba muri gahunda y’ubufatanye na bagenzi bacu ba UAE bwimakaza AI. U Rwanda rwiyemeje kubyaza umusaruro iryo koranabuhanga mu kuyobora no kwihutisha iterambere ridaheza, kwimakaza umuryango w’abarikoresha bashaka ibisubizo by’ingorane duhura na zo muri iki gihe.”

Yakomeje agira ati: “Binyuze mu bufatanye no gusangira ubumenyi n’ubunararibonye, turaharanira kuba intangarugero mu guhanga udushya no guhindura icyerekezo cya AI, tukayigira igikoresho kidaheza kandi cyuje ubunyamwuga gitanga inyungu kuri bose.”

Khalfan Belhoul, Umuyobozi w’Umuryango Dubai Future Foundation, na we yongeyeho ko iyo gahunda y’ubufatanye hagati y’ibigo biharanira impinduramatwara ya kane mu bukungu izagira uruhare mu guhuza umuryango w’abakoresha AI mu gukemura ibibazo iryo koranabuhanga rihura na byo.

Yagize ati: “Bazakorana mu gushyiraho politiki nshya n’amategeko byihutisha iterambere ry’ikoranabuhanga. Iyo gahunda mpuzamahanga izibanda cyane ku guhererekanya ubumenyi binyuze mu mikoranire ya C4IR ku Isi yose.  Izafasha guhuriza hamwe ubumenyi bwungutswe hatunganywa imishinga ya AI ku Isi yose mu kwihutisha iterambere no kurushaho gutanga umusaruro.”

Iyo gahunda kandi izategurirwamo inama zihariye zitandukanye zigamije ku kwigira hamwe imbogamizi n’amahirwe birangwa muri AI.

Ibyo biganiro bizakorwa mu buryo bw’ubushakashatsi, gukoresha sisitemu za AI, no guhanga ibishya, hibandwa cyane ku bunararibonye bwa buri wese utanga umusanzu muri C4IR.

Ubwo buryo buharanira ko buri kiganiro, inama na gahunda z’ubufatanye biba bisubiza ibibazo by’abahuriye muri iyo gahunda.

Biteganyijwe kandi ko hazajya hategurwa amahugurwa ahuriweho mu gushishikariza ibihugu guhanga udushya muri applications za AI, kwimakaza imitekerereze mishya, no gushaka ibisubizo byifashisha ikoranabuhanga rigezweho.

Nanone kandi amahugurwa azafasha kureba ku bunyamwuga, imiterere y’ubuyobozi ndetse na Politiki zitandukanye ziyobora imikoreshereze ya AI.

Ni amahugurwa kandi azafasha mu gushyiraho ingamba butegura politiki mpuzamahanga mu guharanira imikoreshereze n’imikorere ya AI yubahiriza amategeko kandi itagira ibyo yangiza.

Biteganyijwe kandi ko ubwo bufatanye buzagira uruhare mu gutegura imishinga mishya ihindura imibereho y’abatuye Isi binyuze mu guhanga imirimo no kwagura amahirwe yo kugira uruhare mu nama mpuzamahanga ziga ku iterambere rya AI.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA