U Rwanda rwungutse urugomero rw’amashanyarazi rucanira ingo 175,000
Amakuru

U Rwanda rwungutse urugomero rw’amashanyarazi rucanira ingo 175,000

Imvaho Nshya

June 27, 2022

Ku Cyumweru taliki ya 26 Kamena ni bwo Leta y’u Rwanda yatashye Urugomero rw’amashanyarazi rwa Mushishiro Rukarara ya V ruri mu Murenge wa Kibilizi mu Karere ka Nyamagabe, rwitezweho gutanga Megawatt 5.5 zizacanira ingo zirenga 175.000.

Ni urugomero rwubatswe ku bufatanye bwa Leta y’u Rwanda n’Ibirwa bya Maurice byiyemeje gukomeza gufatanya mu bikorwa bihindura imibereho y’abaturage birimo kubegereza amashanyarazi.

Urwo rugomero rwubatswe n’Ikigo Omnihydro cyo mu Birwa bya Maurice guhera mu mwaka wa 2017, gifatiye ku migezi ibiri yo mu Karere ka Nyamagabe ari yo Rukarara na Mushishito .

Ni urugomero rwuzuye rutwaye amafaranga y’u Rwanda abarirwa muri miliyari 32, rukaba rwaratanze akazi ku bakozi badahoraho barenga 600 mu gihe cyo kubakwa.

Umuhango wo gutaha ku mugaragaro urugomero rw’amashyanyarazi rwa Mushishito Rukarara ya V witabiriwe na Minisitiri w’Intebe w’u Rwanda Dr Edouard Ngirente na Minisitiri w’Intebe w’Ibirwa bya Maurice Pravind Kumar Jugnouth. 

Minisitiri w’Intebe Dr Edouard Ngirente yavuze ko iki gikorwa kigiye gutera ingabo mu bitugu gahunda ya Leta yo gukwirakwizwa amashanyarazi.

Mu myaka itanu uru rugomero rumaze rwubakwa, rusigiye imiryango iruturiye isaga 120 amashanyarazi ndetse bamwe mu bahabonye imirimo baravuga ko bageze kuri byinshi.

Dr Edouard Ngirente yasabye abaturage gufata neza uru rugomero ku buryo abahawe amashanyarazi bayabyaza umusaruro, ariko kandi akizeza abandi bakinyotewe na yo ko muri 2024 nta muturage uzaba adafite amashanyarazi.

Urugomero rw’amashyanyarazi rwa Mushishito Rukarara ya V rwitezeweho gucanira  ingo zisaga ibihumbi 175.

Biteganyijwe ko mu myaka 20 uru rugomero ruzabyarira inyungu abashoramari barwubatse nyuma ruzashyikirizwa Leta y’u Rwanda.

Minisitiri w’Intebe w’Ibirwa bya Maurice Hon Pravind Kumar Jugnouth, yashimiye Perezida Kagame udahwema gushakira iterambere Abanyafurika, yemeza ko ibihugu byombi bizakomeza gufatanya mu bikorwa by’iterambere bihindura imibereho y’abatuye Afurika.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA