Uganda igiye guhiga bukware abishe ba mukerarugendo babiri
Mu Mahanga

Uganda igiye guhiga bukware abishe ba mukerarugendo babiri

Imvaho Nshya

October 19, 2023

Perezida Yoweri K. Museveni wa Uganda ejo ku wa Gatatu yavuze ko ingabo za Uganda zizahiga bukware abishe ba mukerarugendo babiri b’abanyamahanga n’umuturage wari ubayoboye muri parike, mu rugendo rw’ukwezi kwa buki barimo.

Ubuyobozi bwa Uganda burashinja umutwe w’inyeshyamba za ADF gukora ubwo bwicanyi bwabaye ku wa Kabiri buhitana Umunyafurika y’Epfo, Umwongereza n’umuturage wa Uganda wari ubayoboye muri parike ya Queen Elizabeth iri mu Burengerazuba bw’icyo gihugu.

Perezida Museveni, abinyujije ku rubuga rwa X yise igitero cyahitanye aba ba mukerarugendo ‘Igikorwa cy’iterabwoba’.

Yavuze ko abo bakora iterabwoba nta kabuza bazaryozwa ibyo bakoze.

ADF yatangiye ishaka guhirika ubutegetsi muri Uganda, ubu ifite ibirindiro muri Repubulika Iharanira Demokarasi ya Congo kuva mu 1990. Imaze imyaka ine ikorana n’umutwe ugendera ku matwara ya Kiyisilamu (IS).

Nyuma yo gukorera muri RDC imyaka ine, mu mezi ashize ADF yakajije umurego ku bitero igaba muri Uganda.

Mu kwezi kwa Gatandatu yagabye igitero ku ishuri mu Burasirazuba bw’igihugu ahitwa Kasese ihitana abantu 40.

Mu kwezi k’Ukuboza 2021, Uganda na Repubulika Iharanira Demokarasi ya Congo byafatanyije mu gikorwa cyo guhiga inyeshyamba za ADF mu Burasirazuba bwa Congo, bohereza ingabo zirwanira ku butaka n’izirwanira mu kirere.

Uganda ivuga ko imaze kwica inyeshyamba za ADF zisaga 500 no gusenya inkambi zazo.

Gusa Perezida Museveni yemeye ko hari icyuho mu buryo inzego z’umutekano zitwaye mu kibazo cy’abo yise ‘abacitse ku icumu’ mu nyeshyamba za ADF zikomeje guteza ibibazo by’umutekano muke nk’uko byatangajwe n’Ibiro Ntaramakuru by’Abongereza (Reuters).

KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA