U Rwanda n’abaturanyi barwo bishimiye ifungurwa ry’imipaka
Amakuru

U Rwanda n’abaturanyi barwo bishimiye ifungurwa ry’imipaka

Imvaho Nshya

March 8, 2022

Ibyishimo byari byose ku baturage bari bagize urujya n’uruza rwa mbere ku mipaka ihuza u Rwanda n’ibihugu by’abaturanyi yari imaze imyaka ibiri ifunzwe kubera icyorezo cya COVID-19. By’umwihariko, byari ibidasanzwe ku baturage bambuka banyuze ku mupaka wa Gatuna wafunzwe guhera mu mwaka wa 2019 mbere y’umwaduko w’iki cyorezo.  

Ku ruhande rw’u Rwanda, ku wa Mbere ahagana saa tanu n’iminota 15 ni bwo ibisi ya mbere itwaye abagenzi 40 yageze ku mupaka wa Gatuna uhuza u Rwanda na Uganda, uherereye mu Karere ka Gicumbi. Uyu mupaka wawi umaze ukwezi ufunguriwe amakamyo atwaye ibicuruzwa guhera ku ya 1 Gashyantare 2022.

Abagenzi baturuka mu Rwanda basabwe kwerekana ko bakingiwe COVID-19 byuzuye kandi ko banipimishije bakoresheje uburyo bwa PCR (biyishyuriye), bikajyana no kugaragaza ibyangombwa birimo n’inzandiko z’inzira.

Nyuma y’igihe bamaze bagenzurwa niba bujuje ibisabwa nk’uko bisanzwe bimenyerewe ku bambuka umupaka, mu masaha ya nyuma ya saa sita iyo bisi yemerewe kwambuka yerekeza i Kampala.

Umuvugizi wa Guverinoma Yolande Makolo yavuze ko mu gihe ibihugu bishyiraho ingamba zitandukanye zo guhangana n’icyorezo cya COVID-19, “u Rwanda rwashyizeho gahunda yo gusuzuma abantu binjira mu Rwanda ikiguzi cy’ibyo bipimo kikishyurwa na Leta.”

Ku mbuga nkoranyambaga hakwirakwijwe amashusho agaragaza uburyo bamwe mu baturage bo ku ruhande rw’u Rwanda bishimiye kubona bisi ya mbere yambuka yerekeza muri Uganda.

Ambasaderi wa Uganda mu Muryango w’Abibumbye Dr. Adonia Ayebare, yavuze ko ibyishimo biri ku mpande zombi, agira ati: “n’abanya-Uganda bishimiye kuza mu Rwanda. Bifitiye inyungu impande zombi.”

Abakora mu rwego rw’ubuzima bagenzuraga ko abakiliya bujuje ibisabwa mbere yo kwambuka bajya muri Uganda (Foto: The New Times)

Ifungurwa ry’imipaka  yose yo ku butaka ihuza u Rwanda n’ibihugu by’abaturanyi, ryaje rikurikira ibyemezo by’Inama y’Abaminisitiri yateranye taliki 4 Werurwe 2022 yashimagiraga  ko iyo mipaka igomba gutangira gukora guhera ku wa Mbere.

Mu myaka ibiri ishize, ababaga bemerewe kunyura kuri iyo mipaka bari Abanyarwanda bagaruka mu gihugu cyabo ndetse n’abatwaye ibicuruzwa byemewe bije mu Rwanda cyangwa byerekeye mu bindi bihugu.  

Abaturage bavuganye n’itangazamakuru bagaragaje ko ari amahirwe akomeye kuba imipaka yongeye gukomorerwa, bakongera kugenderana no guhahirana n’abaturanyi babo. Umwe yagize ati: “Ubuhahirane twari tubukeneye, nkanjye ndi umucuruzi nashakaga imyaka bikangora; ariko izi saha nizeye ko imyaka ntangira kuyibona ku giciro cyiza kandi n’abakiliya bakishima cyane.”

Gusa abagenzi bamwe batunguwe no kumva ko mu gihe baba bava mu Rwanda bagomba kubanza kwerekana ko bipimishijwe mu buryo bwa PCR nk’uko bisabwa abajya mu mahanga mu ndege. Kuri bamwe byabasabye gusubirayo kugira ngo babanze bipimishe mu buryo bujyanye n’amabwiriza yashyizweho na Leta.

Minisitiri w’Ubutegetsi bw’Igihugu Gatabazi Jean Marie Vianney atangaza ko mu byo u Rwanda rurimo kuganiraho n’ibihugu by’abaturanyi harimo kwambuka hakoreshejwe za Jeto.

Yanavuze kandi ko ku mipaka y’u Rwanda n’u Burundi hagitegerejwe icyemezo cy’iki gihugu kugira ngo abajyayo n’abavayo babe bashobora kwambuka.

Bisi yabaye iya mbere itwaye abagenzi bajya muri Uganda yambukiye ku mupaka wa Gatuna (Foto: The New Times)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA