U Rwanda n’ubuzima bwo mu mutwe mu myaka 28 nyuma ya Jenoside
Amakuru

U Rwanda n’ubuzima bwo mu mutwe mu myaka 28 nyuma ya Jenoside

NTAWITONDA JEAN CLAUDE

March 8, 2022

Imyaka 28 ishize mu Rwanda yabayemo impinduka nyinshi mu iterambere ry’Abanyarwanda mu nzego z’ibigaragara haba mu buzima bw’inyuma, imibereho myiza, ubukungu, politiki n’ububanyi n’amahanga n’ibindi.

Ubuyobozi bw’Ishami rishinzwe ubuzima bwo mu mutwe mu Kigo cy’Igihugu cy’Ubuzima (RBC), buvuga ko izo mpinduka zitigaragaza gusa mu iterambere ry’ibigaragara inyuma kuko hari n’izabaye mu mu gice cy’imitekerereze y’Abanyarwanda kubera ubufasha bagiye babona bujyanye n’iryo terambere.

Jenoside yakorewe Abatutsi ni cyo gikorwa giteye ubwoba cyabaye mu Rwanda cyahungabanyije abantu kurusha ibindi bishobora kubahungabanya mu buzima bwabo bwa buri munsi.

Iyo Jenoside ikimara guhagarikwa mu 1994, ku bufatanye n’Ishami ry’Umuryango w’Abibumbye ryita ku Bana (UNICEF) Leta y’u Rwanda yahise itangira kwita ku bibazo byo mu mutwe ndetse hanakorwa ubushakashatsi bwagaragaje ko 90% by’Abanyarwanda babonye, bumvise, bagezweho n’ibikorwa birenze ubugome bifite ubushobozi bwo kuba byahungabanya umuntu kandi igihe kirekire.

Ubushakashatsi bwo mu mwaka wa 2018 bwagaragaje ko ibyo bibazo by’ihungabana bifitwe na 3% nk’uko byashimangiwe n’Umuyobozi w’Ishami rishinzwe ubuzima bwo mu mutwe muri RBC Dr. Yvonne Kayiteshonga, mu kiganiro n’abanyamakuru ku wa Mbere.

Dr. Kayiteshonga yavuze ko nubwo Jenoside yakorewe Abatutsi ari yo yateye ihungabana rikomeye mu Rwanda hari impinduka zitandukanye, kuri ubu hatarakorwa ubushakashatsi bwimbitse bugaragaza neza ishusho y’uko ikibazo giteye mu Gihugu.

Gusa hagendewe ku mibare yakirwa kwa muganga ndetse n’uko Abanyarwanda bagenda babona ibisubizo by’ubuzima mu nzego zitandukanye, ari na byo byatanze umusaruro wo kuba abo 90% byashobokaga ko bari guhungabanywa n’ibyo banyuzemo bakomeza ubuzima.

Ati: “Ariko ibyo byose ntabwo byikoze. Igihe cyonyine ntabwo gikiza ihungabana. Ni igihe n’ibisubizo sosiyete ndetse n’ubuyobozi bw’Igihugu bigenda biha ibibazo abaturage bahura na byo.”

Kuri ubu u Rwanda ruha agaciro ubuzima bwo mu mutwe nk’ubundi buzima, ari na yo mpamvu hashyizwe imbaraga mu kunoza serivisi z’ubuvuzi bw’indwara zo mu mutwe n’ibindi bibazo byose byo mu mutwe.  

Leta y’u Rwanda imaze kubona ko ari ikibazo gikomeye, ibyerekeye ubuzima bwo mu mutwe byashyizwe mu by’ibanze kimwe n’ibindi byose. Hagiyeho Politiki y’ubuzima bwo mu mutwe mu mwaka wa 1995 itegeka amavuriro yose y’uko agomba gutanga serivisi z’ubuzima bwo mu mutwe.

Umuyobozi w’Ishami rishinzwe ubuvuzi bw’Indwara zo mu mutwe muri RBC Dr. Iyamuremye Jean Damascène, yongeyeho ko muri icyo gihe hahise hajyaho ikigo cyihariye cyo gufasha abafite ibibazo byo guhungabana.

Yanavuze ko kuri ubu hari serivisi zikorerwa mu miryango mbere y’uko umuntu ajya mu mavuriro ari ahatandukanye mu Gihugu. Abajyanama b’Ubuzima na bo bahuguwe ku byerekeye ubuzima bwo mu mutwe.

Ati: “Mu Rwanda dufite ibigo nderabuzima 512; hafi ya byose bifite nibura abantu babiri bahuguwe mu gufasha abantu bafite ikibazo cyo mu mutwe icyo ari cyo cyose. Muri ibyo bigo nderabuzima habarizwa abavuzi b’inzobere cyangwa se abaforomo bazobereye mu kuvura indwara zo mu mutwe.”

Ku rwego rw’Ibitaro by’Akarere haba hari impuguke mu buzima bwo mu mutwe bikagira n’umuforomo w’impuguke mu kuvura abafite ibibazo byo mu mutwe. Ni na ko bimeze ku bitaro byo ku rwego rw’Intara ndetse no ku rwego rw’Igihugu.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA