Uganda: Iratangaza guma mu rugo kubera icyorezo cya Ebola
Mu Mahanga

Uganda: Iratangaza guma mu rugo kubera icyorezo cya Ebola

NTAWITONDA JEAN CLAUDE

October 17, 2022

Perezida wa Uganda, Yoweri Kaguta Museveni, yatangaje guma mu rugo y’ ibyumweru bitatu mu Turere tubiri tuzahajwe na Ebola mu gihe iki Gihugu kirimo kirwanya ubwiyongere bwa virusi ya Ebola.

Ingendo zose zinjira cyangwa ziva mu Turere twa Mubende na Kassanda zizahagarara, ariko amakamyo atwara imizigo azemererwa kwinjira no kuva muri utwo Turere, nk’uko Museveni yabitangarije kuri televiziyo ku wa Gatandatu.

Yongeyeho ko amasaha yo gutaha na yo azashyirwaho. Ahantu ho gusengera, utubari, siporo, sawuna n’ahantu ho kwidagadurira hazafungwa ariko amashuri azakomeza gufungura.

Museveni yagize ati: “Bitewe n’uburemere bw’ikibazo no gukumira ko hashobora gukwirakwira no kurengera ubuzima n’imibereho, Guverinoma ifata ingamba zinyongera zisaba ko twese twagira icyo dukora.”

Minisiteri y’Ubuzima ya Uganda na yo izongera ubufasha no gushakisha amakuru ku bigo nderabuzima byaho.

Ebola ni indwara idakunze kuboneka ariko yica cyane nkuko bitangazwa n’ikigo cyo muri Amerika gishinzwe kurwanya no gukumira indwara (CDC) kivuga ko Ebola ikwirakwira binyuze mu gukora mu matembabuzi y’uyirwaye kandi ko itandurira mu mwuka.

Nta muti ifite, kandi nta rukingo rwayo ruremerwa, nubwo hari imbaraga zihuriweho zo gukora  urwo rukingo.

Umuyobozi Mukuru w’Ishami ry’Umuryango w’Abibumbye ryita ku buzima ku Isi (OMS) Dr Tedros Adhanom Ghebreyesus, mu kiganiro yagiranye n’abanyamakuru mu ntangiriro z’uku kwezi yavuze ko inkingo zakoreshejwe mu gukumira icyorezo cya Ebola giherutse kuba muri Repubulika Iharanira Demokarasi ya Congo zidafite ubudahangarwa mu kurwanya ubwoko bwa virusi ya Ebola ubu iri gukwirakwira muri Uganda.

Tedros yagize ati: “Icyakora, inkingo nyinshi ziri gukorwa, zikaba zigeze mu byiciro bitandukanye mu kurwanya iyi virusi, ebyiri muri zo zishobora gutangira gukoreshwa muri Uganda mu byumweru biri imbere, mu gihe hagitegerejwe ko Leta ya Uganda ibyemeza.”

Uganda imaze guhura na Ebola enye, iyahitanye benshi yahitanye abantu barenga 200 mu mwaka wa 2000.

Icyorezo giheruka, cyahitanye abantu 29 muri 63 bari banduye.

Nk’uko CDC ibivuga, umuntu wanduye Ebola “ntabwo yanduza kugeza igihe ibimenyetso bigaragaye harimo umuriro, kubabara umutwe, kubabara imitsi ndetse no mu ngingo, umunaniro, kubura ubushake bwo kurya, kuribwa mu nda no kuva amaraso.”

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA