U Rwanda ntirwatunguwe n’urugendo rw’abimukira bava i London rwasubitswe
Amakuru

U Rwanda ntirwatunguwe n’urugendo rw’abimukira bava i London rwasubitswe

NTAWITONDA JEAN CLAUDE

June 16, 2022

Nyuma y’aho urugendo rw’indege yagombaga kugeza icyiciro cya mbere cy’abimukira n’abasaba ubuhungiro baturutse i London rusubitswe ku munota wa nyuma, abatuye mu bice bitandukanye by’Isi batanze ibitekerezo binyuranye, bamwe bakeka ko iyo ari inzira yo guhagarika burundu amasezerano u Rwanda rwagiranye na Leta y’u Bwongereza, abandi bakavuga ko abo bimukira bakomeje kwibuza amahirwe yo kubona ibyo bifuza mu nzira zitagira inkurikizi.

Impuguke mu by’amategeko zemeza ko kuba urwo rugendo rwasubitswe ntaho bihuriye no kuba iyo gahunda yahagarara burundu kandi yubahirije amategeko, ndetse amasezerano yasinywe aha rugari buri wese mu barebwa na yo kuba yagaragaza impungenge afite mu rwego rw’amategeko agafashwa.

Umuvugizi wungirije wa Guverinoma y’u Rwanda Alain Mukuralinda, yasobanuye ko u Rwanda rutigeze rutungurwa no kuba indege yagombaga guhaguruka i London ku ya 14 Kamena yahagaritswe by’agateganyo, kuko inkiko zifite ububasha mu Bwongereza zemerewe kwakira ibirego by’abimukira bashaka kuguma mu Bwongereza igihe baba bagaragaza impamvu zifatika mu rwego rw’amategeko.

Yagize ati: “Oya ntabwo twatunguwe… Twari tuzi neza ko biri mu nkiko, ni na yo mpamvu kiriya cyemezo cyafashwe ari icy’agateganyo. Cyafashwe mu buryo bwihuse kuko umucamanza avuga ati ntagifashe iyi gahunda igashyirwa mu bikorwa kandi urubanza barundegeye, rushobora kuzakomeza mu minsi  iri imbere aba bantu bagiye nshobora kutazongera kubabona.”

Ubujurire bw’umwimukira ukomoka muri Iraq, bwakiriwe n’Urukiko rw’i Burayi ruharanira Uburenganzira bwa Muntu ku munota wa nyuma, ni bwo bwatumye umucamanza atanga igihe kigera ku byumweru bitatu cyo kuba bwasuzumwe.

Binavugwa ko hari n’abandi bimukira batavuzwe umubare bahise batanga ibirego byabo muri urwo rukiko, abahanga mu by’ubuzima bwo mu mutwe bakemeza ko abo bimukira bamenyereye kubaho mu buryo bwo kwirwanaho aho bibagora kugira igikorwa na kimwe bizera kabone n’aho cyaba ari ikibafitiye akamaro.

Bahetuye inzego z’ubucamanza mu Bwongereza zose zisanga icyemezo cya Leta ntaho kinyuranya n’amategeko, ari na  bwo bitabaje urukiko ruhuriwemo n’ibihugu by’i Burayi.  

Mukuralinda yakomeje avuga ko impamvu nyamukuru yatumye hafatwa icyemezo cyihutirwa ari uko urukiko rushobora kuba rwabonye ko rutazongera kugira ububasha bwo gutumiza abatanze ibirego mu gihe rwaba rubakeneye kuko u Rwanda rutari mu bihugu rufiteho ububasha.

Hashize amezi abiri, u Rwanda n’u Bwongereza bishyize umukono ku masezerano

Ati: “Kandi koko ukurikije urwego rw’amategeko, u Rwanda ntabwo turi muri ruriya rukiko. Turamutse tururimo cyangwa turwemera, umucamanza yabareka bakaza kuko yaba avuga ati igihe naba mbakenereye cyose nababona kubera ko mfite ubushobozi ku Rwanda narutegeka rukabagarura. Ariko kubera ko tutarimo aravuga ati bishoboka ko baramutse bagiye, u Rwanda rutabagarura kuko nta bubasha ndufiteho.”

Aho ni ho yahereye yemeza ko u Bwongereza na bwo butungurwa cyangwa ngo bucike intege, ashimangira kandi ko bwatangiye inzira yo gutegura indi ndege izerekeza i Kigali mu bihe bya vuba, mu gihe abajuriye mu rukiko na bo bahawe umwanya wabo wo kwemezwa n’ubutabera.

Yanahamije ko nta mpungenge zihari z’uko urwego rw’ubucamanza rushobora guhagarika amasezerano y’u Rwanda n’u Bwongereza kuko yashyizweho umukono nyuma yo kugenzurwa no gusuzumwa n’impuguke mu by’amategeko ku mpande zombi.

“[…] Uyu munsi ntabwo bavuga ngo hanyuranyijwe n’itegeko runaka ariko iyo ari ikirego cyihutirwa, gahunda iramutse igiye mu bikorwa bitazabasha gusubira inyuma, umucamanza yemerewe kugira amakenga akavuga ati nubwo wenda ntarasobanukirwa n’itegeko bavuga, we ashingira ku itegeko rimuha ububasha akavuga ati ingingo runaka inyemerera kuba nafata icyemezo cyihuse cy’agateganyo nkaba mpagaritse iyi gahunda.”

 Ku munsi w’ejo, Minisitiri w’Intebe w’u Bwongereza yagaragaje akababaro yatewe no kuba bamwe mu banyamategeko bakomeje gushyigikira ibikorwa by’abacuruza abantu bashinze ubucuruzi bukomeye mu mazi y’ahitwa Channel ndetse n’abakoresha imodoka nini bambutsamo abantu.

Ibyo bituma umubare munini w’abinjira mu Bwongereza atari abakwiye kubona ubuhungiro, ahubwo ari abafite ubushobozi bwo kwishyura ayo matsinda abambutsa mu buryo bwa magendu.

Iyo bageze mu Bwongereza bongera umutwaro uremereye kuri Leta, hagakoreshwa imisoro y’abenegihugu yakabaye igira uruhare rw’iterambere ry’Igihugu, bivuze ko Igihugu kigwa mu bihombo bihoraho mu gihe ba rushimusi binjiza agatubutse, kandi ntibabazwa ibyago by’ababurira ubuzima muri izo ngendo zitemewe.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA