Ubwoba ku banyura kuri Sitade ya Rusizi mu ijoro kubera ubujura
Imibereho

Ubwoba ku banyura kuri Sitade ya Rusizi mu ijoro kubera ubujura

Imvaho Nshya

October 22, 2023

Abaturage basanzwe baca inzira inyura kuri Sitade y’Akarere ka Rusizi baratabaza kubera ko hose habaye ikizima gusa, bityo bikaba byaratanze icyuho ku bajura n’abambuzi kandi nta handi bashobora kunyura.

Bavuga ko izo nzira zisigaye zibatera ubwoba  mu masaha y’ijoro kuko iyo ugeze kuri iyi Sitade nijoro usanga ibice byose ari umwijima w’icuraburindi gusa.

Ubwo Imvaho Nshya yahageraga ahagana saa moya n’igice z’umugoroba, yahahuriye n’abagendaga bamurika amatelefoni, bitotomberaga kubona igikorwa remezo nk’icyo kitamurikirwa mu masaha y’ijoro, bakaba bahanyura bikandagira bikanga abajura n’abambuzi bahahurira.

Mukamana Stéphanie wo mu Murenge wa Mururu, avuga ko akorera imirimo ye mu Mujyi wa Rusizi akaba yajyaga ahanyura  ahagana saa mbiri z’ijoro ataha.

Muri iyi minsi ngo ntiyakwibeshya ngo ahanyure muri ayo masaha nyuma y’ukwezi gushize ahamburiwe telefoni n’abari baturutse kuri iyo Sitade idafite amatara amurikira abagenzi.

 Ati: “Tumaze  nk’umwaka wose  hano haca umugabo hagasiba undi kubera aya matara yo ku muhanda yazimye. Mbere n’ubundi ibice byegereye sitade byose ntawapfaga kubyisukira nijoro,  kuko aba ari mu mwijima w’icuraburindi.”

Bavuga ko ubundi hari igihe umuhanda banyuramo wigeze kuba ucaniwe ntibite ku kuba sitade itagira amatara ariko kuri ubu batangiye guhura n’ingaruka babonye ko ari ingenzi.

Yakomeje agira ati: “Kuhanyura bisaba kwitwaza amabuye n’ibibando mukagendera rimwe muri kumwe n’abagabo, mwikanga na Baringa kubera uburyo hasigaye hameze. Abayobozi nk’ubu barangariye mu biki bituma batayasubizaho?”

Hari amatara yo ku muhada yazimye bituma abagenda muri uwo muhanda bagerwaho n’ibyago byo kuba sitade idacaniye

Kagango Fécien utuye mu Murenge wa Kamembe, avuga ko iki kibazo bakivuze ariko ntihagira ucyumva, akemeza ko ubuyobozi bukizi, akibaza impamvu Sitade igira ibice bitagira amatara, n’ibiyafite ataka.

Yavuze ko no muri Sitade imbere ijoro aba ari umwijima musa kuko mu kibuga nta tara na rimwe rihabonesha rihaba, akabona, nk’Umujyi wunganira Kigali bidakwiriye.

Gatera Narcisse uhakora izamu ry’amanywa hakaba n’igihe akesheje agataha nijoro, na we asanga bibabaje cyane kugira Sitade y’ikizima n’umwanda ku mpande mu mujyi wunganira Kigali wiyemeje guteza imbere isuku n’imikorere ituma abantu bakora amasaha menshi cyane cyane abacuruzi.

Ati: “Nkora izamu ry’amanywa, nijoro hakarara ba DASSO. Hari igihe amatara yo muri Sitade bayazimya banga ko arara yaka, ariko nta tara na rimwe tugira ribonesha mu kibuga. Ni yo mpamvu haba ari mu mwijima nijoro.”

Umuyobozi wungirije w’Akarere ka Rusizi ushinzwe iterambere ry’ubukungu Ndagijimana Louis Munyemanzi, yemera ko ari ikibazo koko kuba umuntu yanyura kuri Sitade y’Akarere nijoro abajura bakamucucura kubera ikizima, ariko ko byatewe n’ubujura bw’ibikoresho by’amashanyarazi yo ku muhanda.

Yavuze kandi ko icyo kibazo bakizi kandi bakomeje kugikurikirana, ati: “Dufite ikibazo cy’abajura b’insinga z’amashanyarazi y’amatara yo ku muhanda, tumaze gufata batandatu babifungiwe  bariho bakurikiranwa. Bagenda bakuraho insinga cyangwa utuntu dutuma bacana, amatara ntiyongere kwaka.”

Yizeza abaturage ko mu cyumweru kimwe ayo matara azaba yasubiyeho imbibi za Sitade zikongera kuba nyabagendwa nijoro, akihanganisha ababa barahamburiwe ibyabo n’abo bajura.

Avuga ko ahari ibibazo by’amatara yo ku muhanda hose muri uyu mujyi bagiye kwihutira kubikemura, akanihanangiriza abafite ingeso mbi zo kwangiza ibikorwa remezo, ko ibihano bikakakaye biteganyijwe ku muntu wese uzabifatirwamo.

Gatera Narcisse ucunga umutekano w’iyi Sitade kumanywa na we asanga bitumvikana ukuntu yaba mu kizima

BAHUWIYONGERA SYLVESTRE

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA