U Rwanda rubona inyungu nyinshi mu kuboneza urubyaro
Amakuru

U Rwanda rubona inyungu nyinshi mu kuboneza urubyaro

NTAWITONDA JEAN CLAUDE

April 28, 2022

Ingingo yo kuboneza urubyaro iri mu zizamura ibitekerezo bivangavanze, bamwe mu bakirisitu bavuga ko bihabanye n’ubushake bw’Imana mu gihe abandi bavuga ko ari ugutegura ahazaza heza h’uwabihisemo. Nyamara ubushakashatsi bwerekana ko ushoye idolari ry’Amerika rimwe mu kuboneza urubyaro abona inyungu z’amadolari asaga 122 mu nzego zitandukanye z’imibereho harimo n’ubukungu.

Minisiteri y’Ubuzima mu Rwanda yo ishimangira ko kuboneza urubyaro ari ibyimakaza uburenganzira bwa muntu mu buryo butandukanye, bikagira uruhare mu iterambere ry’imiryango n’iry’igihugu mu nzego zitandukanye, kugabanya imfu z’ababyeyi n’abana bapfa bavuka n’ibindi, ari na yo mpamvu Leta y’u Rwanda yiyemeje gushora imari mu rugendo rwo kwegereza serivisi buri muturarwanda no gukora ubukangurambaga kugira ngo buri wese yiyumve muri iyi gahunda.

Umunyamabanga wa Leta muri Minisiteri y’Ubuzima ushinzwe Ubuvuzi bw’Ibanze, Lt Col Dr Mpunga Tharcisse, yavuze ko u Rwanda rwishimiye kwiyunga ku bukangurambaga mpuzamahanga bwiswe FP 2030 bugamije kwimakaza uburenganzira busesuye kuri bose mu bijyanye no kuboneza urubyaro hatitawe ku hantu aherereye, igitsina, kuba yarashyingiwe cyangwa atarashyingiwe, ubushobozi afite ndetse n’amahitamo yafashe mu bijyanye n’imibonano mpuzabitsina.

Dr. Mpunga yavuze ko FP 2030 igamije kwimakaza uburenganzira bwa muntu mu guharanira ko serivisi zo kuboneza urubyaro zigera kuri bose kandi zibonwa n’abagabo, abagore n’abakobwa bazikeneye, yemeza ko intego z’ubwo bukangurambaga zijyanye n’ubushake bwa Politiki bwa Leta y’u Rwanda mu buharanira ubuzima bwiza bw’imyororokere mu Banyarwanda binyuze mu kuboneza urubyaro.

Yatangiye ashima abafatanyabikorwa bacu bose mu iterambere, n’abagenerwabikorwa bose ku ruhare bagira mu ntambwe ishimishije imaze guterwa mu bijyanye no kuboneza urubyaro mu Rwanda.

Yagize ati: “Umusaruro wo kuva mu 2015 kugeza mu 2020 urashimishije kuko abitabira uburyo ubwo ari bwo bwose bwo kuboneza urubyaro bavuye kuri 53% bakagera kuri 64%.  By’umwihariko, ubushakashatsi bugaragaza ko abakoresha uburyo bwa kijyambere bwo kuboneza urubyaro bavuye kuri 48% bakagera kuri 58%.

Aha ni ho yahereye avuga ko ku bijyanye n’inteko z’u Rwanda muri FP 2030, Igihugu giteganya kugera ku kigero cya 65% ku bakoresha uburyo bugezweho bwo kuboneza urubyaro.

Yakomeje ashimangira uruhare rukomeye rwo kuboneza urubyaro mu kugabanya ibyago by’imfu z’abagore babura ubuzima babyara n’iz’abana bapfa bavuka cyangwa bataravuka, ruza ari inyongera nziza ku zindi ngamba zisanzwe zishyirwa mu bikorwa mu gukumira ibyo byago.

Ubushakashatsi ku Buzima n’Imibereho y’Abaturage bwa 2019-2020 (Demographic Health Survey-DHS/2019-2020) bugaragaza ko imfu z’ababyeyi bapfa babyara zavuye ku kigero cya 486/100,000 mu 2010 zikagera kuri 203/100,000 mu mwaka wa 2020. Ni mu gihe imfu z’abana bapfa bavuga ko zavuye kuri 50/1000 mu mwaka wa 2010 zikagera kuri 32/1000 mu 2020.

Dr. Mpunga yakomeje agira ati: “Turashimangira kandi ko kuboneza urubyaro bigabanya ubukene mu miryango, bikanimakaza uburinganire hagati y’abagore n’abagabo kuko ari inshingano zisangiwe n’impande zombi. Guverinoma y’u Rwanda isobanukiwe n’inyungu nyinshi ziri mu gushora imari mu kuboneza urubyaro.”

U Rwanda rwiyemeje kongera ubukangurambaga ku bijyanye no kuboneza urubyaro bukagera no ku rubyiruko rwinshi rushoboka

Yavuze ko serivisi zo kuboneza urubyaro zikwiye kwegerezwa buri mugore wese uzikeneye, kuko buri wese afite uburenganzira bwo guhitamo umubare w’abana yifuza kubyara, n’igihe bagomba kubabyarira.

Ati: “Buri muryango ukwiye kubona ubwisanzure bwo gufata umwanzuro kuri iyo ngingo mbere na nyuma yo gushyingiranwa kugira ngo bazabashe kugira umuryango mwiza kandi wishimye. Tugomba guharanira ko buri mwana w’umukobwa adakwiye gutungurwa no gutwara inda bikazagira ingaruka ku bushobozi bwo gukora, no ku nzozi zo guharanira kugera ku gihugu cy’uburumbuke.”

Ibindi u Rwanda rwiyemeje gukora bitarenze mu 2030

U Rwanda rwiyemeje kongera ubukangurambaga bugamije gukemura ikibazo cy’ibyuho biri mu bumenyi, mu myitwarire n’inyifato ku kuboneza urubyaro no kongera abakenera serivisi zo kuboneza urubyaro bakava ku kigero cya 78% babarwaga mu 2020 bakagera kuri 82% mu 2030 barimo abagore, abagabo n’urubyiruko.

Igihugu cyiyemeje kandi kurushaho kunoza uburyo bw’imitangire ya serivisi zo kuboneza urubyaro hongerwa aho zitangirwa mu Gihugu, amavuriro y’ingoboka akava kuri 670 akagera ku 1120 mu 2030.

Ibyo bizajyana no kuvanga serivisi zinyuranye zigezweho zo kuboneza urubyaro aho zitangirwa hose mu Gihugu, nibura buri aho zitangirwa hakagezwa uburyo bushya butatu bushya kandi bugezweho bwo kuboneza urubyaro.

Gahunda zo kuboneza urubyaro mu gihugu zizakomeza kujyanishwa n’amakuru ashingiye ku bushakashatsi kugira ngo politiki y’Igihugu yo kuboneza urubyaro irushaho gutanga umusaruro ukenewe mu kugera ku ntego igihugu cyihaye.

Biteganyijwe kandi ko bitarenze mu 2030, serivisi zo kuboneza urubyaro zizongererwa ingengo y’imari ivuye ku nyongera ya 2.7% yabarurwaga mu 2017 ikagera kuri 5% mu 2030.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA