U Rwanda rushyigikiye iyoroshywa ryo kwimuka ku mpamvu z’akazi muri EAC
Amakuru

U Rwanda rushyigikiye iyoroshywa ryo kwimuka ku mpamvu z’akazi muri EAC

NTAWITONDA JEAN CLAUDE

February 18, 2022


Guhera mu Ntangiriro z’iki cyumweru i Kigali, mu Rwanda hateraniye inama y’iminsi itatu yahuje abahagarariye ibihugu by’Umuryango w’Afurika y’Iburasirazuba (EAC) bigaga ku ishyirwaho ry’Umuyoboro Nyunguranabitekerezo mu Karere (Regional Consultative Process/RCP) ku bijyanye no koroshya ubwimukira bukozwe ku mpamvu z’akazi hagati y’ibyo biguhugu.

Intego nyamukuru y’iyo nama yari iyo kuganira ku ishyirwaho ry’uwo muyoboro uzaba urubuga rwo guhanahana amakuru ndetse no kuganira kuri Politiki zigamije gukemura ibibazo by’ubwimukira mu buryo bwizewe kandi bwumvikanyweho mu bihugu bigize EAC.

Mu gutangiza icyiciro cy’inama cyahuje ba Minisitiri, Minisitiri w’Abakozi ba Leta n’Umurimo Rwanyindo K. Fanfan, yagaragaje ko Leta y’u Rwanda ishimira abafatanyabikorwa batandukanye bo mu bihugu bigize EAC ku buryo bakomeje gushyira imbaraga mu gutangiza RCP yitezweho kongerera ibihugu imbaraga mu gukurikirana gahunda z’ubwimukira no gushyira ku murongo ibikorwa by’abimukira mu bindi bihugu ku mpamvu z’umurimo haba mu Karere no hanze yako.

Yasabye Ubunyamabanga Bukuru bwa EAC guharanira ko uyu muyoboro watangizwa vuba ndetse ukaba urubuga ruhoraho ruhangana n’ibibazo by’ubwimukira mu Muryango w’Afurika y’Iburasirazuba, ndetse rugashyirwa no mu masezerano agenga uyu muryango.

Minisitiri K. Rwanyindo yavuze ko hari icyizere ko Politiki z’ubwimukira muri EAC zizahuzwa, bityo kugaragaza ko ibihugu bigize umuryango bikeneye kungurana ibitekerezo kuri gahunda n’ubufatanye bitandukanye mu birebana n’ubwimukira, umurimo n’akazi ni ingirakamaro cyane.

Yakomeje agira ati: “Ndabinginga Baminisitiri bagenzi banjye ngo mukoreshe imbuga nk’izi mu kurushaho kwimakaza ubufatanye, ubutwererane ndetse no gukusanya ubushobozi bugamije gushyigikira gahunda z’Umuryango binyuze mu rubuga ruhuriweho.”

Umuyobozi Mukuru w’Urwego rushinzwe Serivisi z’Aibinjira n’Abasohoka muri minisiteri y’Umutekano no Guhuza ibikorwa bya Guverinoma ya Kenya  Alexander Imbenzi Muteshi, yavuze ko urubuga nyunguranabitekerezo ku rwego rw’Akarere rufite inyungu nyinshi ugereranyije n’inzira byanyuragamo mu gukora amasezerano.

Yakomeje avuga ko abantu bimuka hagati mu bihugu bya EAC bakomeje kwiyongera kandi hari ibihe usanga abantu bakora ubwo bwimukira mu buryo bwamaze kuba nk’umuco. Hari kandi n’ibibazo by’abav mu bihugu by’Akarere bakerekeza mu Burasirazuba bwo Hagati bahunze  cyangwa batwawe n’izindi mpamvu, ari na yo mpamvu hakenewe ubufatanye mu guhanahana amakuru no kuganira kuri politiki zigenga abinjira n’abasohoka.

Umuyobozi w’ Umuryango Mpuzamahanga ushinzwe Abimukira (IOM) mu Karere k’Iburasirazuba no mu Ihembe ry’Afurika Mohammed Abdiker, yavuze ko hari hakenewe uburyo buhuriweho muri ako Karere bwo guhangana n’ibibazo by’ubwimukira butubahirije amategeko.

Ubwo buryo ngo bwafasha gushyiraho amahuriro y’abaturuka muri guverinoma zitandukanye bungurana ibitekerezo ku miyoborere ijyanye n’ubwimukira ndetse n’uko urwego rushinzwe abinjira n’abasohoka rwarushaho gutezwaimbere.

Abdiker yagize ati: “Reka mfate aya mahirwe nshimganire ukwiyemeza kwa OIM mu kudatezuka gushyigikira gahunda za EAC zijyanye n’abimukira binyuze mu bujyanama, kubaka ubushobozi, gukora ubushakashatsi, ndetse no kubaka ubufatanye bujyana no guhanahana amakuru.”

Byitezwe ko amabwiriza ashyiraho RCP agomba kuba yagejejwe ku bihugu bigize Umuryango bitarenze taliki ya 4 Werurwe 2022.

Umunyamabanga Mukuru Wungirije wa EAC Christophe Bazivamo, yabwiye abitabiriye iyo nama ko Ingingo ya 140 y’Amasezerano ashyiraho EAC n’agenga Isoko Rusange ry’uyu muryango itanga amahirwe yagutse y’ubutwererane mu birebana n’urujya n’uruza rw’abantu mu Karere, harimo abatembra, abakozi, abikorera ndetse nabifuza gutura mu bindi bihugu. 

Yakomeje agira ati: “RCP izatanga amahirwe ku Karere to kugirana ibiganiro ku nzego zitandukanye zirenze umurimo n’ubwimukira ariko bifitanye isano na byo nk’urujya n’uuruza rw’abantu bimuka kubera impamvu z’ubuzima, ubwimukira n’ibidukikije ndetse n’ubwimukira bugamije iterambere.”

Yakomee avugako RCP izakora nk’urubuga rwagutse mu guhuza abafatanyabikorwa mu nzego zitandukanye hagamijwe gushakisha ubushobozi no kugenza ibyihutirwa bigomba gukorwa mbere y’ibindi.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA