U Rwanda rubimburiye ibihugu by’Afurika kwakira ishami rya C4IR
Amakuru

U Rwanda rubimburiye ibihugu by’Afurika kwakira ishami rya C4IR

NTAWITONDA JEAN CLAUDE

March 31, 2022

Kuri uyu wa Kane taliki ya 31, u Rwanda rwanditse amateka yo kuba igihugu cya mbere cy’Afurika cyakiriye ishami ry’Ikigo gishinzwe Impinduramatwara ya Kane mu Bukungu (C4IR Rwanda) kizagira uruhare rukomeye mu kwifashisha ikoranabuhanga rigezweho mu kwihutisha iterambere kuri bose.

Ishami ry’u Rwanda ribaye irya 16 mu mashami y’iki kigo gikorera mu bihugu bitandukanye kikaba cyaratangijwe n’Ihuriro Mpuzamahanga ry’Ubukungu (WEF) hagamijwe gukoresha neza amahirwe ahari y’ikoranabuhanga rigezweho rigenda rihinduka buri munsi ari na ko ryoroshya ubuzima no guhindura imibereho y’abatuye Isi.

C4IR ni ikigo gisanzwe gikorera mu bihugu bitandukanye, kikaba kigira uruhare rukomeye cyane mu kwimakaza iterambere ry’ikoranabuhanga rigezweho nk’irikoresha ubwenge muntu butari karemano (artificial intelligence), ubumenyi bwa mudasobwa mu guteganya ibizaba, gukoresha no guhererekanya ifaranga ry’ikoranabuhanga (blockchain) n’imitungo ibitswe kuri ryo, ndetse no gusakaza ibikoresho by’ikoranabuhanga bikenera internet (IoT).

Umuhango wo gutangiza C4IR Rwanda wabereye i Kigali witabiriwe na Perezida wa Repubulika y’u Rwanda Paul Kagame wari umushyitsi mukuru, akaba yashimiye Umuyobozi Mukuru akaba ari na we washinze  WEF Klaus Schwab, hamwe na Perezida w’iryo huriro Børge Brende, ku bufatanye bw’igihe kirekire bagaragarije u Rwanda.

Yavuze ko WEF yaherekeje icyerekezo cy’u Rwanda cyo guharanira kuba igihugu cyubakiye ubukungu bwacyo ku ikoranabuhanga, hagamijwe kubaka iterambere rirambye kandi ritagira n’umwe risigaza inyuma.

Yaboneyeho gushimangira ko itangizwa rya C4IR Rwanda ribaye mu gihe gikomeye, Abanyarwanda n’Abanyafurika bakwiye gufatirana amahirwe icyo kigo gitanga mu guhindura imibereho n’icyerekezo cy’Isi gishingiye ku guhanga udushya n’ikoranabuhanga.

Yagize ati: “Mu Rwanda no ku Isi hose, ikoranabuhanga rigezweho ryafashije mu guhanga udushya two guhangana n’icyorezo cya COVID-19 n’ingaruka zacyo ku mibereho y’abaturage. Ibyo byihutishije impinduka zari zikirimo gushyirwa mu bikorwa. Uburyo tubaho, uko dukora n’uburyo twumvikana hagati yacu bizakomeza gutera imbere nk’uko ikoranabuhanga rizagenda rihinduka.

Ariko imiyoborere y’imikoreshereze y’amakuru ntabwo yo yigeze irenga impinduka za mbere zabaye mu ikoranabuhanga. Ni muri urwo rwego nshimira C4IR kuba ishyigikiye itegeko ry’u Rwanda ryerekeye kurinda amakuru bwite n’imibereho bwite by’umuntu, iyo Politiki ikaba yarashyiriweho kurinda ubusugire bw’abaturage bwacu ari na ko babyaza umusaruro ikoranabuhanga rigezweho mu guharanira iterambere ry’imiryango yacu.”

C4IR Rwanda yitezweho kugira uruhare rukomeye mu guharanira ishyirwa mu bikorwa ry’Itegeko N° 058/2021 ryo ku wa 13/10/2021 ryerekeye kurinda amakuru bwite n’imibereho bwite by’umuntu ryasohotse mu igazeti ya Leta ku wa 15 Ukwakira 2021

U Rwanda rubona ikoranabuhanga nk’umuyoboro ukomeye wo kugeza Igihugu ku Ntego z’Iterambere Rirambye, by’umwihariko iyo kurandura inzara no kugera ku mutekano usesuye w’ibiribwa.

Ni muri urwo rwego hakomeje gushyirwa imbaraga zihariye mu gukoresha ikoranabuhanga rigezweho mu buhinzi n’ubworozi kuko rifite ubushobozi buhambaye bwo kubyaza ubuso buto umusaruro uhagije ku Banyarwanda bagasagurira n’amasoko yo hanze.

Iryo koranabuhanga kandi rikomeje kwimakazwa mu mitangire ya serivisi z’ubuvuzi, iz’ubucuruzi, gutwara abantu n’ibintu, isakazamakuru, mu mutekano, iz’ubuyobozi, uburezi n’izindi zinyuranye.

Perezida Kagame yatanze izindi ngero eshatu ubufatanye bw’u Rwanda na C4IR bushobora gufasha mu kwihutisha iterambere rishingiye ku ikoranabuhanga ari zo kwihutisha imishinga yo kwihangira imirimo bishingiye ku kongera ishoramari mu bumenyi n’ubushobozi bikenewe, mu gukuraho ibyuho mu kubona inkunga bibuza ubucuruzi bw’Abanyafurika gutera imbere, no guhuza  imikoreshereze y’amakuru muri Afurika, ikajyana no kwihutisha ishyirwa mu bikorwa ry’Isoko Rusange ry’Afurika (AfCFTA).

Ati: “Bumwe muri ubu bufatanye bwaratangiye kandi ndashimira abafatanyabikorwa bose ukwiyemeza kwabo gutanga icyizere gihamye. Itangizwa rya C4IR ryorohejwe n’ishoramari twe nk’Igihugu twakoze mu guteza imbere Ubumenyi n’Ikoranabuhanga. Nizeye ko iki kigo kizaryubakiraho mu guharanira ko Impinduramatwara ya kane mu by’ubukungu itubera imbaraga iringaniza kandi igira uruhare mu gutanga ibisubizo by’ibibazo by’iki gihe bikomeye kurusha ibindi.”

Perezida Kagame yashimangiye ko u Rwanda rwishimiye kuba umufatanyabikorwa w’Ihuriro Mpuzamahanga mu by’Ubukungu muri iki gikorwa cy’ingenzi no mu bindi byinshi bigamije iterambere ry’ubukungu rijyanye n’igihe Isi igezemo.

Umuyobozi akaba ari na we washinze WEF, Klaus Schwab, na we yatangiye ashimira Perezida Kagame ubufatanye yamugaragarije mu myaka yose ishize n’ukwiyemeza u rwanda rwagaragaje mu guharanira kwimakaza ikoranabuhanga rigezweho.

Yagize ati: “Uyu munsi ndishimira ifungurwa ry’Ikigo C4IR ku mugabane w’Afurika ndashimira kandi niteguye gusura iki kigo mu gihe cya vuba gishoboka. Twabonye ingero z’Abanyarwanda bikorera mu rwego rw’ikoranabuhanga bikajyana n’imiyoborere. Ni ingenzi cyane gufatanya by’umwihariko muri ibi bihe, mu kubaka ibirushijeho kuba byiza kandi biramba hifashishijwe iterambere ry’ikoranabuhanga rigezweho.”

Perezida wa WEF Børge Brende, witabiriye uyu muhango imbonankubone i Kigali, yishimiye kuba iki kigo cya mbere gitangijwe ku mugabane w’Afurika yose kigiye kuba umuyoboro w’ishyirwa mu bikorwa rya Politiki mpuzamahanga zigamije kubyaza umusaruro ikoranabuhanga rigezweho muri iki kinyejana.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA