U Rwanda rwahaye ikaze abazitabira inama y’amateka ya ITU-WTDC
Amakuru

U Rwanda rwahaye ikaze abazitabira inama y’amateka ya ITU-WTDC

NTAWITONDA JEAN CLAUDE

May 18, 2022

Ku nshuro ya mbere mu mateka y’Afurika mu myaka 28 ishize, Inama Mpuzamahanga yiga ku Iterambere ry’Ikoranabuhanga mu isakazamakuru (World Telecommunication Development Conference/WTDC) yitezwe i Kigali mu Rwanda hagati y’italiki ya 6 n’iya 16 Kamena 2022.

Iyo nama yitezweho kwigira hamwe uko ibice bisigaye bitarahuzwa n’ikoranabuhanga n’isakazabumenyi mu itumanaho byahuzwa mu maguru mashya  mu rwego rwo koroshya urugendo rwo kugera ku iterambere rirambye.

Minisitiri w’Ikoranabuhanga no Guhanga Ibishya Ingabire Musoni Paula, yahaye ikaze abashyitsi bazitabira iyo nama igiye kubera mu Rwanda nk’igihugu gikomeje kubaka izina ryo kuba intangarugero mu ikoranabuhanga ku mugabane w’Afurika.

Mu butumwa yageneye abazitabira iyo nama, Minisitiri Ingabire yagize ati: “Ikaze mu Rwanda rw’imisozi igihumbi, ku mugabane w’amahirwe n’ibishoboka bisaga igihumbi. Iki ni cyo Inama Mpuzamahanga ya munani yiga ku Iterambere ry’Ikoranabuhanga mu itumanaho izaba yigira hamwe. Igihe kirageze ngo dutekereze ku byihutirwa mu Isi ya nyuma ya COVID-19 aho tudashobora kwihanganira kugira uwo dusigaza inyuma.”

Inama y’uyu mwaka izaterana ku nsanganyamatsiko igira iti: ‘Kugeza itumanaho ku bo ritarageraho mu guharanira iterambere rirambye.’

Byitezwe ko iyi nama izabanzirizwa n’indi ihuza urubyiruko (Generation Connect Global Youth Summit) hagati y’italiki ya 2 kugeza ku ya 4 Kamena, igamije kwimakaza ikoranabuhanga mu isakazamakuru mu gisekuru gishya cy’urubyiruko. 

Hagati ya taliki ya 7-9 Kamena hazaba ibiganiro by’ihuriro ry’abafatanyabikorwa byateguwe n’Ihuriro ryiswe “Partner2Connect” (P2C) rishishikariza abayobozi bo mu nzego zitandukanye guhuza abaturage mu itumanaho hifashishijwe ikoranabuhanga rigezweho.

Ikigo mpuzamahanga cyo mu Bwongereza gitanga serivisi za telefoni (Inmarsat) cyatangaje ko kizitabira ibyo biganiro bizahuza abafatanyabikorwa, kandi ko cyiteguye gutanga miliyoni 1.2 z’amadolari y’Amerika yo kugura umuyoboro w’ibyogajuru  mu Ihuriro ryiswe “Partner2Connect” (P2C).

Iyo mpano yitezweho gufasha kugera ku ntego yo guhuriza abantu ku ikoranabuhanga aho bari hose, biturutse ku kwifashisha ikoranabuhanga ry’ibyogajuru mu guhangana n’ibiza, kwiyubaka ndetse no guhangana n’ibibazo bitandukanye by’ubuzima bwa buri musi.

Ihuriro Partner2Connect rigizwe n’abafatanyabikorwa batandukanye, rikaba ryarashinzwe n’ubuyobozi bwa ITU mu kwimakaza iterambere ry’ihuzanzira rya murandasi n’impinduka mu by’ikoranabuhanga zigera mu bice bigoranye kugezwaho ikoranabuhanga.

Guhera mu mwaka wa 2021, iryo huriro ryatangiye gahunda yo gukusanya ubushobozi binyuze mu bufatanye bw’inzego zitandukanye, mu guharanira ko ihuzanzira rya murandasi ryagera kuri buri wese aho ari hose, harimo no gushyigikira by’umwihariko abaturage bo mu bihugu bikiri mu nzira y’amajyambere bakunze guhura n’ibiza bituruka ku bikorwa bya muntu, Leta z’ibyo bihugu ndetse n’ibigo by’abagiraneza birimo gukora ibishoboka byose ngo bibagezeho iryo koranabuhanga.

Umuyobozi Mukuru wungirije wa Inmarsat Donna Bethea-Murphy, yagize ati: “Twishimiye kwesa imihigo no gukomeza ubufatanye na Partner2Connect Coalition, kugira ngo tubafashe kugera ku ntego zo guhuza abantu ahantu hose. Imihigo yatangajwe uyu munsi izafasha guharanira ko ikoranabuhanga ryacu ry’ibyogajuru rishobora gukoreshwa kugira ngo abantu bose bahuzwe neza. ”

Doreen Bogdan-Martin, wa ITU, na we agira ati: “Mu bihe kugera ku ikoranabuhanga rari yo ntego nyamkuru, WTDC y’ubutaha ihagarariye amahirwe yo kubohora imbaraga z’ubufatanye mu ikoranabuhanga bugamije kwesa imihigo y’Intego z’Iterambere Rirambye.”

Akomeza ashimira Inmarsat uruhare runini yagize mu gushyigikira ibikorwa bya ITU byo guhangana n’ibiza mu muhigo yiyemeje kwesa binyuze muri Partner2Connect Digital.  Ati: “Iri huriro ni amahirwe akomeye yo guteza imbere urwego rw’Ikoranabuhanga mu isakazabumeyi binyuze mu gufata ingamba nshya, kwimakaza ubufatanye no gukusanya ubushobozi bukenewe mu guhuza abatari bagerwaho na murandasi.”

Yakomeje asaba abafatanyabikorwa bose guhaguruka bagahuza ababarirwa muri miliyari 2.9 bataragerwaho n’ihuzanzira rya internet. Ati: “Nakiriye neza uku kwiyemeza gushyigikira P2C kandi niteguye gukomeza kubona abafatanyabikorwa bandi benshi biyemeza kugira ngo duhuze Isi yose mu ikoranabuhanga mu buryo bushyitse.”

WTDC ni inama ibonwa nk’amahirwe akomeye yo kubohora imbaraga z’ubufatanye bw’ikoranabuhanga bugamije kugera ku Ntego z’Iterambere Rirambye bitarenze mu 2030, no guhanga uburyo bushya na gahunda z’ubufatanye mu gukwirakwiza umuyoboro wa internet n’irindi koranabuhanga rigezweho.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA