U Rwanda rwiteguye inama nyafurika yiga ku bworozi bw’inkoko
Amakuru

U Rwanda rwiteguye inama nyafurika yiga ku bworozi bw’inkoko

NTAWITONDA JEAN CLAUDE

June 8, 2022

Inama Nyafurika yiga ku Bworozi bw’Inkoko n’ibindi biguruka (Poultry Africa 2022) yitezwe kongera kubera mu Mujyi wa Kigali taliki ya 5 n’iya 6 Ukwakira 2022, ikaba ari imwe mu nama mpuzamahanga u Rwanda ruzaba rwakiriye ku nshuro ya 3 kuva mu 2017.

Ni inama yitezweho abantu batandukanye barimo abahagarariye Guverinoma, abahinzi, abashakashatsi n’abandi bose bakora mu ruhererekane rw’ibiribwa by’umwihariko mu bworozi bw’ibiguruka.

Ingingo zitezwe kuganirwaho harimo izirebana n’ubuzima bw’ibiguruka ndetse n’ababirya cyangwa ababana na byo, umutekano w’urusobe rw’ibinyabuzma ndetse n’ibibazo bikunze kwibasira aborozi cyangwa abongerera agaciro umusaruro w’ubworozi bw’inkoko.

Iyo nama mpuzamahanga yatewe inkunga n’Ihuriro VIV Europe ritegurwa buri myaka ine rihuje abamurika ibikorwa byabo mu bworozi bw’inkoko, dendo, imbata, ibishuhe n’ibindi biguruka, ndetse n’umusaruro bitanga uhereye ku nyama, amagi.

Mu bimurikwa hanabonekamo inyama z’ingurube, inyama z’ifi ndetse n’amata n’ibiyakomokaho.

Iryo huriro rimara icyumweru ryimakaza ikoreshwa ry’ikoranabuhanga mu bworozi, aho aborozi n’abacuruza umusaruro ukomoka ku bworozi bahererekanya ubumenyi mu buryo bugezweho bwo gukora ubworozi bwa kijyambere bwifashisha ikoranabuhanga rigezweho.

Inama ya “Poultry Africa 2022” igiye kuba nyuma y’izindi nama ebyiri zabereye i Kigali mu 2017 no mu 2019, yitezweho guhuza ibigo 120 bizaba bimurika ibikorwa byabyo biturutse mu bihugu birenga 20.

Abazitabira iryo murika bitezweho kuzaba baturutse mu bihugu birimo u Rwanda, Nigeria, Uganda, Kenya, Ghana, Ethiopia, Tanzania, Afurika y’Epfo, Sudan n’ibindi bihugu by’Afurika bitandukanye.

Abategerejwe muri iyo nama barasaga 2,000 bazaba barimo aborozi, abafite inganda zongerera agaciro umusaruro w’ubworozi bw’inkoko, abashakashatsi n’abandi.

Ni yo nama ya mbere nini iganira ku ngingo zinyuranye zigize ubworozi bw’inkoko n’ibindi biguruka ndetse n’uruhererekane rw’umusaruro bitanga.

Biteganyijwe ko uretse ubworozi bw’inkoko, inama y’uyu mwaka ifite umwihariko wo kuzagura ibiganiro kugeza no ku buhinzi bw’indabo imboga n’imbuto ndetse no gutunganya umusaruro w’amata.

Umuyobozi w’Ikigo VNU Europe gitegura amamurikabikorwa mpuzamahanga, Zhenja Anochin, yavuze ko mu gutanga ibisobanuro byimbitse ku ngingo zateguwe mu biganiro bizongerera ubumenyi abazitabira mu rwego rwo guhangana no gukemura ingorane zitandukanye.

Izindi ngingo zizibandwaho cyane ni umutekano w’amatungo, uburyo bugezweho bwo gucunga aho bayororera, n’ibisubizo byo kubika inyama n’undi musaruro.

Ibyo bikorwa birimo gutegurwa ku nkunga ya Minisiteri y’Ubuhinzi n’Ubworozi (MINAGRI), Ikigo Africa Agribusiness Academy, Duch Poultry Center (DPC), Netherlands-Africa Business Council (NABC), Poultry Association of Rwanda, na World Poultry Science Association (WPSA).

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA