U Rwanda rubabazwa n’uko Afurika itumiza ibiribwa yakwibonera
Amakuru

U Rwanda rubabazwa n’uko Afurika itumiza ibiribwa yakwibonera

NTAWITONDA JEAN CLAUDE

March 3, 2022

Umugabane w’Afurika ni wo ufite amahirwe menshi y’ubuhinzi ariko ni na wo ufite ikibazo gikomeye cyane cy’ibiribwa kurusha indi migabane, imibare itangwa n’impuguke mu by’ubukungu ikaba igaragaza ko guhera mu 2019 buri mwaka uyu mugabane utakaza miliyari zisaga 46 z’amadolari y’Amerika mu gutumiza ibiribwa ku yindi migabane.

Impuguke mu by’ubukungu zivuga ko hatagize igikorwa, mu mwaka wa 2030 Afurika yazaba itumiza ibiribwa bifite agaciro ka miliyari zikabakaba 90 z’amadolari y’Amerika.

Minisitiri w’Intebe w’u Rwanda Dr. Ngirente Edouard, yavuze ko ikibabaje ari uko ibicuruzwa Afurika itumiza ku yindi migabane byarushaho kuba byiza kandi bikaba byujuje ubuziranenge biramutse bihinzwe cyangwa bitunganyirijwe ku mugabane w’Afurika.

Minisitiri w’Intebe Dr. Ngirente yagarutse kuri izo mpungenge mu muhango wo gutangiza ku mugaragaro Inama y’Ihuriro Nyafurika ku Iterambere ry’Ubuhinzi muri Afurika (African Green Revolution Forum/AGRF) kuri uyu wa Kane, iyo nama ikaba yitezwe hagati y’italiki 5-9 Nzeri 2022 ku nsanganyamatsiko igira iti: “Grow, Nourish, Reward. Bold Actions for Resilient Food Systems.”

Iyo nsanganyamatsiko ishatse kuvuga ko umuntu uhinze, akita ku bihingwa uko bikwiye abona ibihembo by’ibyo yabibye, ikanashimangira ko hakenewe ingamba zikarishye mu kubaka uruhererekane rw’ibiribwa rutajegajega.

Dr. Ngirente yavuze ko bibabaje kuba Umugabane w’Afurika ugitumiza ibyo biribwa byiganjemo ibyakunda guhingwa no kuhororerwa ubwawo. Yagize ati: “Ikibabaje ni uko ibiribwa bitumizwa nk’inyama z’inka, ingano, isukari, umuceri na soya ari ibiribwa Afurika imaze igihe itumiza mu mahanga kandi bishobora kuba byahingwa bikera ku mugabane w’Afurika haramutse hashyizweho politiki zikwiye.”

Yakomeje ashimangira ko mu gihe ku isoko mpuzamahanga hakenewe ibiribwa byinshi kandi bifite ireme, hakenewe ingamba zidasanzwe mu bihugu byose mu guharanira ko Afurika itanga umusaruro w’ibiribwa ukenewe ku mugabane ne hanze yawo.

U Rwanda rwatangiye kwigobotora ibyo gutega akava imuhana  

Minisitirti w’Intebe yakomeje avuga ko u Rwanda rukomeje urugendo rwo kureka gukomeza kwishingikiriza ku mahanga ruhereye mu kwigobotora gutumiza imbuto z’ibihingwa by’ingenzi birimo ibigori, ingano na soya.

Biyuze muri gahunda ya Guverinoma y’imyaka 7 yo kwihutisha iterambere (NST1), Guverinoma y’u Rwanda yiyemeje guhindura mu buryo bwimbitse ubuhinzi bw’imbere mu Gihugu mu guharanira kugabanya ibiribwa bitumizwa mu mahanga.

Yakomeje agira ati: “Kuri ubu turihagije mu gutunganya imbuto zihagije mu bihingwa by’ingenzi nk’ibigori, ingano na soya binyuze muri gahunda y’Igihugu yo kongera umusaruro. Intego yo guhagarika itumizwa ry’imbuto mu mahanga yagezweho mu ntangiriro z’umwaka wa 2021  nk’uko byari byateguwe.”

Kuri ubu u Rwanda ruhanze amaso kugera nibura 75% by’abahinzi borozi bakoresha imbuto z’indobanure ku butaka buhujwe bitarenze mu mwaka wa 2024, aho kugeza ubu 60% by’abahinzi bakoresha imbuto y’indobanure ku butaka buhujwe.

Yakomeje avuga ko u Rwanda rwimakaje ubufatanye n’abikorera mu guharanira iterambere ry’ubuhinzi n’ubworozi bwifashisha ikoranabuhanga rigezweho. Ishoramari rikomeye ryakozwe muri gahunda zo kuhira ndetse na gahunda zo kongerera umusaruro agaciro.

Leta y’u Rwanda yafatanyije n’abikorera mu guharanira ko abahinzi babona ibikorwa remezo bigezweho byo kwita ku musaruro mu Gihugu hose, bifasha mu kubungabunga umusaruro w’abahinzi no kugabanya ibihombo byaturukaga ku musaruro wangirikaga kubera ibibazo by’ikirere n’imihindagurikire y’ibihe.

Dr. Ngirente yanagarutse ku zindi gahunda u Rwanda rukomeje gushyiramo ingufu mu guharanira kwigira zirimo guteza imbere inganda zongerera agaciro umusaruro, guteza imbere ubushakashatsi n’ikorwa ry’ifumbire ijyanye n’ubutaka n’ibindi.

Minisitiri w’Ubuhinzi n’Ubworozi Dr. Gerardine Mukeshimana, yavuze ko u Rwanda rutewe ishema no kuba ari umufatanyabikorwa w’imena wa AGRF, ashimangira ko rwiyemeje gushyira mu bikorwa Intego z’iri huriro rigamije gukemura imbogamizi zikiri mu buhinzi bw’Afurika.  

AGRF ni ihuriro ryatangiye guhera mu mwaka wa 2010, mu myaka ikabakaba 12 ishize rikaba rirahwema guhuza abayobozi mu nzego za Leta, abahinzi ndetse n’abashoramari bagafatanya mu gushakira hamwe ibisubizo bigamije guharanira iterambere rirambye ry’ubuhinzi muri Afurika.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA