U Rwanda rwifuza gukomeza gukorana neza na RDC
Amakuru

U Rwanda rwifuza gukomeza gukorana neza na RDC

NTAWITONDA JEAN CLAUDE

May 31, 2022

Guverinoma y’u Rwanda yagaragaje ko itabona inyungu mu kuba yajya mu ntambara na Repubulika Iharanira Demokarasi ya Congo (RDC) nubwo itazakomeza kurebera igihe yaba ikomeje gushotorwa n’abaturanyi, abaturage bakicwa n’abandi bagashimutwa.

Mu kiganiro n’abanyamakuru cyabaye kuri uyu wa Kabiri nyuma yo guhura n’abadipolomate, Minisitiri w’Ububanyi n’Amahanga n’Ubutwererane w’u Rwanda Dr. Biruta Vincent, yavuze ko kimwe n’ibindi bihugu byose u Rwanda rufite uburenganzira bwo kwirwanaho mu gihe rwaba rutewe cyangwa imipaka ivogerewe.

Yabwiye abadipolomate bahagarariye ibihugu byabo n’imiryango mpuzamahanga, ko Guverinoma itazakomeza kurebera ibikorwa bigamije kugirira nabi u Rwanda n’Abanyarwanda n’ubushotoranyi bikomeje gukorwa na Repubulika Iharanira Demokarasi ya Congo.

Dr Biruta yavuze ko inshingano y’ibanze Leta y’u Rwanda ifite ari ukurinda abaturage bayo bityo ko Repubulika Iharanira Demokarasi ya Congo, ikwiye guhagarika ibikorwa bifitanye isano n’ingengabitekerezo ya Jenoside no kugirira nabi u Rwanda n’abarutuye.

Gusa yakomeje agira ati: “Twiyemeje guharanira amahoro, umutekano n’iterambere ry’ubukungu by’akarere kacu bityo twifuza gukomeza gukorana na RDC hagati yacu, binyuze no mu nzira zashyizweho ku rwego rw’Akarere.”

Yaboneyeho kandi kuvuga ko Guverinoma y’u Rwanda ifite inshingano zo kurinda umutekano w’abaturage agira ati: “Dufite inshingano zo kurinda umutekano w’abaturage bacu no kurinda imipaka y’igihugu cyacu. Igihugu iyo gitewe kiritabara. Bikomeje ntabwo twakomeza ngo twicare dutegereze ko abaturage bacu bahora baraswa buri munsi, ushatse aze ashimute abo ashatse bose.”

Yakomeje agira ati: “Icyo twifuza ni uko ibikorwa byahagarara, turifuza ko bariya basirikare barekurwa, ariko ubwo ibitero bikomeje, umutekano w’Igihugu cyacu ugakomeza kubangamirwa, twaba dufite uburenganzira bwo kwirwanaho kandi muzi neza ko ubushobozi turabufite.”

Dr. Biruta yibukije ko ku wa Mbere w’icyumweru gishize muri RDC haturutse ibisasu byakomerekeje abaturage bikangiza n’inzu zabo, ibikorwa byari bibaye ku nshuro ya kabiri muri uyu mwaka kuko taliki 19 Werurwe, hari ibindi byari byaguye ku butaka bw’u Rwanda biturutse muri icyo gihugu gusa byo ngo ntacyo byangije kinini kuko byaguye mu mirima.

Yateye utwatsi ibirego bya DRC bishinja u Rwanda gutera inkunga umutwe wa M23 wubuye imirwano muri Kivu y’Amajyaruguru aho uhanganye n’ingabo za RDC (FARDC), ashimangira ko ntaho u Rwanda ruhuriye n’iyo ntambara.

Ku rundi ruhande,  yavuze ko u Rwanda rutiyumvisha uburyo ingabo za LONI zishinzwe kugarura amahoro mu Burasirazuba bwa RDC (MONUSCO) ndetse FARDC zimaze imyaka 28 zaratereye agati mu ryinyo ku kibazo cy’umutwe wa FDLR.

Yavuze ko FDLR ari yo ikomeje kuba umusingi w’ingengabitekerezo ya Jenoside n’imvugo z’urwango n’amacakubiri zikomeje gukwirakwizwa mu itangazamakuru n’imbuga nkoranyambaga.

Minisitiri Dr. Biruta avuga ko u Rwanda rusaba amahanga kwirinda kurebera kuko Isi ishobora kwisanga amateka ya Jenoside yongeye kwisubiramo, cyane ko hari abayobozi bumvikanye basaba abaturage guhaguruka bagafata imipanga bakirwanaho.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA