Real Madrid yo muri Espagne yageze ku mukino wa nyuma wa UEFA Champions League isezereye Bayern Munich yo mu Budage iyitsinze ibitego 2-1 mu mukino wo kwishyura wa 1/2 wari ugoranye cyane. 

Uyu mukino wabaye ku mugoroba wo ku wa Gatatu tariki 8 Gicurasi 2024 ku kibuga Santiago Bernabéu i Madrid muri Espagne 

Umukino ubanza wabereye mu Budage amakipe yombi yanganyije ibitego 2-2, bityo hashakwaga isanga Borussia Dortmund ku mukino wa nyuma yo yasezereye Paris Saint-Germain.

Uyu mukino watangiye amakipe yombi asatirana ariko Real Madrid igahusha uburyo bwinshi bw’ibitego bwabonwaga na Vinicius Junior na Rodrygo.

Ku rundi ruhande, Harry Kane yageragezaga gushaka igitego ariko umunyezamu Andriy Lunin akamubera ibamba.

Ku munota wa 35, Joshua Kimmich yazamukanye umupira, bawukuramo usanga Kane atera ishoti rikomeye, umunyezamu Lunin ashyira umupira muri koruneri.

Igice cya mbere cyarangiye amakipe yombi anganya ubusa ku busa.

Mu gice cya kabiri, Real Madrid yasubiranye imbaraga nyinshi ikomeza gusatira ishaka igitego cya mbere 

Ku munota wa 54, Vinicius yazamukanye umupira ku ruhande rw’ibumoso awuhindura imbere y’izamu, Rodrygo akoraho uca hanze gato cyane y’izamu.

Ku munota wa 58, Real Madrid yabonye coup franc ku ikosa ryakorewe Jude Bellingham, Rodrygo ayiteye umunyezamu Manuel Neuer akuramo umupira.

Iyi kipe yo muri Espagne yakomeje gusatira bikomeye ariko umunyezamu Neuer akayibera ibamba.

Ku munota wa 65, ni bwo bwa mbere Bayern Munich yageze imbere y’izamu rya Real Madrid ku ishoti ryatewe na Jamal Musiala, Lunin akarishyira muri koruneri.

Ku munota  wa 68, Kane yahaye Alphonso Davies umupira muremure undi yinjira mu rubuga rw’amahina atera ishoti rikomeye atsinda igitego cya mbere cya Bayern Munich.

Nyuma y’iminota itanu gusa, Real Madrid yishyuye igitego ariko umusifuzi aracyanga avuga ko Nacho yabanje gukorera ikosa Joshua Kimmich.

Ku munota wa 88, Vinicius yateye ishoti rikomeye ari hanze y’urubuga rw’amahina, umunyezamu Neuer ntiyawufata ngo awukomeze Joselu arawumutanga yishyura igitego cya mbere.

Iyi kipe y’i Madrid yakomeje gusatira cyane. Nacho yacomekeye umupira Antonio Rudiger awuhindura imbere y’izamu, Joselu atsinda igitego cya kabiri, baracyanga umusifuzi w’igitambaro avuga ko yaraririye.

Nyuma yo kwifashisha amashusho (VAR), umusifuzi yemeje igitego, Real Madrid iyobora umukino n’ibitego 2-1 ku munota wa 90+1.

Mbere y’uko umukino urangira umusifuzi wa kane yongeyeho iminota icyenda yarenze igera muri 13.

Umukino warangiye Real Madrid itsinze Bayern Munich ibitego 2-1 mu mukino wo kwishyura iyisezerera ku giteranyo cy’ibitego 4-3 mu mikino ibiri yombi.

Real Madrid yakoze amateka yo kugera ku mukino wa nyuma wa UEFA Champions League inshuro 18, mu gihe izigera kuri 14 yegukanye igikombe.

Ku mukino wa nyuma Real Madrid izahura na Borussia Dortmund tariki 1 Kamena 2024 kuri Sitade ya Wembley i London mu Bwongereza.