U Rwanda rwiteguye gukorana bya hafi na Chad-Perezida Kagame  
Amakuru

U Rwanda rwiteguye gukorana bya hafi na Chad-Perezida Kagame  

NTAWITONDA JEAN CLAUDE

March 18, 2022

Perezida wa Repubulika Paul Kagame, yavuze ko Leta y’u Rwanda n’Abanyarwanda muri rusange biteguye gukorana bya hafi na Repubulika ya Chad n’abaturage bayo mu gihe ibyo bihugu byombi byasinyanye amasezerano y’ubutereranwe rusange yitezweho gufungura ubuhahirane mu nzego zitandukanye.

Umukuru w’Igihugu cy’u Rwanda yabigarutseho ubwo yahaga ikaze Umuyobozi w’Inama ya Gisirikare iyoboye Chad mu nzibacyuho akaba n’Umukuru w’icyo gihugu Gen. Mahamat Idriss Déby Itno, uri mu ruzinduko rw’iminsi ibiri mu Rwanda rwatangiye kuri uyu wa Gatanu taliki ya 18 Werurwe 2022.

Gen Mahamat Idriss Déby Itno, akigera ku Kibuga cy’Indege Mpuzamahanga cya Kigali, yakiriwe na Minisitiri w’Ububanyi n’Amahanga n’Ubutwererane Dr. Biruta Vincent nyuma y’aho ahita yakirwa muri Village Urugwiro na Perezida Kagame.

Nyuma yo kwakirwa mu cyubahiro gihabwa Abakuru b’Ibihugu n’abandi bayobozi bakuru basura u Rwanda, Gen Mahama yabanje kugirana ibiganiro na Perezida Kagame byabereye mu muhezo mbere yo kwitabira isinywa ry’amasezerano y’ubutwererane rusange hagati y’u Rwanda na Chad.

Mu ijambo ry’ikaze bafashe mbere yo gusinya ayo masezerano, Perezida Kagame yavuze ko u Rwanda rwishimiye kwakira Umukuru w’Igihugu cya Chad n’itsinda ryaje rimuherekeje, aboneraho no kumushimira imbaraga bakomeje gushyira mu guharanira amahoro n’umutekano muri icyo gihugu cyaburiye uwari Perezida Idriss Déby Itno ku rugamba mu mwaka ushize.

Yavuze ko amasezerano y’ubutwererane rusange yasinywe  uyu munsi ari amahirwe yo gukomeza guhererekanya no gusangira amasomo cyane ko ibyo u Rwanda rwanyuzemo mu myaka 28 ishize byasize isomo rikomeye by’umwihariko ku bijyanye n’agaciro k’ubwiyunge butagira n’umwe busigaza inyuma.

Perezida Kagame yakomeje agira ati: “Iki ni igihe gikwiye cyo gushimangira umubano wacu ndetse tukanimbika ubufatanye mu nzego zifitiye inyungu impande zombi. Icyorezo cyadindije iterambere twari tumaze kugeraho kandi dukomeje kubona ihungabana rirushaho kwiyongera ku mugabane wacu. Hari byinshi biri mu mazi abira kuri twese; dukwiye guhuza imbaraga zacu maze tugafatanya guhangana n’ingorane duhuriyeho.”

Perezida Kagame yijeje kwishyura Umukuru w’Igihugu cya Chad ugendereye u Rwanda ku nshuro ya mbere na we akazajya gusura iki gihugu ndetse anavuga ko u Rwanda rwiteguye kongera kumwakirana urugwiro igihe cyose azahitamo kugaruka gusura iki gihugu cy’imisozi 1000.  

Perezida Gen Mahamat Idriss Déby Itno na we yaboneyeho gushimira Perezida Kagame abikuye ku mutima kuko atahwemye gushimangira ubushuti no kugaragariza Chad ubuvandimwe mu buryo butandukanye.

Yanamushimiye kandi ubutumire bwatumye agirira uruzinduko rwe rwa mbere mu gihugu afata nk’icyitegererezo ibindi biguhu by’Afurika bikeneye kuza kwigiraho.

Yavuze ko mu bihe bigoye, by’umwihariko mu gihe cy’ibitero bya Boko Haram ndetse n’igihe uwari Perezida wa Chad atabaruka azize ibikomere by’amasasu yahuriye na yo  ku rugamba n’imitwe y’inyeshyamba, u Rwanda rwababaye hafi.

Ati: “Mu gihe igihugu cyacu kiri mu rugendo rw’amahoro n’umutekano, byose tubikesha ubufatanye bw’abavandimwe bacu kandi Nyakubahwa  uri umwe muri izo nshuti n’abavandimwe ba Chad baduhora iruhande.”

Yakomeje agaruka ku buryo u Rwanda na rwo ranyuze mu bikomeye ariko kuri ubu rukaba ari igihugu cy’intangarugero ku Isi yose  mu nzego zitandukanye, agaragaza ko Chad izakomeza gufatanya n’u Rwanda nk’ibihugu bifite byinshi bihuriyeho haba mu mateka, umuco n’ibindi.

“[…] Nyakubahwa Perezida turifuza kwigira byinshi ku cyitegererezo cy’u Rwanda… Ndagira ngo ngushimire nyakubahwa Perezida imiyoborere yawe ya kinyafurika n’uruhare mwagize mu ishyirwaho ry’Isoko Rusange ry’Afurika (AfCFTA).”

Yasoje ashimangira ko u Rwanda runagaragaza umwihariko ukomeye mu kuba Abanyafurika bahabwa ikaze bitabasabye kugura visa, ibyo bikaba byarahaye amahirwe abanyeshuri basaga 1000 bo muri Chad baje kwigira mu mashuri makuru na Kaminuza byo mu Rwanda  

Ati: “Chad irashimira iyo gahunda n’iki cyitegererezo cy’ubufatanye bw’ibihugu bikiri mu nzira y’amajyambere twese dukwiye gukurikiza. Nyakubahwa Perezida nagira ngo mbashimire iki gikorwa cyo gusinyana amasezerano y’ubufatanye. Niyemeje ko ibihugu byacu byombi bizagirana umubano uhamye n’ubufatanye butanyeganyega hagati y’ibihugu byacu.”

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA