UK yatangiye gukuraho imbogamizi ku kohereza abimukira mu Rwanda
Amakuru

UK yatangiye gukuraho imbogamizi ku kohereza abimukira mu Rwanda

NTAWITONDA JEAN CLAUDE

June 22, 2022

Guverinoma y’u Bwongereza yatangiye guharura inzira y’amategeko ikumira inkiko zo hanze y’Igihugu zirimo n’Urukiko rw’u Burayi ruharanira Uburenganzira bwa Muntu (ECHR) kongera gutambamira gahunda yo kohereza mu Rwanda by’agateganyo bimukira n’abasaba ubuhungiro.

Kuri uyu wa Gatatu, ni bwo Minisitiri w’Intebe wungirije akaba na Minisitiri w’Ubutabera w’u Bwongereza Dominic Raab, ashyikiriza Inteko Ishinga Amategeko Umushinga w’Itegeko ry’Uburenganzira bwa Muntu (Bill of Rights) rishyira ububasha bw’inkiko z’igihugu hejuru y’ubw’Urukiko rw’u Burayi.

Iryo tegeko riteganya ko u Bwongereza budategetswe kuba bwakurikiza imyanzuro yose y’urwo rukiko mu gihe yaba inyuranya na Politiki z’Igihugu, ndetse rikaba rizanakuraho agakingirizo katumaga abanyabyaha b’abanyamahanga badakurikiranwa kubera ingingo ya 8 y’amasezerano yashyizweho umukono n’ibihugu by’u Burayi ibaha uburenganzira ku kugira ubuzima bwite n’umuryango.

Iyo ngingo yakoreshejwe kenshi n’ibihumbi by’abakekwaho ibyaha bagiye banga koherezwa mu bihugu byabo, kuko bagaragaza ko bafite uburenganzira bwo kuguma mu Bwongereza.

Iryo tegeko Raab akomeje gusunika nk’ushinzwe ivugururwa ry’amategeko, riteganya ko inkiko z’u Bwongereza zizagira ububasha bwisumbuye ku bw’urukiko rw’i Burayi, ndetse ko abagize Inteko Ishinga Amategeko ari bo bafite ijambo rya nyuma ku birebana n’amategeko y’Igihugu.

Raab yagize ati: “Icya mbere mu bijyanye no kugenzura uburenganzira, turagaragaza ko uburenganzira bwo gutanga ibitekerezo buza imbere y’ubundi burenganzira. Icyo ni ingenzi by’umwihariko iyo ugereranya ubwisanzure n’ubuzima bwite. Gahunda yo ku mugabane yabogamiraga gusa ku kuba umunyamahanga afite uburenganzira busesuye ku buzima bwite n’iyo yaba ari umunyabyaha.”

Yakomeje agira ati: “Gahunda yacu yo, nk’uko bimeze no mu bindi bihugu, ni iyo kwimakaza umuco w’ubwisanzure, gukorera mu mucyo, uburenganzira bwo gutanga ibitekerezo n’inshingano zijyana na byo.”

BBC ivuga ko iyo gahunda, irimo kugezwa mu Nteko Ishinga Amategeko y’u Bwongereza, yakwemerera Abaminisitiri kwirengagiza ibyemezo by’urukiko byabujije kohereza mu Rwanda abimukira n’abasaba ubuhungiro.

Ikubiye mu mpinduka ku itegeko ry’uburenganzira bwa muntu, zishyiraho ibyo Guverinoma ivuga ko bizaba amagerageza akomeye kurushaho yo mu rwego rw’amategeko.

Raab yavuze ko uyu mushinga w’itegeko ukemura ibibazo byo mu itegeko ku burenganzira bwa muntu utaryirengagije ryose uko ryakabaye, anemeza ko Leta y’u Bwongereza itazava mu masezerano y’u Burayi ku burenganzira bwa muntu.

Ingingo ikomeye cyane muri uyu mushinga w’itegeko ni iyo kwirengagiza ibyemezo by’Urubyiruko rw’Uburayi rw’Uburenganzira bwa Muntu rufite icyicaro i Strasbourg mu Bufaransa, biba bibujije gushyira mu bikorwa gahunda runaka ya Leta.

Uwo mushinga w’itegeko urimo n’ingamba zatanzweho ibitekerezo mu mwaka ushize.

Bijyanye n’umushinga w’Itegeko wa Leta y’u Bwongerezwa (Bill of Rights ) Guverinoma  izaba ishobora  kwirengagiza ibyemezo nk’ibyo by’inkiko, ibizwi nk’ibyemezo by’itegeko rya 39, kuko bo urebye mu mikorere yabo batari mu rwego rw’amategeko mpuzamahanga.

Raab, ushinzwe impinduka ku mategeko yo mu Itegeko Nshinga, yagize ati: “Umushinga w’itegeko ku burenganzira uzongerera imbaraga umugenzo wacu w’u Bwongereza w’ubwisanzure, ari na ko ushyira mu rwego [rwacu] ikigero cyiza cyo gushyira mu gaciro. Tuzasobanura neza cyane mu mategeko y’imbere mu gihugu ko ibyemezo by’inzibacyuho by’itegeko rya 39 bitareba inkiko z’u Bwongereza, inzego za Leta cyangwa abayobozi”.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA