U Rwanda n’Angola byasinye ku masezerano 7 y’ubufatanye
Amakuru

U Rwanda n’Angola byasinye ku masezerano 7 y’ubufatanye

NTAWITONDA JEAN CLAUDE

April 15, 2022

Kuri uyu wa Gatanu, Leta y’u Rwanda n’iya Angola byasinyanye amasezerano y’ubufatanye arindwi mu nzego zirimo ubuzima, uburezi, ingufu, ubutabera, gukuraho gusoresha ibicuruzwa kabiri, iterambere ry’ubuhinzi n’ubworozi n’ubufatanye mu iterambere ry’imiyoborere y’Inzego z’ibanze.

Ni amasezerano yasinywe na Minisitiri w’Ububanyi n’Amahanga n’Ubutwererane w’u Rwanda Dr. Biruta Vincent na Minisitiri w’Ububanyi n’Amahanga w’Angola Ambasaderi Tete Antonio, mu nama ihuje intumwa z’ibihugu byombi zigize Komite ihoraho ishinzwe ishyirwa mu bikorwa ry’amasezerano hagati y’u Rwanda n’Angola.

Iyo nama imaze iminsi ibiri ibera mu Mujyi wa Kigali yagaragarijwemo amahirwe atandukanye agaragara mu bihugu byombi ashobora kubyazwa umusaruro mu bufatanye bw’impande zombi.  

Minisitiri w’Ububanyi n’Amahanga, Dr Vincent Biruta yavuze ko u Rwanda rushima imikoranire myiza rufitanye n’Angola, kandi ibihugu byombi bifite byinshi bihuriyeho birimo ibikorwa byo kubungabunga amahoro hirya no hino ku Isi.

Yavuze ko imikoranire y’u Rwanda n’Angola igomba kwaguka ikagera mu nzego zitandukanye zirimo ubufatanye mu guteza imbere ishoramari, ibikorwa remezo, ingufu n’ubucuruzi.

Yabigarutseho kuri uyu wa Gatanu, aho ibihugu byombi byashyize mukono ku masezerano y’ubufatanye mu nzego zitandukanye.

Muri aya masezerano u Rwanda rwahagarariwe na Minisitiri w’Ububanyi n’Amahanga, Dr Vincent Biruta, mu gihe Angola ihagarariwe na Minisitiri w’Ububanyi n’Amahanga, Antonio Tete.

Minisitiri Tete Antonio avuga ko icyorezo cya COVID-19 cyagaragaje ko ibihugu by’Afurika bikwiye gufatanya birushijeho, bityo ko amasezerano y’ubufatanye hagati y’u Rwanda n’Angola azatanga umusaruro ufatika mu iterambere ry’ibihugu byombi.

Asobanura ko ubufatanye mu guteza imbere inzego zitandukanye nko guteza imbere inganda, ubuzima, uburobyi ari ingenzi ku iterambere ry’ibihugu byombi.

Minisitiri w’Ububanyi n’Amahanga n’Ubutwererare w’u Rwanda Dr. Biruta Vincent

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA