Umugaba w’Ingabo za Qatar mu ruzinduko rw’akazi mu Rwanda
Amakuru

Umugaba w’Ingabo za Qatar mu ruzinduko rw’akazi mu Rwanda

NTAWITONDA JEAN CLAUDE

March 2, 2022

Umugaba Mukuru w’Ingabo za Qatar Lt. Gen. Salem Bin Hamad Al-Nabit ari mu ruzinduko rw’akazi rw’iminsi itatu mu Rwanda, ku mugoroba wo ku wa Kabiri taliki 01 Werurwe 2022 akaba ari bwo yasesekaye ku Kibuga cy’Indege Mpuzamahanga cya Kigali.

Ku munsi wa kabiri w’uruzinduko rwe,Lt. Gen. Salem Bin Hamad Al-Nabit yasuye Urwibutso rwa Jenoside rwa Kigali, yunamira ndetse aha icyubahiro inzirakarengane zazize Jenoside yakorewe Abatutsi ashyira indabo ku mva rusange ishyinguwemo abasaga 250,000.

Uyu muyobozi kandi yagombaga gukomereza uruzinduko ku gusura Ingoro y’Amateka y’Urugamba rwo guhagarika Jenoside ku Kimihurura, akagirana ibiganiro na mugenzi we w’u Rwanda, Gen Kazura Jean Bosco ndetse na Minisitiri w’Ingabo Maj. Gen. Murasira Albert.

Urwo ruzinduko ruje rukurikira urwo Perezida Kagame yagiriye i Doha mu murwa mukuru wa Qatar, ku wa 14 Gashyantare 2022, akaba yaragiranye ibiganiro n’Umuyobozi w’Ikirenga w’icyo gihugu, Sheikh Tamim Bin Hamad Al Thani.

Leta y’u Rwanda n’iya Qatar bikomeje kurebera hamwe uburyo bwo kwagura amahirwe y’ubufatanye n’ubutwererane mu bya gisirikare, nka rumwe mu nzego zigize ubutwererane bw’ibihugu byombi mu bya dipolomasi.

Mu mpera za Mutarama, Minisitiri w’Intebe Wungirije wa Qatar akaba n’Umunyabanga wa Leta ushinzwe Ingabo Dr. Khalid bin Mohammad Al Attiyah, yakiriye Minisitiri w’Ingabo w’u Rwanda Maj. Gen. Albert Murasira, bagirana ibiganiro byibanze ku gusuzuma inzego z’ubufatanye ibihugu byombi bifitemo inyungu, banagaruka ku nzira zitandukanye izo nzego zashyigikirwa. 

Dr. Khalid bin Mohammad Al Attiyah yaje kwakira ku meza Minisitiri Maj Gen Murasira n’itsinda ryamuherekeje mu rwego rwo kubishimira no kubaha ikaze i Doha mu Murwa Mukuru wa Qatar.

Minisitiri Maj. Gen Murasira n’itsinda yari ayoboye, bitabiriye umuhango wo gusoza amasomo ku banyeshuri biga mu Ishuri Rikuru rya Gisirikare muri Qatar ryigisha gutwara indege n’ubumenyi bw’ikirere (Al Zaeem Air College), aho u Rwanda rukomeje kunguka abanyeshuri biga ibya gisirikare muri iyi kaminuza ikomeye mu Gihugu cya Qatar no ku rwego mpuzamahanga.

Uretse umubano mu bya gisirikare, u Rwanda na Qatar bisangiye indangagaciro zirimo iyo guharanira kwigira no kureba kure, ari na yo mpamvu umubano w’ibihugu byombi umaze gushinga imizi mu nzego zitandukanye.

Umubano hagati y’u Rwanda na Qatar si uwa none nubwo wiyongereyemo ikibatsi kuva mu mwaka wa 2018, ari na bwo watangiye kugaragaza ibimenyetso byo gushinga imizi kurushaho.

Washimangiwe n’ingendo z’Abakuru b’Ibihugu byombi, aho mu myaka 2 Perezida wa Repubulika Paul Kagame yagiriye uruzinduko i Doha inshuro 2 ndetse n’Umuyobozi w’Ikirenga (Emir) wa Qatar Sheikh Tamim Bin Hamad Al Thani na we akaba yarasuye u Rwanda inshuro 2 mu mwaka wa 2019.

Uruzinduko Perezida Kagame yagiriye muri Qatar mu Ugushyingo 2018 rwaharuye inzira y’imishinga ikomeye kuko icyo gihe hasinywe amasezerano atatu hagati y’ibihugu byombi, agamije kurushaho kuzamura umubano n’ubufatanye hagati y’ibi bihugu.

Arimo amasezerano mu bijyanye n’indege, guteza imbere no kurengera ishoramari n’ay’ubufatanye mu butwererane mu bijyanye n’ubukungu, ubucuruzi n’ikoranabuhanga.

Emir wa Qatar nawe yaje mu Rwanda bwa mbere muri Mata 2019,  Perezida Kagame amutembereza muri Pariki y’Igihugu y’Akagera mu gihe cy’imvura aho basuye ibyiza nyaburanga bitwikiriye imitaka.

Yahagarutse tariki 09 Ukuboza 2019 ubwo habaga umuhango wo gutanga ibihembo ku ndashyikirwa ku rwego rw’Isi mu kurwanya ruswa (the International Anti-Corruption Excellence Awards).

Kugeza ubu, u Rwanda n’Afurika y’Epfo ni byo bihugu byo ku mugabane w’Afurika aho Qatar yakuriyeho Visa abaturage babyo, mu rwego rwo koroshya urujya n’uruza n’ubuhahirane.

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA