U Rwanda rwungutse umufatanyabikorwa mu kwagura itumanaho ry’ibyogajuru
Amakuru

U Rwanda rwungutse umufatanyabikorwa mu kwagura itumanaho ry’ibyogajuru

NTAWITONDA JEAN CLAUDE

June 6, 2022

Mu gihe kuri uyu wa Mbere taliki ya 6 Kamena i Kigali hateraniye Inama Mpuzamahanga yiga ku Iterambere ry’Ikoranabuhanga mu Itumanaho (World Telecommunication Development Conference/WTDC), Urwego rw’u Rwanda rushinzwe Isanzure rwasinyanye amasezerano y’imikoranire n’Ihuriro Mpuzamhanga ry’ibigo bitanga serivisi z’itumanaho mu byogajuru (GSOA).

Ubwo bufatanye bugamije kwagura serivisi z’ibyogajuru mu kwimakaza ikoranabuhanga mu itumanaho n’izindi serivisi zitangirwa mu isanzure, bwashyizweho umukono n’Umuyobozi wa RSA Francis Ngabo hamwe n’uwaje ahagarariye ubuyobozi bwa GSOA.

Inama y’uyu munsi yahuje ibigo bikoresha ibyogajuru ndetse n’inzego zishinzwe kugenzura isanzure mu rwego rwo guhuza imbaraga mu kurushaho kubyaza umusaruro ibyogajuru mu bijyanye no kugeza serivisi z’ikoranabuhanga mu itumanaho kuri bose, ihererekanyamakuru ku buhinzi, iteganyagihe, guteza imbere ikoranabuhaga mu rwego rw’ubuzima n’ibindi.

Minisitiri w’Ikoranabuhanga no Guhanga Ibishya Ingabire Paula, yashimiye ubuyobozi bwa GSOA, abakoresha ibyogajuru n’ibigo bishinzwe Isanzure muri Afurika bateraniye i Kigali biga ku guteza imbere ikoranabuhanga mu itumahaho ryifashishije ibyogajuru.

Yavuze ko muri ibi bihe itumanaho muri rusange rikomeje kugaragaza iterambere, atari ku mugabane gusa ahubwo no ku rwego mpuzamahanga, bityo kwagura serivisi z’ikoranabuhanga mu itumanaho ni ingenzi kugira ngo zikorere hamwe n’izindi ngamba zashyiriweho kugeza itumanaho ry’ibyogajuru kuri bose.

Yavuze ko ubu bufatanye buje mu gihe ababarirwa kuri 5% mu bihugu bikiri mu nzira y’amajyambere ari bo bakorasha ikoranabuhanga rya intenet mu itumanaho mu gihe mu bihugu byateye imbere usanga bari hejuru ya 80%.

Yagize ati: “Kuba hataraboneka ibikorwa remezo bihagije kwimakaza ikoresha ry’iryo koranabuhanga mu byaro, ni yo mpamvu nyamukuru yo kuba tugifite umubare munini w’abantu bataragezwaho izo serivisi za internet.  Serivisi z’ibyogajuru zifite ububasha bwo kuziba icyuho cy’aho serivisi z’ikoranabuhanga mu itumanaho zitaragera haba mu bice bifite ibikorwa remezo ndetse n’aho bitaragezwa.”

Yavuze ko ubufatanye bw’inzego ziharanira guteza imbere serivisi z’itumanaho zitangwa n’ibyogajuru ari ingenzi cyane kugira ngo haboneke umusaruro w’iterambere ry’ubukungu n’imibereho myiza rikenewe kandi ritagira n’umwe riheza.

Minisitiri w’Ikoranabuhanga no Guhanga Udushya Ingabire Musoni Paula

Aarti Holla-Maini, Umunyamabanga Mukuru wa GSOA waje ahagarariye Umuyobozi Mukuru w’iryo huriro, na we yashimye RSA yabakiriye neza na Leta y’u Rwanda yarebye kure mu kuzirikana agaciro k’itumanaho ry’ibyogajuru ndetse na serivisi zose zitangirwa mu isanzure mu kwihutisha iterambere ry’imibereho n’ubukungu by’u Rwanda.

Yagize ati: “Uyu munsi dusinye amasezerano nyuma y’Inama Mpuzamahanga y’Umuyoboro Mugari (Broadband Commission) yabaye ejo, ishimangira ko hakenewe kwihutisha ibikorwa byo kugeza umuyoboro mugari w’itumanaho kuri bose. Binyuze mu bufatanye bwacu GSOA na RSA tuzateza imbere serivisi z’itumanaho ry’ibyogajuru. Kugira ngo ibyo bikorwe, tuzafatanya mu gushyira mu bikorwa gahunda z’Igihugu ndetse tunaharanire kurinda uruhererekane rw’ibyogajuru mu nyungu z’Abanyarwanda.”

Yakomeje ashimangira ko biteguye kwagura ubufatanye no mu bindi bihugu by’Afurika mu rwego rwo guharanira ko serivisi z’ikoranabuhanga mu itumanaho zitangwa n’ibyogajuru zigezwa kuri bose ntawusigaye inyuma.

Ati: “Afurika ni umugabane mwiza cyane aho ibihugu birenga 20 bifite gahunda zigenewe kubyaza umusaruro isanzure.  Ihuriro GSOA ryiteguye gutanga ubufasha no ku bindi bigo cyangwa Guverioma, tubafasha gushyiraho gahunda z’Igihugu zigenderwaho mu guteza imbere serivisi z’itumanaho ry’ibyogajuru.”

Umuyobozi Mukuru wa RSA Francis Ngabo,   na we yashimiye ubuyobozi bwa GSOA, impuguke n’abatanga serivisi zo mu isanzure, abashinzwe ubugenzuzi bwa serivisi z’isanzure, n’abakoresha itumanaho ry’ibyogajuru muri Afurika bateraniye i Kigali biga ku hazaza h’ikoranabuhanga muri Afurika.

Yavuze ko kugeza ubu abasaga miliyoni 100 muri Afurika ari bo batagerwaho n’itumanaho, mu gihe ibigo bitanga serivisi z’itumanaho ry’ibyogajuru bifite ubushobozi bwo kugeza izo serivisi kuri buri metero kare y’ubutaka bw’Afurika.

Yavuze ko abatanga izo serivisi n’abakora ubugenzuzi bwazo ko bafite inshingano zo gukorera hamwe mu gushyigikira no guteza imbere itumanaho ry’ibyogajuru mu ruhererekane rw’ikoranabuhanga mu itumanaho rikorerwa ku butaka.  

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA