Ubufatanye bw’inzego buzafasha abatishoboye gufashwa bagacuka
Imibereho

Ubufatanye bw’inzego buzafasha abatishoboye gufashwa bagacuka

NTAWITONDA JEAN CLAUDE

March 1, 2022

Abantu batishoboye bafashwa mu buryo butandukanye kugira ngo bikure mu bukene, abafashwa bacuke, bishobora kugerwaho mu gihe habayeho ubufatanye mu kubitaho mu nzego zitandukanye, bidahariwe gusa abashinzwe imibereho myiza.

Umuyobozi ushinzwe Ishami Rishinzwe Guteza Imbere Umurimo n’Ishoramari mu Murenge wa Ngera mu Karere ka Nyaruguru Gasambi Innocent yabigarutseho agaragaza ko ushinzwe imibereho myiza atakora wenyine ngo bitume umuntu utishoboye ubona ubufasha bwa Leta binyuze muri gahunda zitandukanye harimo na VUP yivana mu bukene, kuko hakenewe ubufatanye mu kumuzamura.

Yagize ati: “Twe nk’abashinzwe ishoramari ntitwari dusanzwe dukorana inama n’abashinzwe imibereho myiza, twitaga ku nshingano zacu nk’abantu bashinzwe iterambere ariko byagaragaye ko ushinzwe imibereho myiza ubwe wenyine atabasha  gufasha wa muturage ngo amukure ku rwego rumwe amugeze ku rundi.

Biba ngombwa ko habaho ubufatanye hagati y’abashinzwe guteza imbere umurimo n’ishoramari, ushinzwe imibereho myiza, ushinzwe ubuhinzi kugira ngo buri wese mu nshingano ze agire icyo akora gifasha wa mukene haba mu buryo bw’imyumvire ndetse no mu nshingano zacu tuziganishe mu kurengera abatishoboye dufasha wa muturage ngo yivane mu bukene agire ahantu abasha kugera”.

Aba ni abahuguwe ngo na bo bajye guhugura Abajyanama b’Imibereho n’Iterambere n’Abashinzwe Iterambere ry’ubukungu mu Tugari (Foto Nyiraneza J.)

Ibi Gasambi yabigarutseho mu gikorwa cyo gusoza amahugurwa, kandi avuga ko ubumenyi bahawe bwiyongera ku bwo basanganywe, ariko ko bagiye kurushaho kwegera abatishoboye ngo bahindure imyumvire ku mikoreshereze y’amafaranga mu bifite akamaro, bashobore gusezerera ubukene, bityo bacuke.

Yagize ati: “Leta ifite intego yo gufasha abaturage kwivana mu bukene ngo bashobore kwiteza imbere, ariko iyo ureba bashoyemo imbaraga nyinshi hashingiwe kuri gahunda nyinshi zitandukanye zirimo  inkunga y’ingoboka, imirimo y’amaboko yoroheje, imirimo y’amaboko isanzwe, ingo mbonezamikorere ariko ubona hakiri ikibazo cy’imyumvire itandukanye aho usanga umuntu kumva ko kuva mu cyiciro kimwe ajya mu kindi, yumva ari ibintu bimwima amahirwe yo kugira ngo abashe kubona inkunga bigatuma akenera gukomeza kuguma muri cya cyiciro.”

Gasambi yavuze ko ubumenyi bungutse bugiye kubafasha kurushaho gukora buri wese yuzuza inshingano ze ariko noneho intego ari ukuzikora  afasha wa muturage ngo agire urwego avaho n’urwo ageraho yiteza imbere.

Umuturage azasobanurirwa  ikoreshwa neza  ry’amafaranga,  uko  yaba angana kose ngo abashe kubageza ku musaruro ukwiriye.

Umuyobozi ushinzwe gahunda zo kurengera abatishoboye muri LODA, Bwana Gatsinzi Justine yashimangiye ko umuntu utishoboye bitakoroha ko urwego rumwe rwakora rwonyine ngo rumukure mu bukene.

Ati: “Aya mahugurwa yabaye umwanya wo kumenya ko kuzamura abaturage bitareba urwego rumwe. Umuturage si uwa VUP, hari ba agoronome, abashinzwe ibikorwa by’umurimo n’iterambere mu karere n’ubucurizi, abashinzwe amakoperative n’abashinzwe imibereho myiza harakorerwa ibintu bitandukanye ibyo byose bitanga inzira yaho umuturage aca ava mu bukene.”

Umuyobozi w’imibereho myiza mu Murenge wa Gashari mu Karere ka Karongi, Uwayisaba Clothilde, we yavuze ko inzego zitandukanye ari abakora mu buhinzi, mu mibereho myiza, mu guteza imbere umurimo n’ishoramari bafatanyije ari umuyoboro wo gutuma abafashwa bivana mu bukene.

Ati: “Guhindura imyumvire bakabasha kubyaza umusaruro za nkunga bahabwa kugira ngo mu minsi iri imbere babashe kwibeshaho badakomeje kuba umutwaro ku gihugu.”

Ibi ni ibikoresho bizafasha gukurikirana uburyo ibyo umuntu uhabwa ubufasha afite uko byaba bingana kose azabibyaza umusaruro (Foto Nyiraneza J.)

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA