Umunyamakuru Nkundineza yakatiwe gufungwa imyaka 3
Ubutabera

Umunyamakuru Nkundineza yakatiwe gufungwa imyaka 3

ZIGAMA THEONESTE

April 18, 2024

Kuri uyu wa Kane tariki ya 18 Mata 2024, Urukiko rw’Ibanze rwa Nyarugenge rwahamije umunyamakuru Nkundineza Jean Paul ibyaha byo gutukana mu ruhame no guhohotera uwatanze amakuru, ahanishwa igihano cy’igifungo cy’imyaka itatu n’ihazabu ya miliyoni imwe n’ibihumbi 100 by’amafaranga y’u Rwanda.

Ni mu gihe mu iburanisha riheruka ubushinjacyaha bwari bwamusabiye gufungwa imyaka 10 no gutanga ihazabu ya miliyoni 5 z’amafaranga y’u Rwanda, kubera ibyaha akurikiranyweho byo gutangaza amakuru y’ibihuha yifashishije ikoranabuhanga ndetse no guhohotera uwatanze amakuru ku byaha.

Ubushinjacyaha bwasabye Urukiko ko rwakwakira ubusabe bwarwo no kwemeza ko bufite ishingiro ndetse rukemeza ko Nkundineza Jean Paul ahamwa n’ibyaha akurikiranyweho, rukamuhanisha igihano cy’igifungo cy’imyaka itanu n’ihazabu ya miliyoni 3 z’amafaranga y’u Rwanda ku cyaha cyo gutangaza amakuru y’ibihuha.

Rukamuhanisha kandi igihano cy’igifungo cy’imyaka itanu n’ihazabu ya miliyoni 2 z’amafaranga y’u Rwanda.

Bwagaragaje ko urukiko rwemeza ko habayeho impurirane mbonezamugambi agahanishwa igihano cy’igifungo cy’imyaka 10 n’ihazabu ya miliyoni 5 z’amafaranga y’u Rwanda.

Nyuma y’isomwa ry’urubanza rwa Prince Kid wateguraga irushanwa rya Miss Rwanda, wakatiwe igifungo cy’imyaka itanu, Nkundineza yakoresheje imvugo iganisha ku kuba “Mutesi Jolly wegukanye ikamba rya Miss Rwanda 2016 ari we wabigizemo uruhare.”

Nkundineza yanabigarutseho mu kiganiro yagiranye n’imwe muri shene ya YouTube, avuga ko yari asanzwe azi ibibazo Mutesi Jolly yari afitanye na Prince Kid.

Ati: “Nk’umuntu wari uzi ibibazo byabaye hagati ya Mutesi Jolly na Prince Kid, naravuze nti “uramutsinze, uramugaritse, genda wisengerere, …ugende umurye.”

Mu iburana Umunyamakuru Nkundineza ibyaha yaregwaga byose yarabihakanaga.

Abamwuganira ba Me Ibambe Jean Paul abakavuga ibyo yakoze bidakwiye kwitwa ibya ahubwo ko ari amakosa y’umwuga bityo akwiye kugirwa umwere.

Nkundineza Jean Paul yavuze ko yakoresheje ijambo mafia kuri Mutesi Jolly ubwo yateguraga irushanwa ry’ubwiza rya East African ryegukanwe na Miss Shanitah ariko ntahabwe imodoka yari yatsindiye.

Yavuze ko ibyo yatangaje bitari ibihuha, ahubwo ko byari bihari ko uwo mukobwa Miss Shanitah yatsindiye imodoka, akayifitorezaho ariko ntayihabwe.

Nkundineza Jean Paul yabwiye Urukiko ko kumwita “impolie” byaturutse ku kuba yari abajijwe ku cyo atekereza ku kuba Mutesi Jolly yaranditse ku mbuga nkoranyambaga mbaga ko “abagabo bose ari inyana z’imbwa”.

Yagaragaje ko ubwo Prince Kid yatabwaga muri yombi byatangajwe ko yari akurikiranyweho n’icyaha cy’icuruzwa ry’abantu, nyamara ngo iperereza ry’ibanze ryagaragaje ko hari ibikorwa Mutesi Jolly yakoze biganisha kuri icyo cyaha.

Yagaragaje ko ibyo yavuze atari ibihuha ahubwo ko yari yahawe amakuru kandi ko aramutse aburanira mu muhezo yavuga ibintu byinshi azi kuri iyo dosiye.

Yavuze ko nyuma y’uko Ishimwe Dieudonné akatiwe igihano cy’igifungo cy’imyaka itanu yakoze inkuru afite amarangamutima bitewe n’uko yari afite amakuru menshi ajyanye n’iyo dosiye.

Ati: “Iyo nkuru narayikosoye nkimara kubona ko harimo amarangamutima menshi. Nabikosoye nyuma y’amasaha abiri kandi amabwiriza agenga umwuga arabidutegeka.”

Nkundineza yavuze ko Mutesi Jolly yigeze kugaragaza ko yifuza kuyobora Miss Rwanda nk’umukobwa ufitiye bagenzi be akamaro ariko ntiyayihabwa akaba ari ho yakuye umugani ugira uti “Umutego mutindi ushibukana nyirawo.”

Nkundineza yasabye ko yagirwa umwere ariko Urukiko rwabibona ukundi rukamugabanyiriza ibihano cyangwa bigasubikwa.

Me Ibambe Jean Paul yagaragaje ko Urukiko rudakwiye guha ishingiro ikirego Ubushinjacyaha buregamo uwo yunganira.

Yagaragaje ku kijyanye n’icyaha cyo guhohotera uwatanze amakuru nta byabayeho kuko Mutesi Jolly yari umutangabuhamya mu Rukiko, aho kuba uwatanze amakuru.

Yagaragaje ko nta gikorwa na kimwe Nkundineza Jean Paul yigeze akora kigize icyo cyaha.

Me Ibambe yasabye ko uwo yunganira yagirwa umwere kuri ibyo byaha akurikiranyweho.

Me Bayisabe Ernest na we yagaragarije Urukiko ko ibyo uwo yunganira akurikiranyweho ari amakosa y’umwuga atari icyaha.

Yavuze ko kandi  ibyo Ubushinjacyaha buri gusaba by’igihano cy’igifungo cy’imyaka 10, ngo kuko habaye impurirane mbonezamugambi bitari mu bubasha bw’Urukiko rw’Ibanze gutanga igihano kirenze imyaka itanu.

Yagaragaje ko kuba bwifuza igifungo cy’imyaka 10 bwari bukwiye kuba bwararegeye Urukiko Rwisumbuye.

Urwego rw’Igihugu rw’Ubugenzacyaha (RIB), rwataye muri yombi umunyamakuru wigenga, Nkundineza Jean Paul, tariki 16 Ukwakira 2023.

Icyo gihe RIB yatangaje ko akurikiranyweho ibyaha yakoreye ku murongo wa YouTube birimo gutukana mu ruhame, guhohotera uwatanze amakuru ku byaha no gukoresha ibikangisho.

RIB kandi yasabye abakoresha imbuga nkoranyambaga kubahiriza amategeko azigenga “kuko uzayarengaho wese azakurikiranwa nk’uko biteganywa n’amategeko.”

TANGA IGITECYEREZO

AMATEGEKO AGENGA IYANDIKA RY'IGITEKEREZO CYAWE

IZINDI NKURU WASOMA