U Rwanda rwishimiye kuba RDC yemerewe kwinjira muri EAC
Amakuru

U Rwanda rwishimiye kuba RDC yemerewe kwinjira muri EAC

NTAWITONDA JEAN CLAUDE

March 29, 2022

Leta y’u Rwanda yagaragaje ko ishyigikiye kuba Repubulika Iharanira Demokarasi ya Congo (RDC) yakiriwe nk’Umunyamuryango mushya wa 7 mu bihugu bigize Umuryango w’Afurika y’Iburasirazuba (EAC) nyuma yo kwemezwa n’Abakuru b’Ibihugu bigize uwo Muryango.

Perezida wa Repubulika y’u Rwanda Paul Kagame, witabiriye Inama idasanzwe ya 19 y’Abakuru b’Ibihugu bya EAC yemeje icyo gihugu nk’Umunyamuryango mushya, yavuze ko u Rwanda rushyigikiye uyu mwanzuro cyane ko iki gihugu cyari kimaze imyaka isaga itatu gitanze ubusabe bwo kwiyunga ku bindi bihugu by’Afurika y’Iburasirazuba.

Perezida Kagame yagize ati: “U Rwanda rushyigikiye ko RDC yinjira mu Muryango w’Akarere kandi rwiteguye kugira uruhare mu gushyigikira icyo gihugu mu rugendo rwo kwihuza n’ibindi bihugu bigize umuryango muri EAC”.

Yakomeje agira ati: “Ndashima Umuyobozi wa EAC Uhuru Kenyatta watumije iyi nama yo kwemeza RDC muri uyu muryango kuko biri mu muryngo wo kurushaho kwihuza mu Karere no ku Mugabane. Nakiriye bashiki na basaza bacu ba RDC mu muryango wa EAC.”

Iyi nama yitabiriwe n’abandi Bakuru b’Ibihugu by’Umuryango w’Afurika y’Iburasirazuba yabaye hifashishijwe ikoranabuhaga, ikaba yayobowe na Perezida wa Kenya akaba n’Umuyobozi Mukuru w’uyu Muryango Uhuru Kenyatta.

Perezida Uhuru Kenyatta yashimangiye ko kwemerera RDC kwinjira muri uyu muryango bitanga amahirwe akomeye mu rugendo rwo kwihuza cy’ibihugu bigize Akarere cyane ko icyo gihugu ubwacyo gihana imbibi n’ibihugu 5 bigize uyu muryango ari byo u Rwanda, u Burundi, Sudani y’Epfo, Tanzania na Uganda.

Perezida wa Repubulika yunze Ubumwe ya Tanzania Samia Suluhu Hassan na we yagize ati: “Repubulika Yunze ubumwe ya Tanzania ibikuye ku mutima yakiriye Repubulika Iharanira Demokarasi ya Congo mu muryango. Imihigo irakomeje!”

Perezida wa Uganda Yoweri Kaguta Musevei na we ati: “Kwinjira kwa DRC muri EAC ni ikintu gikomeye kuko bitanga icyizere cy’uburumbuke ku baturage b’ibihugu byacu! Nk’abayobozi reka duhore duharanira ko amahoro, umutekano n’ituze bikomeza gusigasirwa mu Karere.”

Ibihugu bisanzwe muri uyu Muryango birabona amahirwe akomeye mu kuba guhera mu mwaka wa 2019 itarahwemye kwisabira kuba umunyamuryango, mu gihe ifite amahirwe yo kuba ari kimwe mu bihugu binini ku mugabane w’Afurika bifite umutungo kamere uhagije n’isoko ryagutse ry’abantu basaga miliyoni 87.

Biteganyijwe ko Repubulika Iharanira Demokarasi ya Congo na yo izungukira byinshi ku kuba Umunyamuryango wa EAC. Mu nyungu zihuse igiye kubona ni uko hifashishijwe amazezerano y’amahoro n’umutekano mu Karere, ibihugu bigize uyu Muryango bizoroherwa no gutabara muri icyo Gihugu kimaze imyaka myinshi cyugarijwe n’imitwe y’iterabwoba ihungabanya umutekano mu Karere.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA