Ubwoba ni bwose ku Banyarwanda bahigwa n’abaturanyi i Kinshasa
Amakuru

Ubwoba ni bwose ku Banyarwanda bahigwa n’abaturanyi i Kinshasa

NTAWITONDA JEAN CLAUDE

June 29, 2022

Ubuzima bwari bumeze neza kuri Zawadi (amazina yahinduwe) utuye i Kinshasa mu Murwa Mukuru wa Repubulika Iharanira Demokarasi ya Congo (RDC), kugeza muri Gicurasi ubwo hadukaga imirwano y’inyeshyamba za M23 n’ingabo za FARDC yazuye urwango ku Banyarwanda n’Abanyekongo bavuga Ikinyarwanda batuye muri icyo Gihugu.

Ibiro Ntaramakuru by’Abongereza (Reuters) byaganiriye na Zawadi ukomoka mu Rwanda, agaragaza ubuzima buteye ubwoba babayemo kuko batakivuga rumwe n’abaturanyi babo basigaye babareba ay’ingwe, ubuzima bwabo bukaba bwarahagaze kuko batakigira icyo bakora batinya kuba bagirirwa nabi.

Uburakari bw’Abanyekongo ku Banyarwanda na bagenzi babo bavuga ururimi rw’Ikinyarwanda, rwazamutse nyuma y’ubutumwa bwatanzwe na Guverinoma, ubuyobozi bwa FARDC na Perezida w’Igihugu Felix Antoine Tshisekedi Tshilombo, bushinja u Rwanda gushyigikira inyeshyamba za M23 zivuga ko ziharanira uburenganzira bw’Abanyekongo bavuga ururimi rw’Ikinyarwanda.

 Ibintu byatangiye guhindura isura muri Gicurasi uyu mwaka, igihe umutwe wa M23 washozaga intambara mu Burasirazuba bwa RDC nyuma y’imyaka irenga umunani wari umaze utakivugwa nyuma yo gutsindwa ukanahungira mu bihugu by’abaturanyi.

Mu byo RDC ishingiraho ishinja u Rwanda gufasha M23, ni uko ruri mu bihugu byahaye ubuhungiro bamwe mu barwanyi b’izo nyeshyamba bambutse umupaka nyuma yo kotswa igitutu n’ingabo za Leta. Icyo gihugu gikeka ko cyatewe n’abahungiye mu Rwanda nyuma yo guhabwa imyitozo n’inkunga mu bya gisirikare, ariko bihabanye n’ukuri kuri ku kibuga.

Guverinoma y’u Rwanda ihamya ko yakiriye abo barwanyi hakurikijwe ibyo amategeko mpuzamahanga ateganya, bamburwa intwaro ndetse banajyanwa mu nkambi iri mu Burasirazuba bw’Igihugu, kure cyane y’umupaka uhuza u Rwanda na RDC.

Kugeza n’uyu munsi abambuwe intwaro baracyacumbikiwe muri iyo nkambi, ari na yo mpamvu Leta y’u Rwanda isanga ibirego bya RDC nta shingiro bifite, ahubwo bigamije kwihunza inshingano zo guhangana n’ibibazo biri imbere muri icyo Gihugu.

Mu bilometero amagana n’amagana uturutse mu Ntara ya Kivu y’Amajyaruguru iri kuberamo imirwano, Zawadi ari mu bihumbi by’abaturage bakomeje kugerwaho n’ingaruka z’urwango ku Rwanda rukomeza kwiyongera mu Banyekongo.

Uyu mubyeyi w’abana babiri avuga ko akurikirana ubwoba ibitangazwa ku mbuga nkoranyambaga, birimo n’amashusho y’abasore b’ibigango bagaragaye bafite imihoro barimo guhagarika imodoka bashakamo Umunyarwanda n’usa na bo wese.

Ku Munyarwanda wabaye mu Rwanda mu myaka 28 ishize n’umunyamahanga wari mukuru icyo gihe wabashije kumenya ibyaberaga mu Rwanda, biragoye ko ayo mashusho atagarura urwibutso rw’Interahamwe zihagaze kuri za bariyeri zaka ibyangombwa zishaka Abatutsi ngo bicwe.

Uyu munsi, Zawadi ahora mu bwihisho ndetse ntacyemerera n’abana be gusohoka ngo bajye ku ishuri. Uyu mubyeyi wanze gutanga amazina nyakuri ku mpamvu z’umutekano we, yagize ati: “Ubu sinshobora gutwara abana banjye ku ishuri. Sinshobora kujya ku isoko, ngomba kuguma mu rugo.”

Zawadi ntakibasha gukora ngo abone icyatunga umuryango we. Amasaha menshi y’umunsi ayamara ari hamwe n’abana be bakiri bato mu rugo, agakurikirana ibirimo gukorwa mu mujyi ku mbuga nkoranyambaga no kuri telefoni,

Yakomeje agira ati: N’abo twari dufatanyije ubucuruzi, iyo bambonye banyakiriza amagambo yuzuye urwango. Ibyo bintera guhangayikira ubuzima bwanjye”

Mu ntangiriro z’ukwezi kwa Kamena, amashusho yakwirakwiye ku mbuga nkoranyambaga yerekanaga abagabo bafite imihoro, amasura yabo bayashushanyijeho ibendera rya RDC, bazenguruka Umujyi wa Kinshasa; bamwe banagaragaye banasahura amaduka bivugwa ko ari ay’Abanyarwanda cyangwa Abanyekongo bavuga Ikinyarwanda.

Andi mashusho yakwirakwiye, yerekanaga ibihumbi by’abigaragambya bafite ifoto ya Perezida wa Repubulika y’u Rwanda Paul Kagame batesheje agaciro. Abigaragambya barimo na bamwe mu banyapolitiki bakomeye muri RDC, basabye ko Ambasade y’u Rwanda muri icyo Gihugu ifungwa.

Komiseri wa Polisi w’Umujyi wa Kinshasa Gen. Sylvano Kasongo, yabwiye itangazamakuru ko inzego z’umutekano zahawe amabwiriza yo guta muri yombi umuntu wese wambaye imyambaro isa n’iy’abasirikare cyangwa abafite imyitwarire iteje inkeke.

Yavuze ko hari bamwe muri abo bagizi ba nabi bamaze gufatwa bagafungwa, ati: “Ubusanzwe abaturage ba Kinshasa bagira urugwiro, ni yo mpamvu twamaganye abantu bose bibasira ba nyakamwe b’Abanyarwanda.”

Guverineri wa Kinshasa Gentiny Ngobila, yasabye abaturage ayoboye kwirinda gutura ‘Abanyarwanda’ umujinya, agira ati: “Ntidukwiye kwijandika muri ibyo bikorwa by’urwango kuko bishobora guha urwaho ababyifashisha bavuga ko Abanyarwanda bahohoterwa muri Congo ari na yo mpamvu bakeneye ubatabara.”

Aho yashakaga kuvuga ko kutibasira Abanyarwanda byakuraho kuba u Rwanda rwakwitwaza ko abaturage barwo barimo guhohoterwa rukinjira muri RDC nk’uko byagenze mu mwaka wa 1996 no mu 1998.

Nubwo abayobozi bagerageza kuvuga amagambo aryoheye amatwi, Abanyekongo bavuga Ikinyarwanda n’abafite inkomoko mu Rwanda bahura n’inkuru itandukanye nk’uko bishimangirwa na Zawadi wagize ati: “Aho ujya hose, utekereza ko abantu bari bukwice, bashobora kukwangiza. Urwango bafitiye u Rwanda ruracyari rubisi.”

TANGA IGITECYEREZO

  • Gifi
    June 29, 2022 at 1:14 pm Musubize

    Kwica Abanyarwanda sibyo bizakuraho Umutekano muke ugaragara Muri kariya gace Ahubwo government ubwayo ni ikemure ikibazo cya M23 cyane ko basinyanye Amasezerano leta ntiyubahirize.
    Congo kills itself.

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA