Ubucuruzi bwo muri Finland buraharurirwa amayira mu Rwanda
Amakuru

Ubucuruzi bwo muri Finland buraharurirwa amayira mu Rwanda

NTAWITONDA JEAN CLAUDE

May 31, 2022

Guhera ku wa Gatandatu taliki ya 28 Gicurasi, Itsinda ry’abashoramari bo muri Finland ryaje mu Rwanda aho ryitabiriye Inama y’ubucuruzi ihuza abashoramari bo mu bihugu byombi hagamijwe kurebera hamwe uko bakwagura ishoramari mu nzego zitandukanye.

Leta y’u Rwanda ivuga ko ayo ari amahirwe akomeye yo guharurira inzira ishoramari ryagutse ry’abacuruzi ba Finland n’abo mu bihugu bigize Umuryango w’Ubumwe bw’u Burayi (EU) mu Rwanda.

Iyo nama yitezwe kugeza ku wa Kane taliki ya 2 Kamena, ije ikurikira uruzinduko Minisitiri w’Ububanyi n’Amahanga n’Ubutwererane Dr. Biruta Vincent aheruka kugirira muri Finland mu kwezi k’Ukwakira 2021 aho na we yagiye aherekejwe n’itsinda ry’abashoramari bo mu Rwanda.

Kuri uyu wa Kabiri taliki ya 31 Gicurasi 2022, inama y’ubucuruzi itegura ubufatanye burambye hagati y’abacuruzi bo mu Rwanda n’abo muri Finland yakomeje kuri uyu munsi hateguwe n’ibirori  byo gufungura ibiro bihagarariye inyungu za  Finland mu Rwanda (Consulate).

Iyo nama yitabiriwe n’abantu basaga 61 bahagarariye Urugaga rw’Abikorera mu Rwanda (PSF), abahagarariye Urugaga rw’abacuruzi b’i Burayi mu Rwanda (EBCR), Urwego rw’Igihugu rw’Iterambere (RDB), Ikigo Mpuzamahanga cy’Imari cya Kigali (KIFC), Uhagarariye Finland mu Rwanda n’abandi batumirwa.

Ubuyobozi bwa EBCR ku bufatanyije n’Ikigo gishinzwe Iterambere ry’Ubucuruzi cya Finland, ni bo bateguye iyi nama y’ubucuruzi y’umwaka yitabiriwe n’abahagarariye ibigo umunani bikomeye muri Finland.

Ibyo bije bikurikira amasezerano yasinywe hagati ya EBCR na EU mu ntangiriro z’uku kwezi, hagamijwe gushyigikira iterambere ry’Urwego rw’Abikorera mu bukungu bw’u Rwanda binyuze mu guhuza, kumenyesha no guhagararira neza mu gihugu ubucuruzi bufite inkomoko mu bihugu by’i Burayi.

Itsinda ryaturutse muri Finland ryaje riyobowe n’Umuyobozi w’Ikigo Gishinzwe Iterambere ry’Ubucuruzi muri Finland Madamu Nina Kopola.

Umuyobozi wa EBCR Giovanni Davite, yavuze ko ihuriro ryabo rigamije gushyigikira ishoramari riturutse i Burayi rigakorwa ku butaka bw’u Rwanda. Ati: “Umuryango wiyemeje gushyigikira ishoramari ry’u Burayi mu Rwanda kandi ubu rifite abanyamuryango barenga 100 bakora mu nzego zinyuranye mu buzima, kongerera agaciro umusaruro w’ubuhinzi n’ubworozi, uburezi, ubucukuzi bw’amabuye y’agaciro n’ubwubatsi.”

Yakomeje avuga ko intego biyemeje ari iyo gutanga ubufasha bufatika mu kwagura isoko ry’u Rwanda no kunoza ikirere cy’ubucuruzi aho ishoramari rishobora gukorwa rikaramba.

Ubunararibonye bwa EBCR bumaze kuba ntamakemwa nkuko bigaragazwa n’abagenerwabikorwa bayo, ndetse n’inzego za Leta bakorana mu rugendo rwo guteza imbere urwego rw’abikorera mu Gihugu.

U Rwanda rukomeje kugaragaza umuvuduko mu korohereza ishoramari rishya, gushyigikira irimaze igihe rikora ndetse no guteza imbere urwego rw’inganda kubera politiki nziza y’Igihugu igamije kongera ubukungu n’imibereho myiza by’abaturarwanda.

Ibyo bituma u Rwanda ruba igihugu cya mbere muri Afurika gifite ubukungu bwihuta mu iterambere ndetse rukaba n’amarembo yizewe yo gukorera ubucuruzi muri Afurika y’Iburasirazuba n’iyo hagati.

Abashoramari baje mu Rwanda biteguye kuba bakorana na bagenzi babo babarizwa mu nzego zirimo inganda, ubuhinzi n’ubworozi no kongerera umusaruro agaciro, ubwubatsi, Ikoranabuhanga ndetse na serivisi z’imari, ingufu, ubucukuzi, ubuzima n’uburezi.

Uru ruzinduko rwari rwitezwe kuba muri Mutarama uyu mwaka ariko ruza gusubikwa mu gihe ingendo mpuzamahanga zongeye gukumirwa kubera icyorezo cya COVID-19.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA