U Rwanda rwemeye abimukira, umutwaro Kenya yanze kwikorera
Amakuru

U Rwanda rwemeye abimukira, umutwaro Kenya yanze kwikorera

Imvaho Nshya

April 19, 2022

Mu gihe hari abihutiye kurwanya ubufatanye bw’u Rwanda n’u Bwongereza bwo kwakira abimukira n’abasaba ubuhungiro banyura mu nzira zitemewe bashaka kwinjira muri icyo Gihugu, ukuri ku mutwaro wihishe inyuma yo kwiyemeza kubakira gukomeje kwigaragaza.

Hari bamwe bumvise ko u Bwongereza bwiyemeje gutanga miliyoni 120 z’amapawundi asaga miliyari 164 z’amafaranga y’u Rwanda, batangira kwitiranya icyo kiguzi n’ubucuruzi ariko iyo kuba ari ko bimeze ntabwo Igihugu cya Kenya cyari kwanga kubukora iyo buza kuba bubyara inyungu nk’uko bamwe mu barwanya ubwo bufatanye bagerageza kubivuga.

Ikinyamakuru The East African cyatangaje ko mu makuru cyahawe n’umwe mu Badipolomate ba Kenya, yagaragaje ko u Bwongereza bwabanje kugeza icyo cyifuzo kuri Kenya mbere ariko, icyo gihugu kirabyanga kuko cyabibonaga nk’umutwaro uremereye cyane w’abashyitsi badakenewe…

Leta y’u Rwanda itarahwemye kugaragaza ubushake bwo gutabara abari mu kaga igihe cyose yemeye gusinya amasezerano yo kwakira abo bimukira bagahabwa ibyangombwa nkenerwa byo kugira ngo bongere kubaka ubuzima, n’abashaka gusubira mu bihugu byabo bakoroherezwa kugerayo.

Ubufatanye nk’ubu bwabayeho ahandi ntibubuza abimuriwe mu bihugu bibakiriye by’agateganyo amahirwe yo gusubira muri bya bihugu byabohereje cyangwa ngo babure amahirwe yo gukomeza kubaho mu mahoro n’umutekano aho bagiye hose.

Mu gihe amasezerano yasinywe hagati y’u Rwanda n’u Bwongereza mu cyumweru gishize agaragaza ishusho y’uburyo icyo gihugu kigowe no kurinda imipaka yacyo nyuma yo kuva mu Muryango w’Ubumwe bw’Uburayi, akaba anitezweho kucyorohereza kugabanya igitutu cyashyirwaho n’abimukira bazanaga n’ibyago bitandukanye, banasaba kugendaho akayabo buri munsi.

Umubare nyawo w’abimukira bazakirwa n’u Rwanda nturatangazwa ariko biteganyijwe ko buri mwimukira uzagerageza kwambuka mu buryo bunyuranyije n’amategeko mu bwato cyangwa yahishwe mu modoka azahita yoherezwa mu Rwanda.

Mu mwaka ushize wa 2021 hafashwe ababarirwa mu 28,526 bagerageza kwinjira mu Bwongereza baturutse mu nkambi zo mu Bufaransa.

Kuri ubu amakuru agezweho ni uko u Bwongereza bwegereye u Rwanda nyuma yo kwitabaza ibindi bihugu birimo na Kenya bikanga kwizirikaho uwo mugogoro bivuga ko ikiguzi byasabwa kirenze icyo u Bwongereza butanga.

Nka Kenya ubusanzwe icumbikiye impunzi n’abashaka ubuhungiro basaga 800,000 biganjemo ababarizwa mu nkambi zinyuranye,yanze kongera gufata abimukira kuko waba ari umutwaro wiyongereye ku wo basanganywe mu Gihugu.  

Kwakira abimukira bisaba kwiyemeza kuko inkunga yakenerwa kugira ngo igihugu cyemere kubakira irenze iyo u Bwongereza bwemera gutanga

Umwe mu bayobozi batangarije The East African ko isesengura ryakorewe ikiguzi cyagenda kuri buri mwimukira ryagaragaje ko inkunga u Bwongereza butanga ari nkeya cyane ugereranyije n’ibyo buri wese uzakirwa asabwa kubona kugira ngo abeho ubuzima bwiza.

Yagize ati: “Amafaranga atangwa ni make cyane ntashobora gutunga izo mpunzi. Iyo impunzi ziza kuba zitanga inyungu birashoboka ko twakabaye turi abakire. Ariko kubacumbikira bitwara akayabo. N’iyo igihugu kiba cyishyuwe inkunga ijya mu mashuri n’ibindi bikorwa byo guharanira imibereho myiza, iteka usanga ikiguzi cyo kubagumana kiri hejuru cyane.”

Yakomeje agira ati: “Mu myaka itatu kugeza kuri itanu, basigara ari ikibazo cyawe kubera ko ibyo uba ukeneye cyane ari ukubabonera iimirimo n’ibindi by’ingenzi bakeneye kugira ngo bitunge mu buryo burambye.”

Nubwo u Bwongereza bwiyemeje kwishyura amafaranga asaga miliyari 164 ya serivisi ku Rwanda, iyo hatazamo ubugiraneza no kuba iki gihugu gihora iteka giharanira ko nta n’umwe wavutswa amahirwe yo kubaho aho yaba ari hose ku Isi, nti byari koroha ko na cyo cyemera kubakira.

Impamvu nyamukuru iki kibazo cyabaye umwihariko ku Rwanda ni uko umubare munini w’abazakirwa usanga ari abagiye bava mu bihugu by’Afurika bagera mu Bwongereza ari umutwaro ukomereye igihugu kuko bagisaba nibura amadolari y’Amerika miliyoni 6.3 ku munsi mu kubatwara no gucunga imipaka.

Mbere ya Noheli y’umwaka ushize, abantu 27 bapfuye barohamye mu Nyanja, ndetse n’abandi bakomeza kugenda baburirwa irengero n’imibiri yabo ntiboneke. Hakurikijwe abagiye bafatwa bambuka mu mpera z’icyumweru gishize, biteganyijwe ko hatagize igikorwa abimukira bagerageza kwambuka bazajya bagera no ku 1000 ku munsi.

 Gahunda zose zagiye zishyirwaho ntizatanze umusaruro, kuri ubu iyo kubohereza mu Rwanda yo yitezweho gutanga umusaruro ufatika kuko abo banyafurika benshi bazabona amahirwe yo gutura mu gihugu gitekanye kandi n’abagerageza kubambutsa no kubacuruza bakarushaho gushyikirizwa ubutabera.

Mu cyumweru gishize ubwo Minisitiri w’Intebe w’u Bwongereza Boris Johnston yatangazaga iyi gahunda nshya, yashimiye Leta y’u Rwanda anagaragaza ko u Rwanda ari igihugu cyiza cyane gifite akarusho ko kuba kiri mu bihugu bitekanye kurusha ibindi ku Isi, kikaba cyaranubatse izina mu bijyanye no kwakira impunzi n’abasaba ubuhungiro bakanafashwa no kwisanga muri sosiyete y’abaturage basanze.

Yavuze ko u Rwanda rwakwitega kwakira ibihumbi mirongo by’abimukira mu myaka iri imbere, ariko anasobanura ko abazajya bafatirwa mu bwato bagerageza kwinjira mu Bwongereza bazajya bafashwa kubona ahandi hantu hababereye habakira haba mu Bwongereza, ibihugu baturutsemo, mu Rwanda cyangwa ibindi bihugu bizajya byemera kubakira.

Yakomeje ashimangira ko abava mu bihugu byabo ku mpamvu z’ubukungu batazabona amahirwe yo kuba mu Bwongereza, mu gihe abandi bakeneye ubutabazi bazaba boherejwe mu Rwanda bakanagenerwa inkunga y’ibizabafasha mu buzima bwa buri munsi bakihagera.  

Leta y’u Rwanda ivuga ko aba bimukira nibagera mu Rwanda bazaba bemerewe kubona uburinzi bwose butangwa n’amategeko y’u Rwanda, babone amahirwe y’umurimo nk’abandi Banyarwanda, bajye muri serivisi z’ubuzima n’iz’imibereho myiza y’abaturage ndetse bahabwe n’ibyangombwa byose bikenewe bibaranga.

Aya mabwiriza arareba abazajya babonwa bageze mu Bwongereza mu nzira zitemewe zaba iz’amazi cyangwa bazanywe gucuruzwa.

Si ubwa mbere u Rwanda ruramburiye amaboko impunzi ziza zirugana. Urugero rwa hafi ni urw’abimukira bari bangiwe kwinjira muri Denmark, rwizezwa gufashwa mu kubaka urwego rwo kwakira impunzi mu Gihugu.

Guhera mu 2019 nabwo u Rwanda rwatangiye kwakira impunzi n’abasaba ubuhungiro baturutse muri Libya, babaga barananiwe kwinjira mu bihugu by’i Burayi, ndetse abasaga 700 mu basaga 940 bamaze kubona ibihugu bibakira kandi ubufatanye buzakomeza kugeza mu 2023.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA