Ubukungu bw’u Rwanda bwazamutse ku 10.9% mu 2021
Amakuru

Ubukungu bw’u Rwanda bwazamutse ku 10.9% mu 2021

NTAWITONDA JEAN CLAUDE

March 21, 2022

Ubuyobozi bw’Ikigo cy’Igihugu cy’Ibarurishamibare mu Rwanda (NISR) bwatangaje ko Umusaruro Mbumbe w’Igihugu (GDP) wazamutse ku kigero cya 10.9% mu mwaka wa 2021 wose uvuye ku kigero cya 3.4% wagabanyutseho munsi ya zero mu mwaka wa 2020.

Ubuyobozi bwa NISR bushimangira ko mu mwaka ushize inzego hafi ya zose z’ubukungu zagiye zitera intambwre ishimishije mu izahuka ryazo kurenza no ku kigero zariho mbere ya COVID-19.

Imibare y’uko ubukungu bwagiye bwiyongera muri buri gihembwe, igaragaza ko ubukungu bwazamutse ku kigero cya 3.5%, mu gihembwe cya mbere cya 2021, buzamuka kuri 20.6% mu gihembwe cya 2 na ho igihembwe cya 3 buzamuka ku kigero cya 10.1% 

Inzego zasigaye zikirimo kwiyubaka ni urujyanye n’umusaruro w’ubuhinzi woherezwa mu mahanga, ubucukuzi bw’amabuye y’agaciro, amahoteli n’amaresitora, urwego rw’ubwikorezi ndetse na serivisi zishingiye ku bukerarugendo.

Muri uyu mwaka, Urwego rw’Ubuhinzi rwazamutse ku kigero cya 6% mu gihe urw’Inganda rwazamutse ku kigero cya 13% na ho rwa Serivisi rukaba rungana na 12%.

Igitangaje no uko mu mwaka wa 2020, Umusaruro Mbumbe w’igihugu wamanutse ku kigero cya 3.4% munsi ya zero, bikaba bivuze ko umwaka wakurikiyeho bwiyubatse ku buryo budasanzwe kandi bwasaby imbaraga zidasanzwe.

Ni mu gihe mu mwaka wa 2019 uyu musaruro wari wazamutse ku kigero cya 9.5%, na ho mu 2018 bwari bwazamutse ku kigero cya 8.6%, mu 2017 kizamuka ku kigero cya 4.0%.

Kimwe mu byatumye ubukungu buzahuka harimo ingamba Leta y’u Rwanda yafashe mu guhangana n’ingaruka za COVID-19 mu nzego zitandukanye z’ubuzima n’ubukungu.

Ubukungu bw’u Rwanda buzamutse ku kigero cya 10.9% mu gihe imibare y’agateganyo yagenaga ko buzazamuka ku gipimo cya 10.2% muri uyu mwaka wa 2021, bukazazamuka kuri 7.2% muri 2022, na 7.9% muri 2023 mbere y’uko buzamuka ku gipimo cya 7.5% muri 2024.

TANGA IGITECYEREZO

  • Hakorimana Felix
    March 21, 2022 at 6:21 pm Musubize

    Iryo zamuka se muba muvuga ubukene bukiyongera,amafranga y’inguzanyo akazamuka,ibiciro ku isoko bikazamuka ibwo ubukungu buba bwazamutse gute!

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA