Umulisa yashyize hanze indirimbo y’amashusho
Imyidagaduro

Umulisa yashyize hanze indirimbo y’amashusho

Imvaho Nshya

August 12, 2023

Umulisa Cynthia uri mu bahize abandi mu irushanwa rya Rise and Shine World Inc (RSW) aherutse kwegukana, yashyize hanze indirimbo y’amajwi n’amashusho ‘Ni Yesu’.

Umuhanzi Umulisa uvuka mu muryango w’abana 7, atuye Kacyiru mu Karere ka Gasabo mu Mujyi wa Kigali, akaba asengera muri Revival Fellowship.

Nyuma y’uko irushanwa rya RSW rirangiye, uyu mukobwa w’impano itangaje yamaze kwinjira mu muziki mu buryo bweruye ashyira hanze indirimbo ye ya mbere.

Umulisa ashima Imana kuba inzozi ze zibaye impamo akaba ashyize hanze indirimbo ya Mbere

Ni indirimbo yakoze abifashijwemo na Jam Global Music ikorana bya hafi na kompanyi itegura amarushanwa RSW Talent Hunt.

Yavuze ko indirimbo “Ni Yesu” yayanditse yifashishije amagambo yo muri Bibiliya Yohana 3:16.

Hagira hati “Kuko Imana yakunze abari mu Isi cyane, byatumye itanga Umwana wayo w’ikinege kugira ngo umwizera wese atarimbuka, ahubwo ahabwe ubugingo buhoraho”.

Ni indirimbo yakozwe na M. Prosper, amashusho afatwa na Musinga atunganywa na Cyusa.

Impano yo kuririmba, ahamya ko yayiyumvisemo agitangira kumenya ubwenge, ayishyira mu bikorwa mu 2020 bityo ngo inzozi ze zagezweho.

Yagize ati “Ndashima Imana cyane kuko zimwe mu nzozi zanjye nazigezeho kandi abantu bari kuyakira neza”.

Ashimira Kompanyi imufasha mu bijyanye n’umuziki, biturutse ku kuba yaramuhaye kongera kwiyumvamo ko ashoboye.

Ati “Ituma inzozi zanjye ziba impamo”. Yavuze ko ibyerekeye amasezerano bafitanye bikomeza kuba ibanga hagati yabo.

Uyu mukobwa ukiri muto ariko mugari cyane mu mpano yo kuririmba, avuga ko yifuza kugera ku rwego rwiza.

Ati “Mu by’ukuri ndifuza ko ibindimo biciye mu butumwa bwiza bwa Yesu bizagera kure, yaba ku bemera Imana ndetse n’abatayemera bityo bikabemeza kwemera Imana”.

Mu bihembo byahawe Umulisa harimo kuba Ambasaderi w’irushanwa, kurebererwa inyungu mu muziki na Rise and Shine World Inc.

Yanashyikirijwe sheki y’amafaranga y’u Rwanda agera kuri Miliyoni imwe n’igice (1,500,000 Frw).

Yanditswe na KAYITARE JEAN PAUL

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA